Ot'änyaj tä olhakli, lhäy'e otenek tä owunit Dios
1Ika Dios, ika Dios,
¿chipte tä lewomn'o?
¿Chipte tä kahoya n'oye
yämthilek lefwayhatn'o?
¿Chipte tä katach'ahuya n'oye
tä ot'än hach'oye?
2Ika Dios, ot'än hach'oye
tä ifwala lhäy'e tä honatsi,
mat tek lechulh n'oho.
Lepes ihichet'a tä olhaip'altsen ame.
3Mat ahäpe Niyat tä N'ot'amajchet,
wet Israel lhayis aiwujyen t'at.
4Olhamel ojchalis t'ekha p'ante ame,
wet lefwayhthen t'at.
5Lhamel t'än hach'oye wet letiyej lefwayhyaj,
icha ame wet letihiyejt'a akanyaj lhamel.
6Matkat olham ohäpkhit'a hin'o,
ohäpe iwos t'at,
wet wichi t'ischeyek,
lhamel yenn'o w'et m'ayeka.
7Wichi tä hiw'enn'o iläkwlhin'o,
ipiyenlhit n'oyej lepästey
wet ilanwethä lhethey
8wet yok:
“Lham ichaye Lhawuk, is chik ilanhi.
Tä ihumin, is chik ifwayhat.”
9Mat am tä letälhet p'ante n'oho oko kachowej
wet tä ihäläkwlhin'o, let'u n'oye.
10Tälhe tä kamaj n'am chätchä
tä let'amaj n'oyej,
wet tä otälho oko kachowej
ahäpe t'at oka Dios.
11Yej aletonte n'ohlä,
tsi tott'a n'oye olhakli
wet newache elh chik tach'ot n'oye.
12Oihit lechowej otayhfwas,
hätet iwoye w'asetas tä fwitses tä ihi Basán,
13hätet iwoye t'owalhas tä y'iphen,
hich'enhiche lak'as tä inu n'oye.
14Omälhyet iwoye inät tä nitsäy,
olhiley tan'aj'atwek,
ohusek mälhyet akäyek lhus tä wachuhi.
15Ok'aj tamchäy
wet ok'ajlhich'u satej ok'ajch'o.
Leti n'ohi ot'ilek lemok.
16Oihit lechowej häp hin'ol
tä niwoya lep'altsenyaja,
hätet iwoye asinhäs
wet itoynej lefwus t'ähes
otkwech'ol lhäy'e opach'ol.
17Ow'en t'at olhiley,
wet otayhfwas ilehiyejt'a tä iyahinn'o.
18Hiw'en lhamhomche ow'uyis,
wet ikoyejpe suerte häp ow'uy tä n'oyik.
19Mat am, Iwuk, ¡yej aletonte n'ohlä!
Tä ahäpe okhajyhayaj,
¡ho n'oye'thahya wet ch'ot n'oye!
20¡Fwayhat n'oyej hin'ol lefwajnhates!
¡Yej wahin n'oyej chik ilänn'o häp asinhästso!
21¡Fwayhat n'oyej t'owalhastso lak'as!
¡Fwayhat n'oyej w'asetastso lech'ul!
22Oayenla silätyajayej opuhfwas,
wet oaiwunthila chik oiyej ales chik lhaihutwek.
23¡Wunitay häp Lhawuk,
amel tä lehuminay wet lewoyaye lhämet!
¡Amel tä Jacob leles tä lepes lheley,
tiyayej lewujyaj!
¡Amel tä Israel leles tä lepes lheley,
n'okwiyayej!
24Tsi lham tek yen w'et m'ayeka wok nitetshana
wichi tä p'elitses leteläythayajay,
mat ihoye t'at lhamel wet tach'ahuye
chik t'alheje lech'otyaj.
25Chik oiyej aka wichi tä wuj chik lhaihutwek,
oaiwunthila tä ha'isyaj ihi.
Chik oiyej lhamel tä aihumin wet iwoye ämtes,
oyämla matche olhämet tä pajche ofwel amho.
26Wichi tä p'elitses t'ekhihena yäk yipsen.
Lhamel tä t'ukwe Lhawuk iwunthila häp lham.
¡Is chik pitaj lhamel lew'atshancheyaj!
27Nilhokej wichi tä lhämtes w'enhache lhamej
tä ihiche laka honhates,
lhamel yenla tichunhayaja Lhawuk wet ihohiyela.
Itihihila honhat lakamchetey wet n'okwihiyeja,
28tsi Lhawuk häpe Niyat
wet äp wichi Lewuk.
29Nilhokej lhamel tä hiw'en m'ayek
t'upeyhiyejahchä tä ihi tä itayche.
Häte lhamel tä yäpnhihola honhat
tä nem lew'atshancheyaj ihi,
n'okwihiyeja t'at.
30Oles yenla Lewuka,
wet yenla lhämeta nilhokej ifwalas tä iläy.
31Ifwenhihola leles tä lepes lheley
häp Lhawuk le'isyaj
lhäy'e lechumtes tä iwoye.
