M'ak tä Dios iwoyeje p'ante laka wichi tä ichun
1-2Dios, olhamel oläte m'ak tä lewoyeje p'ante ochätilis
häp ifwalas tä tajyämetso.
Ojchalis ifwel n'ohohen
tä letiyej p'ante kanhi
wichi tä kahäpeya aka wichi,
häp tä isej akhajyhayaj tä wuj,
wet letiyej atasnhayaj,
wet lew'enho laka honhates häp ochätilis p'ante.
3Häpkhit'a lhamel takweyey wok lefwajnhates
chik tamenej tä ikalhi laka'tshayaj.
Häpkhit'a lhamel tä ikalhi honhat,
mat isej t'at am akhajyhayaj,
lhäy'e tä len'ältej tä lhewej t'at lhamel,
tsi lehumnhen t'at.
Oisej Dios
4Ahäpe oka Niyat wet oka Dios.
Am letach'ote aka wichi Israel
wet ikalhipej laka'tshayaj.
5Olhamel ois amej wet okalhipej otayhfwas.
Häp tä isej ey op'ajtitchä
lhamel tä inu n'oyehen.
6Ot'ekhahiyet'a olutsej lhäy'e ofwajnhat,
tsi häpkhit'ak tamenej chik okalhi oka'tshayaj.
7Mat am t'at tä lefwayhat n'oyejen otayhfwas,
wet len'äfwlhat wichi tä n'äyi n'ohomche.
8Olhamel olehiyejt'a tä okäswethä amej, Dios,
wet on'okwihipeja amej yämlek tiyäj'attsiy.
Wichi y'ulhan m'ak tä Dios iwoyeje
9Matkat athana nemhit lewatlä olhamel,
letach'anlhaye t'at wichi tä hin'äfwlhatwethä olhamel,
wet nemhit lhekche olhamel oka nifwotaj.
10Lekhajyen otayhfwas wet yokwes olhamel,
wet wichi tä n'äyiho olhamel
t'etane m'ak tä olewuk wet ichäj.
11Tä lewahin n'oyejen lhamel,
ohätet iwoye tson'atas
tä õ'häne lew'et tä õ'länhen.
Wet letsatkatpe honhat häp olhamel,
wet olhayej t'at wichi tä kahäpeya aka wichi.
12Lhimphaj laha tä let'alhpe aka wichi tä lewom,
wet niwohit m'ak chik lekalhihlä.
13Lhen n'oyehen wichi leläkwik.
Lhamel tä laka honhates iwhäye olhamel oka honhat
t'ischey n'oyejen wet hin'äfwlhatwethä olhamel.
14Wichi tä kahäpeya aka wichi
yäm n'oyehen wet ilanwethä lhethey,
wet wuj tä iti n'oyejen leläkwyhanyaj.
15-16Nilhok lewhäy w'et om'ayek t'at,
wuj tä on'äfwlhi ihi
tä otayhfwa t'änpej n'o'pe
wet iläkwlhin'o tä tawäkwäylhi lahayej.
17Häp olhamel owit'äyhyajtso
häpkhit'a chik olhamel op'ethat ahilä chik tamenej.
Olhamel owoye t'at ämet,
18olehit'a amej wet oyikhit'ach'oye
han'äyij tä onukwe.
19Matkat lep'ajtit katsi olhamel,
wet tet iwoyek oihi honhat
tä itshätäy tä fwitses lew'et,
wet leti n'ohihen honatsi tä wuj tä ni'isa.
20Dios, chik olhamel op'etthi ahilä,
wet on'okwihiyejn'e dios tä w'enha lhamej,
21pajichen'e lehanej,
tsi niwohit m'ak chik õ'hanej chik õ'iskat amho.
22Mat tä ohäpehen iyhäj tä aihänlhi,
oihi tä ot'ilek itayche nilhokej ifwalas.
Õ'tech'ayen at n'oyejen
tson'ataspej õ'häne lew'et tä õ'länhen.
Ot'alhe Dios lech'otyaj
23¡Yahinphä, Iwuk! ¿Chipte tä lemä?
¡Yahinphä! ¡Yej le n'oyejen!
24¿Chipte tä leweskatlä olhamel?
¿Chipte tä lep'ethatlä olhamel
tä wuj tä oteläythayaj in'oyejen?
25Ow'et m'ayhayhas t'at, onchätche katsi
wet ohanhiyejt'a chik olhaineyhatchephä.
26¡Nephä! ¡Lhu ch'ot n'oyehen wet fwayhat n'ohen,
häp tä isej ahumnhayaj tä nittäya!
