Salmo|Sal 144

₁Lewujyaj ihi Lhawuk tä häpe oletnhawet.

Lham tä ichufwenn'o

yämthilek otkhajay tä owo oka'tshayaja.

₂Lham häpe och'otfwa tä t'u n'oye

wet äp nileya n'oyej.

Häpe ow'et tä atojphä tä oihi

tä oweskatch'oye otayhfwas.

Häpe Ofwayhthi wet oisej tä olhaifwamthi,

wet lham tä itichufwi okhajyhayaj nilhokej wichi.

₃Iwuk, ¿chipte tä lhen atichunhayaja hin'o?

¿Atsi m'ak tä häpe? Tsi hin'o t'at,

¿wet chipte tä ka'ena w'et m'ayeka?

₄Hätet iwoyek n'oyalh t'at,

wet ifwalas tä lew'atshancheyaj

yik t'at, hätet iwoye hupel.

₅Iwuk, ch'esajche aka pules wet nuhchä.

Tijtej akwey häp chenhas

yämthilek tutsaj tälho.

₆Thattshi hach'ähal

tä häpe lep lhayis,

wet okwes atayhfwas

yämthilek inukwe alhoho.

₇Piyen akwey tä lhe puleye,

wet fwayhat n'oyej inät lhayis tä takhajayhen.

Fwayhat n'oyej wichi tä w'enha lhamejen,

₈häp wichi tä lhämtes kamatachehen,

wet fwetaj is alhoho tä hit'untejche

lhämet tä kamatache m'ak at chik häpe.

₉Dios, otenla otenek tä nech'ayek tä oaiwujyen.

Owohla lechosayej arpa wet ot'ichoyhilhila.

₁₀Tsi letach'ote reyes

wet lefwayhatn'o tä ohäpe akawo David.

₁₁Fwayhat n'oyej n'ofwajnhat tä y'uy,

fwayhat n'oyej lakhajyhayaj

häp wichi tä w'enha lhamej,

häp lhamel tä lhämtes kamatachehen,

wet fwetaj is at alhoho tä hit'untejche

lhämet tä kamatache m'ak at chik häpe.

₁₂N'amel lhales lhaichihelthen t'at,

hätet iwoye n'okäs.

Wet lhales tsinhay hätet iwoye

niyat lewukwe kach'utey.

₁₃N'amel lhakapuchehis tapokwe,

nilhokej m'ayhay tä n'olhäk tä ihiche,

wet lhaläy lhäy'epej lhip

tä ihiche lhaka honhates.

₁₄Lhaläy w'asetas hich'otshanhen,

wet lewit'äy ihihit'a leles.

Wet ihichet'a m'ak chik n'ailhaklithen

tä y'ehi lhaw'et.

₁₅Wichi chik nilhokej tähestso iyej,

letamsekis ihi t'at.

Wichi chik yen lewuka Lhawuk Dios,

letamsekis ihi t'at.