Salmo|Sal 9

₁Iwuk, omälhetwek ohusek tä owunit ame

wet oyen lhämeta nilhokej m'ayhay tä isen tä lhenlhi.

₂Iwuk tä najit atumfwaya,

wuj tä okäjyaj ihi.

¡Ofwitsenej ochos tä on'okwi amej

wet oten otenkay tä oaiwujyen!

₃Otayhfwas inukwe alhoho tä noway ame,

nichätche katsi wet y'inhen.

₄Ahäpe N'okalelhthayajwo tä is,

letatayhiphä aniyatyaj

wet lewoyej n'oye m'ak tä is alhoho.

₅Lhäm äytajche afwonyaj tä letiyej

wichi tä iche honhat tä w'enha lhamejen,

wet lelänhen lhamel tä niwoya lep'altsenyaja.

Letäyhat lhamel häpkhilek nehit katsik

yenla letichunhayaja yämlek tiyäj'attsiy.

₆Y'inhen otayhfwas wet hupuy tä lewuk hap'akej,

tatäy t'at tä lewasthiche

wet nehit katsik yenla letichunhayaja.

₇Mat Lhawuk häpe Niyat yämlek tiyäj'attsiy.

Ikhajyen leniyatyaj wet wak'alh t'at

yämlek iwo lakalelhthayaja.

₈Häpkhila lakalelhthayaj tä is alhoho

che itiyej nilhokej wichi tä i'pe honhat.

₉Wichi tä n'och'atkanyaj itiyej,

häp tä leletnhawet Lhawuk,

wet t'uye t'at che atha lhamel len'äyij.

₁₀Iwuk, häp lhamel tä nitäfwel amej,

lechayaj iti amej,

tsi lewomhit'a lhamel tä t'u amche.

₁₁¡Ten n'otenkay tä len'okwiyej Lhawuk,

Niyat tä yen lew'eta Sión!

¡Wo silätayej wichi tä iche honhat

m'ak tä lham yenlhi!

₁₂Dios tek hip'ethatlä wichi tä lelhakli ihi,

wet tach'ahuye t'änyaj tä iwoye,

wet itasnhen iyhäj tä inuyepej lhamel.

₁₃Iwuk, p'altsenn'o.

¡Lhek yahinya wichi tä n'äyi n'oho,

wuj tä ilhaklitlhin'o!

¡Fwayhat n'oyej ot'ilek,

tsi oihi t'at lepe!

₁₄Häpkhilek otkasthi Jerusalén lepelis,

nemhit häpe ot'ilek lepe,

wet ofwenhihola wichi tä t'uhawet amej tä õ'aiwunit,

wet okäjyaj ihi tä lefwayhatn'o.

₁₅Wichi tä kahäpeya aka wichi tij chowej,

mat lhamel t'at tä nichäte.

Iskathen laka niyhäy,

mat lhamel t'at tä t'äsi

wet hits'ulhakejwethä lepach'ol.

₁₆Lechumtes tä iwoye häp tä yäythen,

wet Lhawuk itäfwnhatej wichi

tä lham t'at tä lewoynejek täjtso.

₁₇Wichi tä kahäpeya Dios laka wichi,

häp lhamel tä ni'isahen tä hip'ethatlä Dios,

nilhokej lhamel tiyäjiyela honhat tä atojchä

tä n'op'itseyhay lew'et, wet noj.

₁₈Tsi Dios tek hip'ethatlä p'elitses,

wet leniwhayaj tatäyhit'ala lhamel.

₁₉Nephä, Iwuk, yej tach'anlhayeje

m'ak tä iwoye hin'ol tä lhaichäjwethä.

Wo akalelhthayajayej wichi

tä kahäpeya aka wichi,

tä ihi tä letatache.

₂₀Thathomche lenowayhyaj yämlek nowayhen.

Is che nitäfwel lhamejen

tä niwohit m'ak che häpehen,

hin'ol t'at.