Salmo|Sal 25

₁Iwuk, oneyhatphä amej ohusek.

₂Ika Dios, ochayaj ihi amej.

Yej wahnej chik wichi hin'äfwlhatn'o.

Isit'ak otayhfwas t'ischey n'oyej.

₃Is chik len'äfwlhi newayej

elh chik häpe häp wichi tä icha ame,

mat n'äfwelhen lhamel tä niwoya

m'ak chik tamenej tä tatay ahilä.

₄Iwuk, päyen n'oye han'äyhäy,

chufwen n'oyej häpkhilek onukwehen.

₅Hän n'okwe m'ak tä matche

tä tälh ame wet chufwen n'oyej.

Tsi ahäpe oka Dios wet Ofwayhthi,

lajit whäya tä ot'ekha ame.

₆Iwuk, tichunche hap'altsenyaj

lhäy'e ahumnhayaj tä nittäya

tä pajchey tä leti n'oyejen.

₇Yej lhen atichunhayaja och'isukyajay

lhäy'e m'ak tä ni'isa tä owoye tä omamse.

Iwuk, tichun och'oye,

häp tä isej ahumnhayaj tä nittäya

lhäy'e hap'altsenyaj.

₈Hap'altsentsaj häp Lhawuk wet is alhoho.

Häp tä tamenej tä ichufwenej

wichi tä lech'isukyaj ihi

häp m'ak tä is chik iwoye.

₉Ihänche lham len'äyij

häp iyhäj tä lhaknichäjawethä,

wet ipäyne lhamel häp m'ak tä is alhoho.

₁₀Lhamyaj t'at Lhawuk t'ifwtihyaj

lhäy'e lehumnhayaj tä nittäya

tä itiyejpej häp lhamel

tä t'ifwtiyej lham wet iwoye lhämtes.

₁₁Iwuk, wuj m'ak tä ni'isa tä in'oyej.

Tä ahäpe elh tä is, täyhat otes.

₁₂Häp hin'o tä ihumin Lhawuk,

lham Dios ipäyne t'at n'äyij

tä is chik inukwe.

₁₃Is m'ak tä iyej wet letamsek ihi,

wet Lhawuk hiw'enho leles tä lepes lheley

häp honhat tä lewuhuy.

₁₄Lhawuk itiyej t'at lehumnhayaj

häp wichi tä iwujyen wet iwoye lhämtes.

Lham itäfwnhatejen lhämtes tä lehumnhayaj ihi

tä hit'unteji m'ak tä iwoyeje lhamel.

₁₅Ottey ilehthiyejt'a häp Lhawuk,

tsi lham tä ifwayhat n'oyej

nilhokej owit'äyhyajay.

₁₆Iwuk, yahinn'o, p'altsenn'o,

tsi ots'ilak t'at wet wuj tä onlhak'alhi.

₁₇Lhäy'epej lhip, lhäy'epej lhip ohusek lhakli.

Fwayhat n'oyej,

₁₈tetshan ofwitajayajay

lhäy'e oteläythayajay,

wet täyhat nilhokej och'isukyajay.

₁₉Lhek yahinya otayhfwas, wujpey lhamel,

wuj tä fwitses wet n'äyi n'oho.

₂₀¡Un'oye, fwayhatn'o!

Yej wahnej chik wichi hin'äfwlhatn'o,

tsi am t'at tä olethan ame.

₂₁Is chik t'amaj n'oyej o'isyaj

lhäy'e tä otes newa ahilä,

tsi am t'at tä ot'ekha ame.

₂₂Dios, fwayhtej Israel lhayis

nilhokej lelhaklis.