Prov 9

₁N'ohanyaj yenlhi lewukwe

wet itshänchä siete lech'utey.

₂Ilänhen itshätäy,

iwaklhat hat'es tä wuj tä is,

wet iti'pe laka mesa.

₃Wet ichen lakawos tsinhay

wet ne'tek t'änhen tä i'pe

lhip tä atojphä tä ihi hupuy wet yok:

₄“¡Lhuyay, amel tä kahanache m'akejen,

hoyay kana!”

Wet t'änch'oye iyhäj tä laj lehuseya wet yok:

₅“¡Lhuyay wet tufw oka pan,

wet yäyej hat'es tä pajche owaklhat!

₆Leyache achumyaj tä ayen ch'isukwisa,

achufwenhen häpkhilek kat'ilahen.

Wo tesa tä alhen häpeya

wichi tä lehusey ihi.”

₇Chik lefwetaj letahuyej elh tä aläkwyhantsaj wet lhok,

“Isit'a alhoho ämet tä lewoye”,

itihla amej leläkwyhanyaj.

Wet chik letahuyej elh tä akachuhantsaj wet lhok,

“Yej woynejetso m'ak tä lewoye”,

ailätyenhilhila.

₈Yej fwone elh tä aläkwyhantsaj,

n'äyihila amho.

Mat chik letahuyej hin'o tä ahantsaj wet lhok,

“Oyenek leweta”,

lham ayenlat häpeya hin'o tä lehusek ihi.

₉Ch'ote elh tä ahantsaj,

häpkhilek lhäy'e lhip lehanyaj.

Chufwen hin'o tä lechowej ihi,

häpkhilek lhäy'e lhip m'ak tä ihanej.

₁₀Humin Lhawuk wet woye lhämtes,

tsi häp tä n'ohanyaj tälhe.

Chik letäfwelej Dios tä N'ot'amajchet tä Lhamya,

täjtso häp tä häpe n'ohanyaj tä lhamya.

₁₁Aisiyeja n'ohanyaj

wet pitajla lewhäy tä leläy,

wet wujla'pe aka nekchämis.

₁₂Chik ahäpe hin'o tä ahantsaj,

amla t'at tä aisiyeja.

Wet chik ahäpe aläkwyhantsaj,

am t'at tä ihla amej ateläythayaj.

₁₃M'ak tä hich'isukyen hin'o

hätet iwoye atsinha tä sitäwo,

ch'isuk t'at, len'äfwlhi ihiyejt'a.

₁₄I'pe laka silla wet tatayphä t'at

tä ihi lewukwe lepe,

i'pe lhip tä atojphä tä ihi hupuy.

₁₅Wet t'änchehlä hin'ol tä inukwe hup kawayhi,

häp hin'ol tä iwoye lechumtes, wet yok:

₁₆“¡Lhuyay, amel tä kahanache m'akejen,

hoyay kana!”

Wet t'änch'oye hin'ol tä laj lehuseya wet yok:

₁₇“Inät tä õt'etane matche tä akäji,

wet pan tä õweskatej tä õtufw wuj tä akäj.”

₁₈Mat hin'oltso ihanhiyejt'a

tä iyhäj tä pajche õt'äne,

lep'itseyhay ihi t'at,

wet lhamel tä nech'e õt'äne

nichätho t'at lep'itseyhay lew'ettso.