David iwunit Lhawuk tsi le'isyaj ihi
Tä David yikch'oye p'ante Abimelec, häp tä yenlhi letenekna. David lhayen welana, wet häp tä Abimelec yokwesphä wet yik.
1Owunthila Lhawuk nilhokej ifwalas.
Olehiyejt'ala tä otiyej lewujyaj.
2Ohusek akäjejlhi häp Lhawuk.
Amel tä laj han'ohyaja,
ch'ahuyaye wet enay akäjyaja.
3N'alhaip'ajtitwek tä y'awujyen Lhawuk wet y'an'okwiyej.
4Tä ohoye Lhawuk, tach'ahu n'oye
wet iso n'oyej nilhok onowayhyajay.
5Isi iyejen t'at häp wichi tä iyahin Lhawuk,
wet nehichet ifwalak yohlak:
“Lhawuk ikan n'oyejen.”
6Lhawuk tach'ahuye t'at
elh tä lelhakli ihi tä t'änch'oye,
wet isoyej nilhok lefwitajayajay.
7Lhawuk laka ángel yikhit'ach'oye
tä t'uyehen wet ifwayhthen
häp lhamel tä ihumin Lhawuk wet iwoye lhämtes.
8Elhtaye, lew'enayhla
tä matche tä hap'altsentsaj Lhawuk,
wet lakäpfwayaj tä is iyej t'at
häp elh tä ilethane.
9Huminay Lhawuk wet woyaye lhämtes,
amel tä ahäpehen laka wichi,
tsi niwohit m'ak chik tatäyej
häp lhamel tä iwoye lhämet.
10T'owalhas nichuyuhen t'at wet iwatlä lhäk,
mat häp wichi tä tach'ahuye Lhawuk
tek wo m'ak chik tatäyej.
11Lhuyay, yaiyhäj, ch'ahuyay n'oye,
ochufwenla amejen yämthilek
lehuminay Lhawuk wet lewoyaye lhämtes.
12¿Hä let'uhläk pitaj haw'atshancheyaj?
¿Hä let'uhläk akäjyaj ihi tä lhe'pe honhat?
13Chik mälhyejtso, leyej ämtes tä ni'isachehen
wet yej w'et lhämlhi.
14Atontehlä m'ak tä ni'isa
wet woye m'ak tä is.
Ukwe atamsek wet yej leyej.
15Lhawuk t'uye wichi tä isen
wet tach'ahuye t'alhyajay,
16mat tatayhlä iyhäj tä iwoye m'ak tä ni'isa,
häpkhilek nehit katsik nitichunpejch'oye lhamel
chik ileyejen honhat.
17Tä wichi tä isen t'änch'oye Lhawuk,
lham tach'ahuye t'at
wet isoyej nilhok lefwitajayajay.
18Häp wichi tä lehusey nitkhajaya
wet wuj tä nilhak'al lhamche,
Lhawuk tek atofwehlä lhamel wet ifwayhthen.
19Häp hin'o tä is alhoho
wujpe m'ayhay tä ni'isachehen tä nichätepej,
mat Lhawuk ifwayhtej nilhokej.
20T'uye nilhokej lhiley
wet niwohit elh chik ichähla.
21Hin'o tä ni'isa ilän lhamej
m'ak tä iwoye wet y'inhila,
wet wichi tä n'äyiho hin'o tä is alhoho
Lhawuk itasnhila lhamel.
22Mat ifwayhthen lham lakawos,
tek itihiyeja letasnhayaj
häp wichi tä ichaye häp lham.
