Salmo|Sal 51

₁Dios, p'altsenn'o,

häp tä isej ahumnhayaj tä nittäya.

Tä ahäpe elh tä wuj tä hap'altsentsaj,

täyhat otes.

₂Lej n'oyej m'ak tä ni'isa,

so n'oyej osukyaj.

₃Ohan lhamej tä otes ihi ahilä,

wet tatäyhit'a tä oyenpej tichunhayaja osukyaj.

₄Tä owo osukyaja,

am t'at tä ottayej ahilä

wet owoye häp m'ak tä let'ulhan.

Tä mälhyejtso, tä lhok, “Ates ihi”,

is alhoho akalelhthayaj tä leti n'oyej.

₅Matche, tälhe tä nech'e oiche

ohäpe t'at elh tä ni'isa.

Osukyaj ihi tälhe tä oihi oko kachowej.

₆Mat lehumin t'at elh tä matche tä niskata m'ak tä ihi lehusek,

wet lechufwen ohusek yämthilek ohan m'akej.

₇Lejej n'okwe ahumnhayaj

wet nofwila och'ohle,

häpkhilek omälhyej iwoye

m'ak tä lhäy'e lhip tä ipelaj.

₈Nofwatphä ofwitajayaj.

Tej tä letinaj n'oyej olhakli,

mat nachaj n'oye okäjyaj.

₉Yej tetshan osukyajay,

mat täyhat n'oyej nilhok m'ak tä ni'isachehen tä owoye.

₁₀Dios, käpfwayej n'oye

ohusek tä laj lech'ohleya.

W'en n'oho ochowej tä nech'ayek

lhäy'e tä is alhoho.

₁₁Yej tiyejn'o kanhi ahilä,

wet yej so n'oyej aka Espíritu tä Amajchet.

₁₂Nachaj n'oye okäjyaj tä tälho ofwayhyaj,

wet ti n'ohi akäpfwayaj

yämthilek ochowej ihi,

₁₃häpkhilek opäyne han'äyij

häp wichi tä niwoyaye ämtes,

wet iwo lehusey iyhäja.

₁₄Dios Ofwayhthi, so n'oyej

tä ohumin tä olänhen oiyhäj,

wet oyenla oteneka tä ahäpe Dios tä is alhoho.

₁₅Iwuk, w'en n'oho ochos

häpkhilek otchoylhi tä owunit ame.

₁₆Tsi tek lewatlä awayhtes

wok tshätäy tä õ'wunhomche.

Chik olham ow'en amho tähestso,

häpkhit'a m'ak tä lehumin.

₁₇M'ak tä let'uhläk elh yen awayhata

häpe t'at chik lhayachaj ame.

Häp elh tä yen lhakliya

lesukyaj tä iwoye wet lhay'ayhatchä,

häp tä letachumlä, Iwuk Dios.

₁₈Tiyej ahumnhayaj Jerusalén

wet woyeje m'ak tä is.

Achajo tä leneyhatphä

n'olafwek tä tuntey tä ilunej.

₁₉Häpkhilek nech'e letachumlä

tshätäy tä õ'länhen tä õyen n'okhayaja amej,

lhäy'e m'ayhay tä õyen awayhtesa,

lhäy'e tshätäy tä õ'wunhomche tä õ'hän ame.

Wet õ'länhihena w'asetas tä asnakis

häpkhilek õ'ti'pe aka altar.