Salmo|Sal 109

₁Dios tä awujyaj ihi,

chulho ot'alhyaj,

₂tsi wichi tä ni'isahen

wuj lhämtes tä ni'isachehen tä iwoyej n'oye,

wet iti n'oyej lesufwkanyaj.

₃Wuj tä lhamel n'äyi n'oho,

wet niwohit m'ak chik otes

tä iti n'oyej laka'tshayaj.

₄Ohumnhen lhamel mat tatay n'ohlä,

mat owopej ot'alhyaja.

₅Tej tä owoye m'ak tä is,

mat iwoyej at n'oye m'ak tä ni'isa,

wet tej tä otiyej ohumnhayaj,

mat n'äyi n'oho.

₆Tshupyeneje hin'o tä ni'isa

lhäy'e elh tä itiyej letes,

häpkhilek itiyej lakalelhthayaj

hin'o tä tatay n'ohlä.

₇Is chik õ'kalelhät tä letes ihi t'at,

wet is chik t'alhyaj häpe t'at lech'isukyaj.

₈Is chik nipitaja lew'atshancheyaj,

wet is chik elh lhayen at lewuka lakäywet.

₉Is chik leles chipenhas t'at,

wet lech'efwa tesa t'at.

₁₀Is chik leles häpehen wichi tä p'elitses,

t'alh'atwethä, yikch'oye lew'etes tä wasiche,

ihoye wichi iyhäj yämthilek t'alheje lhäk.

₁₁Is chik hin'ol tä tujlhaye

isoyej lakäywet tä lewuk,

wet is chik wichi tä w'enha lhamej

isoyej lakäs lhay.

₁₂Is chik nehichet hin'ok hip'altsen lham

lhäy'e leles tä chipenhas.

₁₃Is chik noj leles

wet tatäy lhey pajla'tha tiyäj'attsiy.

₁₄Is chik Lhawuk nitichunejch'oye

m'ak tä ni'isa tä lechätilis iwoye p'ante,

wet tek tatäy lako ch'isukyaj.

₁₅Is chik Lhawuk nitäyhata letes,

wet is chik wichi hip'ethatlä lhamel.

₁₆Ihanhiyejt'ak yenpej tichunhayaja

yämthilek hip'altsen elh tä p'elitsaj

lhäy'e tä w'et m'ayek t'at wet lelhakli ihi,

mat n'äyiho wet ilän.

₁₇Wet tä ihumin lewit'äyhyaj,

is chik õtkäpfwayeje t'at lewit'äyhyaj.

Wet tä nhumina tä takäpfwayeje

m'ak tä is elh chik häpe,

is chik newache elh chik takäpfwayeje

m'ak tä is häp lham.

₁₈Is chik õtkäpfwayeje t'at lewit'äyhyajay,

hätet iwoyek õyen at lew'uya,

wet tiyäjo lets'e wet tiyäjchehen lhiley,

hätet iwoye inät wok aceite.

₁₉Is chik yen at lew'uya

wet yäyit lhamej hätet iwoye kawak.

₂₀Is chik häp täjtso laha

tä Lhawuk hiw'enho otayhfwas

lhäy'e iyhäj tä iwoyej n'oye

lhämtes tä ni'isachehen.

₂₁Mat am, Iwuk, woyej n'oye m'ak tä is,

tsi lhamyaj t'at, ahap'altsentsaj t'at.

Fwayhatn'o häp tä isej ahumnhayaj tä nittäya.

₂₂Wuj tä op'elitsaj wet olhakli ihi,

wet äytaj ohusek.

₂₃Yik t'at tä ottäy t'at,

ohätet iwoye hupel,

wet ohätet iwoye chol tä yafwthi ichäj.

₂₄Wet tä n'am t'ek,

okamchetey tachettichehen,

wet tä olhäk newache,

olopen t'at.

₂₅Wichi läkwik'atn'o.

Tä lhamel iyahinn'o,

lhethey ilan'atwethä n'oyej tä iläkwlhin'o.

₂₆¡Iwuk Dios, ch'ot n'oye!

¡Häp tä isej ahumnhayaj tä nittäya, fwayhatn'o!

₂₇Tä lewoye täjtso,

is chik wichi ihanej tä häpe t'at akwey.

₂₈Tej chik lhamel takäpfwayej n'oye lhämtes tä ni'isa,

mat am letakäpfwayej n'oye m'ak tä is.

Tej chik lhamel lhaikhajyen n'ohlä,

mat is chik len'äfwlhi ihi lhamel,

wet olham tä akawon'o

is chik okäjyaj ihi t'at.

₂₉Is chik len'äfwlhi ihi otayhfwas.

Is chik len'äfwlhi hätet iwoye lew'uy tä taw'uyhi

wet hip'o'pe lhamel.

₃₀Oyohipejakwe, “Gracias, Iwuk.”

Owujyenla chik oiyej wichi tä wuj tä lhaihutwek.

₃₁Tsi lham tach'ote hin'o tä p'elitsaj,

wet ifwayhtej iyhäj tä itiyej letes.