N'ohanyaj t'änch'oye wichi
1N'ohanyaj ifwitsenej lechos,
wet n'otäfwnhayaj t'än
yämthilek wichi iläte.
2Takasitche'pe chenhas tä atoschephä
tä iwhäye n'äyij,
wet takasthiche n'äyhäy tä tajwek.
3Ifwitsenej lechos tä ihiche n'olafwek
tä hupuy lep'ot lepelis, wet yok:
4“Amel tä ahin'ol, häp tä ot'än amehen,
otshupyeneje olhämtesna häp amel.
5Amel tä kahanache m'akejen wet laj ahuseya,
achufwenejen wet lehanhiyeja,
häpkhilek isen m'ayhay tä lewoye.
6Tetshan olhämet, ofwenla amhohen
m'ayhay tä laha ihi wet isen.
7M'ak tä oyämhiyela
häpe t'at m'ak tä matche,
ohuminhit'ak oyäme m'ak tä kamatache.
8Isen nilhokej olhämtes,
ihichet'a elh chik häpek
ni'isa alhoho wok otkanyaj.
9Elh tä ihanej hiw'en
tä nilhokej olhämtes matchehen t'at.
Wet elh tä letäfwnhayaj ihi
hiw'en tä nilhokej olhämtes ische alhoho.
10Yej chunkat chinaj t'äj tä letachumlä,
chunkat ochufwenyaj.
Yej chunkat tä letachumlä oro tä isilataj,
chunkat n'ohanyaj.
11Tsi n'ohanyaj laha inu'pe tuntey tä isis.
Nilhokej m'ak tä wichi yäme tä isen, w'awulhihit'a.
M'ayhay tä isen tä tälho n'ohanyaj
12“Olham ohäpe n'ohanyaj
wet matche tä ohin'olhi.
Otäfwnhayaj ihi tä owoye m'ayhay tä oyäme.
13Chik on'äyiho m'ak tä ni'isa,
häp tä owunit Lhawuk.
Olham on'äyiho elh tä lhaichäjlhi wet lhaiwujyen.
Olham on'äyiho elh tä iwoye
m'ak tä ni'isa wet w'et yämlhi.
14Olham tä lewukn'o
m'ak tä one'tek õ'woye.
Ohäpe n'otäfwnhayaj
wet lewukn'o okhajyhayaj.
15Olham tä ow'enho leniyatyaj häp reyes,
wet niyatey is n'oyej
tä yenlhi leyes tä ische alhoho.
16Olham tä one'tek niyatey niyatejen wichi,
wet lhamel iwo lakalelhthayajayej honhat.
17Wichi tä ihuminn'o
olham ohumnhen t'at,
wet lhamel tä t'u n'okwe nilhok n'oye.
18N'okäywet lhäy'e n'owujyaj in'oyej,
n'okäywet tä t'un lhäy'e m'ak tä is alhoho.
19M'ak chik tälh n'oye wuj tä is,
inu'pe oro tä isilataj,
inu'pe plata tä lhäy'e lhip tä is.
20-21Wichi tä ihuminn'o,
ohänche n'o'isyaj len'äyij
wet is alhoho m'ak tä iwoye.
Wet ow'enho lakäywet tä lewuk,
oyäm tapokwe lewukwey häp m'ayhay.”
Tälhe tä nech'enyaya tä n'ohanyaj iyej Lhawuk
22Wet n'ohanyaj äp yok:
“Olham t'at tä ochun tä oiyej Lhawuk
tä kamaj niwoya tesa
tä yenlhi nilhokej m'ayhay.
23Tälhe tä nech'enyaya
ohäpe t'at lechunkatsek,
tä kamaj nenalhi honhat.
24Oiche tä kamaj newache
lewomekitas tä wus,
tä kamaj newache tewok lhayis
lhäy'e ts'ifwik lhayis.
25Tä kamaj newache chenhas,
pajche oiche t'at,
26tä kamaj Lhawuk nenalhi honhat
lhäy'e alhotas tä wus,
tä kamaj nehichet m'akfwaj chik õyok, Honhat täja.
27Wet tä Lhawuk yenlhi pule,
wet hit'unthi tä lewomekitas ichufwi,
olham oiyej t'at.
28Tä lham itihi lew'et
häp pule lhayis yämthilek ikaphä,
wet yäm t'un lewomekitas lehis tä tumchä,
olham oiyej t'at.
29Wet tä ne'tek inät lhayis ihiche t'at lew'etes,
yämthilek iwoye lham lhämet tä hiw'enho,
wet tä wak'alh honhat lefwetes,
30olham oiyej t'at,
wet otch'oteje m'ak at chik häpek lenech'ethayaj.
Wet ohäpe t'at lham lakäjyaj nilhokej ifwalas,
wet okäjyaj in'oyej nilhok lewhäy tä oiyej.
31Okoylhi t'at tä oyahinpe honhat tä lhenek,
wet okäjejlhi wichi tä i'pe.
32“Athana ch'ahu n'oye, amel tä oaleles.
Okäpfwayaj tä is iyej lhamel tä iwoye olhämtes.
33Tetshan m'ak tä ochufwen amejen,
chumlä n'ohanyaj, yej kachuye.
34Okäpfwayaj tä is iyej hin'o tä tach'ahu n'oye
wet iniwhi n'ohlä tä iwhäye owukwe ifwalapej ifwalapej.
35Tsi elh chik nilhok n'oye
nilhoke t'at lew'atshancheyaj,
wet Lhawuk tach'othiyela.
36Mat häp elh chik lhaiwetahat wet nilhoka n'oye,
lham t'at tä lhaiwit'äyen.
Nilhokej wichi tä n'äyi n'oho,
ihumin t'at t'ilek.”
