Prov 6

₁Yäs, chik alelhuhyenej aelh laka pi'ä,

₂hätet iwoyek lhäyitlhi amej ämtes,

wet ayen lhäytseka.

₃Lhehi t'at takweyey

häp hin'o tä aelh letes ihihlä.

Yäs, chik let'uhläk letafwayej täjtso, woye täja:

Hoye aelh wet keltejlhi

yämthilek tiskanpe letes.

₄Yej t'elej wet yej lemä,

₅afwayhtej awit'äyhyajtso,

atech'aynej ch'iwase

tä lhaifwayhtej hin'o tä ichowalhe,

wok afwenche tä n'otkwey nistakej.

₆¡N'etäjayis, lhek yahin m'ak tä siwanhas iwoye!

Tetshan lakey wet achufwenej.

₇Tej tä newache elh chik laka niyat,

₈mat tachumlhi t'at

wet ihutwek lhäk tä kamaj kapelhayisa,

ihutwek hal'ä lhay tä y'o

yämthilek lhäk iche t'at.

₉¡N'etäjayis, naya tä lemä!

¡Nephä, yej lemä!

₁₀Tä lekän nahati wet letatsufwel amej

yämthilek akäj tä lemä,

₁₁hap'altseyaj ailänla

wet nehläs nichätla atape,

hätehlat iwoye etantsaj chik aipäjlhi.

₁₂Hin'o tä ni'isa iwoye t'at m'ak tä ni'isachehen.

Häpe hin'o tä lhämtes mathichehent'a.

₁₃Tä yämlhi, isuyhthipej tatelho,

wet äp ilanlhipej lepach'o,

wet äp yämyenwethä lefwus.

₁₄Isit'a m'ayhay tä ihi lehusek,

yen at tichunhayaja tä t'uhläk iwoye m'ak tä ni'isa,

iläkwethä iyhäj, t'ukwe t'at laka'tshayaj.

₁₅Tä mälhyejtso, lewit'äyhyaj iselkatla

wet lakacha ihichet'ala.

₁₆Iche seis m'ayhay tä Lhawuk y'ulhan,

wok oyok, siete m'ayhay

tä matche tä n'äyiho.

Häp tähesna:

₁₇Olhaichäjlhi;

olhämtes mathichehent'a;

olän elh tä laj letesa;

₁₈owo ohuseka'pe otkanyaj yämthilek owoye;

on'etäjiyet'a m'ak tä ni'isa;

₁₉oyäme m'ak tä n'am w'en, w'et oyämlhi;

wet m'ak tä owoye tamenej tä tataywek iyhäj.

₂₀Yäs, enpej atichunhayaja ajcha lhämet,

wet yej leyej m'ak tä ako ichufwen amej.

₂₁Satyenhi ahusek wet ti amej,

hätet iwoyek lhen amisa.

₂₂Ichunla ahiläk lelunlhi,

wet t'uhla amek lemä,

wet yämhilhila amhok len'om.

₂₃Tsi lhämtesna häpe n'ochäkw,

wet lechufwenyajay häpe isi,

wet lefwonyajay tä hiw'en amho

häpe t'at han'äyij tä haw'atshancheyaj.

₂₄Tach'otla ame häpkhilek nikalha amhi

atsinha tä ni'isa tä lech'efwa ihi

chik fwetaj ikänitlhi amej

lhämtes tä akäschehen.

₂₅Yej tihi ahusek tä lekäne tä isilataj.

Yej yahinlä tatey chik aiyahin.

₂₆Atsinha tä kain'oyaj länek lakahat pan lhiphaj.

Mat uhlä atsinha tä lech'efwa ihi,

tamenla amej wet awit'äyhyaj ihi.

₂₇Tetshan, elh chik iti'pe let'okwe itäj,

lew'uy y'o t'at,

₂₈wet elh chik t'äsche fwiyhol,

lepach'ol y'o t'at.

₂₉Häp tä mälhyej'attso

elh chik yikejlhi elh ch'efwa,

iwohiyet'ak nikatayej n'otasnhayaj.

₃₀Elh tä nichuyu wet t'etan,

õyen at häpeya hin'o tä ni'isa.

₃₁Wet chik õhw'enej, tiskanla'pe

siete veces häp m'ak tä t'etane,

wet äp õ'sohiyeja nilhok m'ak tä ihi lew'et.

₃₂Häp tä mälhyej'attso

elh chik yikejlhi elh ch'efwa,

lehusek ihihit'a.

Elh tä iwoye täjtso, lhaiwit'äyen t'at.

₃₃M'ak tä ikalhihlä lakeytso,

õ'wo lelätshaya wet õhn'äfwlhatlhi,

wet lajit lepesa tä wichi y'ulhan.

₃₄Tsi hin'o tä lech'efwa atsinha,

t'ischenyaj ihi wet lewäk ihi,

wet tek itäyhthiyeja letes häp elh

chik nichäte ifwala chik iwo hayahlä,

₃₅wet tek tachumlahlä

m'ak chik elh fwetaj tiskanej letape.

Tej chik wuj m'ak chik õ'fwenho,

mat tatäyhit'a lewäk.