Salmo|Sal 57

₁Dios, p'altsenn'o,

p'altsenn'o, tsi am tä olethan ame.

Ot'uhläk olethanchufwi afwis

pajla'tha tajyäme owit'äyhyaj.

₂Ot'änlach'oye Dios tä N'owujtaj,

häp lham tä iwoyejpej n'oye

nilhokej m'ak tä oisej.

₃Lham nichulhla n'oho,

ichenla n'oye lehumnhayaj tä nittäya

lhäy'e m'ak tä matche tä tälh puleye,

wet ifwayhthila n'oyej wichi tä fwitses

tä iti n'oyej laka'tshayaj.

₄Oihi lechowej hin'ol tä hätet iwoye t'owalhas tä n'okotses,

letsotey mälhyej iwoye hunis wok n'och'ähal

wet lak'ajlhich'u häpe t'at n'ofwajnhat tä y'uy.

₅¡Dios, awujyaj i'pe pule

wet tapoyej honhat!

₆Otayhfwas iwo t'akanyaja n'oyej

tä t'uhläk onuhat lhamho.

Yenlhi chowej tä ihi on'äyij,

mat lhamel t'at tä nichäte.

₇Dios, owak'alh t'at

yämlek oten otenkay tä oaiwunit.

₈On'omhila, oneyhiphälak nech'e fwamlafwaj,

otchumhiyela oka arpa

häpkhilek oyenlhi música,

₉wet owunthila amej otenkay, Iwuk,

che oiyej wichi tä i'pe honhat.

₁₀Tsi afwtihyaj lhäy'e ahumnhayaj tä nittäya

wuj yäk nichät puleye.

₁₁¡Dios, awujyaj i'pe pule

wet tapoyej honhat!