Lhawuk lhenhay iwunit t'at häp lham
1¡Lewujyaj ihi Lhawuk!
¡Wujyenay Lhawuk,
amel tä lheyay puleye!
¡Wujyenay Lhawuk,
amel tä lheyay kaphä!
2¡Nilhok amel ángeles,
wujyenay Lhawuk!
¡Nifwotaj tä lheyay puleye,
wujyenay Lhawuk!
3¡Ifwala lhäy'e iwel'a,
wujyenay Lhawuk!
¡Katetsel tä isiche,
wujyenay Lhawuk!
4¡Pule tä atojphä,
wujyen Lhawuk!
¡Inät tä lhe'pe pule,
wujyen Lhawuk!
5Wujyenay Lhawuk lhey,
tsi lham ne'tek iche m'ayhay
wet iche t'at.
6Lham yenlhi m'ayhay wet ichehen t'at
yämthilek tiyäj'attsiy, tatäyhit'ala,
wet iwoyeje lhämet tä häpe ley
yämthilek elhpej lhenek,
m'ak tä häpe häpe t'at.
7¡Nilhok m'ayhay tä i'pe honhat,
wujyenay häp Lhawuk!
¡M'akitas tä lewomekitaj lheley,
lhäy'e inät tä pitoj,
wujyenay häp Lhawuk!
8¡Pelhay tä talepi lhäy'e kalatu,
fwiy'et lhäy'e pule tutsaj,
wujyenay häp Lhawuk!
¡Yafwthitaj tä äytaji
tä iwoye Lhawuk lhämet,
wujyenay häp Lhawuk!
9¡Chenhas lhäy'e tayhi,
lhäy'e hal'äy tä iwo lhaya,
wujyenay häp Lhawuk!
10¡Itshätäy tä n'oläy
lhäy'e iyhäj tä ihi tayhi,
wujyenay häp Lhawuk!
¡Afwenchey lhäy'e amlhäs,
wujyenay häp Lhawuk!
11¡Reyes tä i'pe honhat
lhäy'e nilhokej wichil,
wujyenay häp Lhawuk!
¡Nilhok niyatey lhäy'e hin'ol tä lhamenya,
wujyenay häp Lhawuk!
12¡Thänhäy lhäy'e nä'tshas,
mamses lhäy'e lhutshay,
wujyenay häp Lhawuk!
13¡Nilhokej wujyenay häp Lhawuk lhey,
tsi tajlhamat lham tä lewujyaj ihi
wet pule lhäy'e honhat laka Niyat t'at!
14Lham hiw'enho lakhajyhayaj häp laka wichi.
¡Nilhokej amel tä ahäpehen laka wichi,
häp Israel lhayis tä alehumnhay, wujyenay!
¡Lewujyaj ihi Lhawuk!
