Okäjejlhi m'ayhay tä matche tä ischehen tä Dios iwoyeje wichi
1Dios, t'uhawet amej awujyaj tä õ'ti amej
tä ihi hupuy tä Sión.
Wet t'uhawetej che wichi yäm matche
lhämet tä iwoyej ame,
2tsi letach'ahuye t'at
tä lhamel iwo let'alhyaja.
Nilhokej wichi tä iho ame,
3tsi m'ak tä ni'isachehen tä olhamel owoye
wuj tä ilän n'ohen,
mat am letäyhthen och'isukyajay.
4Akäpfwayaj tä is iyej
elh tä letatshupiye wet lehän ame
yämthilek ihi Haw'et tä Amajchet.
Is che lhäm tapokwe ohusey
häp m'ayhay tä isen tä tälhe Haw'ettso.
5Dios tä olhamel Ofwayhthi,
lechulh n'ohohen tä lhenlhi
m'ayhay tä wuj tä iselkat n'ohen
wet hin'älit tä ahäpe Elh
tä matche tä is alhoho.
Wichi tä nilhokpe honhat iti amej lechayaj,
lhäy'e lhamel tä iw'echehi
lewomekitas tä atosehen.
6Am let'untejiche chenhas
häp akhajyhayaj tä wuj tä i'amej,
7wet letahuye inät tä iwo lhetheya,
lhäy'e wichi tä iwo lehuyaja,
wet iwo letamseka.
8Tej che ihiche lew'etes tä atosehen,
ichettiyejchehen lenowayhyaj
tä hiw'en atetnhay tä lhenlhi.
Matche, wichi tä imälhewek honhat
t'änhen tä lekäsyenwethä.
9Am let'uye honhat wet lechene pelhay
yämlek iche lhay tä ihi.
Lhäm tapokwe tewok tä inukwehen len'äyhäy,
wet lechihelit yachuyaj yämlek wichi isej.
Häp täjtso m'ak tä lewoye
tä lewaklhat yachuyajw'et.
10Letsäype inät häp honhat tä õ'saji,
wet lewasthiche lhipey tä niwasahiche
yämlek w'awulhchä.
Lechene pelhay tä wuj
yämlek nemhit t'un honhat,
wet letakäpfwaye yämlek isen yachuyaj tälhes.
11Nekchämpej iche t'at
akäpfwayaj tä isen tä letihi.
M'ak tä lhäy'e lhip tä naya
nitsäyhchä tä tälh puleye.
12Hup tä i'pe honhat w'atshan t'at,
wet chenhas lakäjyaj ihi.
13Tson'atas tapoyej lhipey tä w'awulhchä
yämlek tuj hup,
wet trigo tapokwe chenhas kawayhil.
Nilhokej ichoywethä
wet t'änhen tä lakäjyaj ihi.
