Salmo|Sal 33

₁¡Fwitsenayej achoslis

wet akäsyenejwethä häp Lhawuk,

amel tä lewoye lhämtes!

Tsi lhäy'e lhip tä isilataj

tä wichi tä isen iwunit Lhawuk.

₂Wo graciasayej Lhawuk,

wo lechosayej arpa wet ten atenkay.

₃Ten atenek tä nech'ayek,

fwitsenayej achoslis

wet enlhi música tä isilataj.

₄Lhawuk lhämet häpe m'ak tä matche,

wet nilhokej lechumtes tä yenlhi

hin'älit t'at tä häpe elh

tä nileyayej laka wichi.

₅Ihumin hin'o tä is wet is alhoho,

wet lehumnhayaj tä nittäya tapoyejej honhat.

₆Tä yenlhi pule lhäy'e m'ayhay tä ihi,

lhämet t'at tä yenejlhi,

lhäy'e leyalh tä tälhche lak'aj.

₇Ihutwek inät tä ihi lewomekitaj wet t'amajej.

₈Nilhokej m'ayhay tä ihi honhat,

huminay Lhawuk wet woyaye lhämtes.

Nilhokej wichi tä lheyayhi honhat,

ch'ahuyaye.

₉Tsi tä lham tahuy,

iche nilhokej m'ayhay,

wet tä ne'tek t'un lhenhay,

häpe t'at m'ak tä t'un.

₁₀Imälhewek tä Lhawuk ni'isyena alhoho

m'ak tä wichi tä kahäpeya laka wichi t'uhläk iwoye.

₁₁Mat häp m'ak tä Lhawuk t'uhläk iwoye,

tatäyhit'a yämthilek tiyäj'attsiy.

₁₂Lhawuk lakäpfwayaj tä is

iyej wichi tä yen häpeya laka Dios häp lham,

häp wichi tä lham tatshupiye

yämthilek häpe laka wichi.

₁₃Lhawuk iyahinchä tä ipuleye,

wet hiw'en nilhokej wichi.

₁₄Tä ihi lhip tä lham Lew'et,

itetshan t'at wichi tä ihonhatena.

₁₅Lham t'at tä lhenek hin'o lehusek,

wet iyahin t'at m'ak tä iwoye.

₁₆Niyatey lefwayhyaj tälhiyet'a laka nifwotas,

wet sip'äl lefwayhyaj tälhiyet'a lakhajyhayaj tä iyej.

₁₇Yel'atas, tej tä takhajayhen,

mat nehit katsik isej wet lefwayhyaj iyej.

₁₈Mat häp Lhawuk t'uye t'at wichi tä ihumin

wet t'ekhaye tä lham wuj tä ihumnhen lhamel,

₁₉yämthilek ifwayhtej t'ilek

wet hiw'enho lhäk che nehläs iche honhat.

₂₀Y'at'ekhaye Lhawuk,

lham tach'ot n'amehen wet t'u n'amehen.

₂₁Lhahusey akäsejwethä häp lham,

wet y'at'ekhaye lhey tä t'amajchet.

₂₂Tä olhamel oti amej oniwhayaj, Iwuk,

is che ahumnhayaj tä nittäya in'oyejen.