Dios häp tä t'u n'amehen
Häp rey Saúl t'up'antehläk ilän David, wet ichene hin'ol, ne'tek iyahin t'at lew'et. Wet häp tä David yenlhi letenekna.
1-2Dios, fwayhat n'oyej otayhfwas,
häp lhamel tä iwoye m'ak tä ni'isa
wet inu n'oye tä t'uhläk ilänn'o.
3Tsi lhek yahinya hin'ol tä fwitses
tä ichowalhlhi n'ohlä yämthilek itäyhatn'o.
Iwuk, otes ihihit'a ahilä,
wet owohiyet'a osukyaj che häpe.
4-5Ihichet'a m'ak che ni'isa che owoye,
matkat lhamel nakel n'oye tä inu n'oye.
¡Iwuk Dios tä lajit atumfwaya
tä olhamel Israel lhayis laka Dios,
nephä, lhu ho n'oye wet yahin owit'äyhyaj!
¡Yej lemä, tasin wichi tä kahäpeya aka wichi,
yej p'altsen hin'ol tä iwoye m'ak tä ni'isa
wet näma matche lhämet tä iwoyej n'oyehen!
6Tä honatsi lhamel tapilche alhoho
wet t'änwethä, hätet iwoye asinhäs,
lhamel ilunche t'at hupuy.
7Lakhofwis ihiche t'at lak'as,
wet äyteschehen lhämtes tä iwoye,
hätet iwoye n'ofwajnhates tä y'uyhen,
wet yok, “¡Ihichet'a elh che ilät n'amehen!”
8Matkat am, Iwuk, let'ischeyej lhamel,
leläkwethä nilhokej wichi tä kahäpeya aka wichi.
9Am t'at tä ois amej, Dios tä atkhajay,
tsi am tä lekhajyenn'o wet let'u n'oye.
10Am tä ahumnhayaj nittäya,
lehohla n'oye wet lew'enyenla n'oyej
otayhfwas tä tatäy.
11Iwuk tä let'u n'oyehen,
yej p'altsen lhamel,
häpkhilek oka wichi yenpej tichunhayaja täjtso.
Is che letsatkatpe honhat
häp tä isej akhajyhayaj,
yämthilek matche tä lewit'äy ihi.
12Lhämtes tä iwoye häpe t'at lesukyaj,
w'et yäm'atwethä
wet takäpfwayeje lewit'äyhyaj iyhäj.
¡Is che lhamel t'at tä lewit'äyhyaj ihi,
tä lhaichäjwethä tä mälhyejtso!
13¡Is che awäk ihämtej lhamel,
is che nem ichehen!
¡Is che nilhokej wichi ihanej
tä Dios häpe Jacob leles laka Niyat
yämthilek nichäte lepes honhat!
14-15Tä honatsi lhamel tapilche alhoho
wet t'änwethä, hätet iwoye asinhäs.
Lhamel ilunche t'at hupuy
tä t'ukwe m'ak che tufw.
Tä niwuja lhäk tä nilhoke,
ifwitsenej tä t'änwethä.
16Matkat olham oyenla oteneka akhajyhayaj,
wet tä nech'e fwalapej
oyenla silätyaja ahumnhayaj tä nittäya.
Tsi am tä let'uhte n'oye
tä oho ame tä olhakli ihi.
17Owunthila amej otenkay,
Dios tä atkhajay,
tsi ahäpe oletnhawet
wet letipej n'oyej ahumnhayaj tä nittäya.
