Lhaka Dios ipuleye
1Iwuk, isit'ak õ'wujyen n'ohen.
Mat am is chik õ'aiwujyen
tä ahäpe Dios tä lehumnhayaj nittäya
wet nileyayej laka wichi.
2Isit'a tä wichi tä w'enha lhamejen yok:
“¿Chip ihitso Israel laka Dios?”
3Lhaka Dios ipuleye,
wet lham yenlhi m'ak tä t'uhläk iwoye.
4Wichi tä w'enha lhamejen
yen häpeya laka dios oro lhäy'e plata,
häp m'ak tä takwey lhenhay t'at.
5Lak'aj ihi, mat ihanhiyejt'ak yämlhi.
Tatelhoy ihi, mat hiw'enhichet'a honhat.
6Lech'otey ihi, mat iläthichet'a honhat.
Lenhus ihi, mat iläthichet'a lenij m'ak chik häpe.
7Takweyey ihi, mat ihanhiyejt'ak
tachumeje m'ak chik häpe.
Takäläy ihi, mat ihanhiyejt'ak yik,
wet lepak ihihit'a.
8Wet häp lhamel tä yenwethä,
lhäy'e nilhokej lhamel tä t'ekhaye,
hätet iwoye lecheyälistso.
Is chik matche tä wichi t'ekhaye Lhawuk
9Israel lhayis, ekhayaye Lhawuk.
Lham tach'ot n'amehen wet t'u n'amehen.
10Sacerdotes, ekhayaye Lhawuk.
Lham tach'ot n'amehen wet t'u n'amehen.
11Nilhokej amel tä lewujyenay Lhawuk,
ekhayaye Lhawuk.
Lham tach'ot n'amehen wet t'u n'amehen.
12Lhawuk nitichun lhach'oye
wet takäpfwayhiyeja n'amehen m'ak tä is.
Takäpfwayhiyejela m'ak tä is häp Israel lhayis,
lhäy'e sacerdotes.
13Takäpfwayhiyejela m'ak tä is
häp wichi tä len'ohyajay ihi
lhäy'e iyhäj tä laj len'ohyaja
tä lhamel iwujyen häp Lhawuk.
14¡Is chik Lhawuk yäm wujpey ales,
pajla'tha nichäte lepes lheley!
15¡Is chik Lhawuk tä lhenek pule lhäy'e honhat
hiw'en amhohen lakäpfwayaj tä is!
16Pule lewuk t'at Lhawuk,
wet hiw'enho wichi häp honhat.
17Häp lhamel tä pajche y'inhen wet tiyäjo n'ot'ilek,
ihanhiyejt'a iwoyneje yämthilek iwunit häp Lhawuk.
18Mat häp n'amel lepes ihichet'ala
tä y'awunit t'at häp Lhawuk.
¡Lewujyaj ihi Lhawuk!
