Õ'wunit Lhawuk tä takhajay lhäy'e tä hap'altsentsaj
1¡Lewujyaj ihi Lhawuk!
Matche tä is tä oten otenkay
tä owunit lhaka Dios.
Matche tä wichi ihuminche,
wet äp t'uhawetej t'at häp lham.
2Lhawuk inech'aynhi Jerusalén,
wet inachaj Israel lhayis
tä ihi honhat tä kalew'eta.
3Ichesthen wichi tä lehusey lefwitajayaj ihiche,
wet itiyej kanhi m'ak tä ilän letichunhayajay.
4Ihanej t'at chihätefwas katetsel tä iche,
wet iwo lheya elh tefwajpejni.
5Ihichet'a m'ak chik w'awulhi Lhawuk,
wet äp wuj lakhajyhayaj
wet lepes ihichet'a lehanyaj.
6Ineyhatphä wichi tä w'et m'ayhayhas t'at,
wet yen w'et m'ayeka häp lhamel tä ni'isa.
7Wo lechosayej arpa wet ten atenkay
tä lewo graciasayej Lhawuk Dios.
8Tä lham yok, “Is chik pule näm”,
wet näm t'at yämthilek inät nitsäype honhat,
wet lham t'at tä ne'tek
hup tälhes i'pe chenhas.
9Hiw'enho lhäk häp itshätäy
lhäy'e tsetwos leles tä nichuyuhen.
10Häpkhit'a yel'atas lakhajyhayaj
lhäy'e hin'o lakhajyhayaj
chik Lhawuk akäjejlhi.
11M'ak tä Lhawuk wuj tä akäjejlhi
häpe t'at wichi tä ihumin häp lham,
wet iwoye lhämtes,
wet t'ekhaye tä Dios wuj tä ihumnhen lhamel.
12Jerusalén, wujyen häp Lhawuk.
Sión, wujyen aka Dios.
13Lham yäm t'unhiche awukwey lepechal,
wet takäpfwaye ales tä ihi aka hupuy.
14Ichäje letamsek aka honhat,
wet yäm wuj aka yachuyaj
tä lhäy'e lhip tä is.
15Ichen honhatena häp lhämet,
wet yofwajkwet nichäte
nilhokej honhat lhipey.
16Yenlhi fwiy'et,
hätet iwoye tson'ataj w'ole,
wet nitsäype honhat hätet iwoye holo.
17Itsäy honhate kalatu tä wus,
wet tä lhäy'e lhip tä techäjche,
inät welan at fwiy'eta.
18Mat häte chik lham yok,
“Is chik wachuhi”,
wet wachuhi t'at.
Ichen yafwthitaj wet inät yik t'at.
19Hiw'enho lhämtes lhäy'e lechufwenyajay
häp laka wichi Israel.
20Mat tek iwoyeje tähestso häp wichi iyhäj,
wet lhamel nitäfwenhiyejt'a Lhawuk lhämtes.
¡Lewujyaj ihi Lhawuk!
