N'otenek tä õ'wuntej niyat tä tawhayey
1Olhämtes tä isen nitsäyphä tä tälho ohusek.
Ok'ajlhich'u hätet iwoye hin'o tä lehusek ihi laka pluma tä ilesayen m'ayhay.
Otshupyeneje häp niyat otenekna, wet oyok:
2Ahäpe elh tä wuj tä isilataj tä lhewej wichi.
Ämtes tä tälhche ayhi häpe t'at hap'altsenyaj.
Häp tä tamenej tä Dios takäpfway ame yämlek tiyäj'attsiy.
3Tä ahäpe hin'o tä takhajay,
uyit ame afwajnhat
wet ti amej awujyaj tä lhäy'e lhip tä isilataj.
4Ahäpe niyat tä lewujyaj ihi.
¡Wo haw'uteya, tiyäjche han'äyij
wet kalhipej aka'tshayaj!
Wo äkleyhyaja'pe häp m'ak tä matche
lhäy'e tä letach'ote wichi tä p'elitses.
Akwey tä afwomkat yenhilhila
m'ayhay tä lhäy'e lhip tä isen.
5Hach'ähal wuj tä itselhäs
wet tiyäjomche atayhfwas,
wet wichi nichätwhäye apach'ol.
6Dios, Aniyatyaj t'un yämlek tiyäj'attsiy,
wet m'ak tä lhamya tä ische alhoho,
häp tä Aniyatyaj lakeyis.
7Lehumin m'ak tä is,
wet len'äyiho m'ak tä ni'isa.
Häp tä tamenej tä Dios tatshupi ame,
lham tä häpe aka Dios,
wet itsäy atape akäjyaj tä inu'pe aniyatfwas.
8Nilhokej haw'uyis tä mirra lenij tälho,
lhäy'e áloe lenij, lhäy'e canela lenij, wuj tä akäjche,
wet lehuminche música
tä lhehiche niyatey lewukwey tä isis.
9Niyatey leles tsinhay i'amej tä ihi aniyatyaj,
wet niyat tsinha tä lhehiyeja
ihi t'at lhip tä afwomkat,
wet õ'silatyenej oro tä lhäy'e lhip tä isilataj.
10Yäse, am tä lhehiyeja niyat,
ch'ahu n'oye, tetshan m'ak tä ofwel amho.
Oyok, yej lhen alhakliya apuhfwas
lhäy'e aka wichi,
11tsi niyat ihumin asilatyaj,
wet lham häpe t'at awuk.
Is che lewoye lhämet.
12Wichi tälhiyela aka honhat tä Tiro
wet ichäjla ame awayhtes.
Lhamel tä hiw'en m'ayek
t'uhlahläk letach'otehen.
13-14¡Lhek yahinya, näm niyat tsinha,
wuj tä isilataj!
Lew'uy tä õ'silatyenej oro,
häp tä taw'uyhi tä õ'häne niyat.
Wet häp atsinhay tä iyej tä ihi leniyatyaj,
häp tä yikche,
15wet lakäjyaj ihi tä yikhen
wet tiyäjo niyat lew'et.
16Ika niyat, ales ihihila
häp achätilis p'ante leniyatyaj,
wet lew'enhihola len'ohyaj
yämthilek niyatejen
mälhewek honhat tä lhamel lew'et.
17Ofwenhihola wichi yämthilek
nileyayej tä nitichun amche,
lhäy'e leles tä nekche len'äyij,
wet nilhokej wichi aiwunthila yämlek tiyäj'attsiy.
