David isej Dios wet niwohit m'ak che tatäyej
David ihi p'ante ts'anis tä Judá, wet häp tä yenlhi letenekna.
1Dios, ahäpe oka Dios.
Olhaimälhetwek tä ot'u amche,
tet iwoyek ochim tä owat ahilä.
Ot'isan nichuyu ahilä,
omälhyet iwoye honhat tä tamchäy,
inät ihihit'a wet niwohit m'ak che iche.
2Ot'uhläk oaiw'en tä lhehi Haw'et tä Amajchet,
yämthilek oyahin akhajyhayaj
lhäy'e awujyaj tä isi.
3Lhäy'e lhip tä is ahumnhayaj tä nittäya,
inu'pe ow'atshancheyaj, wet häp tä oaiwunthila.
4On'okwihila amej nilhokej ifwalas tä oihonhatena
wet opiynhiphäla amej otkweyey che ot'alh ame.
5Wet olham niwohit m'ak che tatäyhla n'oyej,
omälhhiyejat iwoye hin'o tä tuj
m'ak tä akäj wet yipsej.
¡Matche tä okäjyaj ihihila che owunit ame!
6Tä honatsipej tä omä,
olehiyejt'a tä oayen tichunhayaja,
7tsi am ahäpe Och'otfwa
wet otamsek ihi tä oichufwi afwis.
8Wuj tä olhaip'ajtit amej,
wet oihi t'at akwey tä afwomkat
tä letsok n'oyej.
9Mat wichi tä t'uhläk ilänn'o
nichätla lech'oye n'op'itsekw'et.
10Õ'länhiyejena n'ofwajnhates
wet itshätäy tä fwitses tufwihena.
11Mat niyat rey akäjiyejlhila Dios,
wet nilhokej wichi tä iwo lheya
tä hit'untejche lhämet akäslawethä.
Mat häp wichi tä w'et yämwethä
õhp'ohihichela lak'as.
