Salmo|Sal 64

₁Dios, ch'ahu n'oye tä olhakli ihi,

wet amaj n'oyej häpkhilek

nisakana n'oyej otayhfwas tä fwitses.

₂Askat n'ohlä wichi tä ni'isahen,

askat n'ohlä m'ak tä iskathiche

tä t'uhläk iwoyej n'oye.

Fwayhat n'oyej lhamel tä iwo huseya n'o'pe.

₃Lak'ajlhich'u hätet iwoye

n'ofwajnhat tä õyäm y'uy,

wet lhämtes hätet iwoye

n'och'ähis tä n'ot'ilek.

₄Lhaiskatwethä wet iselkat

elh tä laj letesa tä tiyäj,

wet tek nowayhläk õyen tesayej lhamel

m'ak tä iwoye.

₅Lhaikhajyenhen tä iwoye m'ak tä ni'isa,

nitichunejlhi t'at m'ak chik iwohiyela

yämlek iyhäj nitäfwelayej t'akanyajay.

₆Lhamel fwetaj ihichet'a elh chik häpe

chik itetshan m'ak tä lhamel iwoye.

Matkat Elh tä nitäfwelej wet ihanej

hin'o letichunhayaj tä ihi lehusek,

lhamlak itetshan.

₇Dios iselkatla chik tiyäjej lham lech'ähis.

₈Lhamenlak lhämtes ilänhen,

wet iyhäj chik hiw'enla lhamel lewit'äyhyajtso iläklawethä.

₉Wet nilhokej wichi lenowayhyaj ihiyeja,

lhamel yenla silätyaja m'ak tä Dios iwoyetso,

wet yen tichunhayaja.

₁₀Hin'o tä is yenla lakäjyaja häp Lhawuk wet ilethanhiyela,

wet nilhokej wichi tä ische alhoho iwunthila.