Salmo|Sal 135

_1-2¡Lewujyaj ihi Lhawuk!

Wujyenay Lhawuk, häp amel tä ahäpehen lakawos,

wunitay tä lheyayhi lhaka Dios Lew'et.

₃Wunitay Lhawuk tsi lechowej ihi.

Wunitej atenkay tsi hap'altsentsaj,

₄wet tatshupiye Israel

yämthilek häpe t'at lakäywet.

₅Olham ohanej tä n'amel Lhawuk lewujyaj ihi,

inu'pe nilhokej dios lhayis.

₆Nilhokej m'ak tä Lhawuk ihuminche,

yenlhi tä ipuleye lhäy'e tä ihonhatena,

lhäy'e tä ihi lewomekitas tä pitos.

₇Ineyhatphä pules tä tälhe honhat lepes,

wet ne'tek iche lep lhayis

yämthilek wichi ihanej tä iwomlahchä,

wet itälhthomche yafwthitas

häp lew'etes tä ihiche.

₈Lham ne'tek ángel ilänhen p'ante

häp Egipto lheley chunkatshay

lhäy'e leläy leles tä lechunkatshay.

₉Wet itayhtejlä rey lhäy'e leniyatfwas

häp letetnhay tä äyteschehen

tä ihi Egipto tä lhamya.

₁₀Lham ilän p'ante wujpey wichi tä i'pe honhat,

wet isoyej lew'atshancheyaj

häp reyes tä takhajayhen,

₁₁häp Sehón, Amorreo lhayis kaniyat,

lhäy'e Og, häp rey tä ihi Basán,

lhäy'e nilhokej reyes tä ihi Canaán,

₁₂wet hiw'enho laka honhates

häp lham laka wichi Israel,

yämthilek lhayen lewuhuya.

₁₃Iwuk, ahäpe n'ilataj,

wet lepes ihichet'ala

tä wichi ayenpej tichunhayaja.

₁₄Lhawuk tach'ote laka wichi

wet hip'altsen lakawos.

₁₅Wichi tä w'enha lhamejen

yen häpeya laka dios oro lhäy'e plata,

häp m'ak tä takwey lhenhay t'at.

₁₆Lak'aj ihi, mat ihanhiyejt'ak yämlhi.

Tatelhoy ihi, mat hiw'enhichet'a honhat.

₁₇Lech'otey ihi, mat iläthichet'a honhat,

wet lew'atshancheyaj ihihit'a.

₁₈Wet häp lhamel tä yenwethä,

lhäy'e nilhokej lhamel tä t'ekhaye,

hätet iwoye lecheyälistso.

₁₉Israel lhayis, wujyenay Lhawuk.

Häte amel sacerdotes, wujyenay Lhawuk.

₂₀Amel tä ahäpehen Leví lhayis,

wujyenay Lhawuk.

Nilhokej amel tä lehuminay Lhawuk

wet lewoyaye lhämtes,

wujyenay häp lham.

₂₁Tä lheyayhi Sión,

wujyenay Lhawuk tä ihi Jerusalén.

¡Lewujyaj ihi Lhawuk!