Salmo|Sal 21

₁Iwuk, lakäjyaj ihi niyat

tä am lew'enho lakhajyhayaj.

Lakäjyaj ihi tä letach'ote

wet ikalhi laka'tshayaj.

₂Lew'enho m'ak tä lechowej iwatlä,

tek len'äyejo m'ak tä t'alhej ame.

₃Letachumlä häp lham,

wet wuj akäpfwayajay tä isen tä lew'enho,

wet leti'pe lhetek corona tä oro.

₄T'alhej ame lew'atshancheyaj wet lew'enho t'at,

lew'atshancheyaj tä pitaj wet t'un.

₅Häp tä isej hach'otyaj, wuj lakhajyhayaj.

Matche tä lewujyen wet letiyej len'ohyaj.

₆Letakäpfwayeje m'ak tä is

yämlek tiyäj'attsiy,

wet tä lhewejpej lhäm wuj lakäjyaj.

₇Am, niyat, tek lechätla katsi

tsi lechaye t'at Lhawuk,

let'ekhaye N'owujtaj lehumnhayaj tä nittäya.

₈Akhajyhayaj ilänla nilhokej atayhfwas,

wet afwomkat itäyhthila

iyhäj tä n'äyi amho.

₉Che lenämla che lewo akalelhthayaja,

letech'aynhiyeja lhamel

häp n'onhonthi tä y'uho.

Lhawuk tä lewäk ihi

itäyhthiyeja itäj,

₁₀wet leles nemla ihi honhat

yäk nichäte lepes lheley.

Nofwila t'at wet tatäy.

₁₁Tejlak yenlhi m'ayhay

tä t'uhläk tatay ahilä

yämthilek iti amej awit'äyhyaj,

mat tek ihanhiyeja iwoyneje,

₁₂tsi letiyäjiyela hach'ähal wet yikhen.

₁₃¡Awujyenej akhajyhayaj, Iwuk!

¡Olhamel ochoyhlawethä,

oaiwunthila tä lekalhi aka'tshayaj!