Häpet Dios laka silätwos täkwfwas
1Wet nech'e õhw'en n'oho kanohi tä n'okaw'awlhanhatcha, hätet iwoye hal'ä. Wet elh tä hiw'en n'oho ifwel n'oho wet yok:
–Mäh wo mediya Dios Lew'et, lhäy'e altar, wet wo t'ufwahtesa wichi tä ihi tä iwo len'okhayaja. 2Mat yej wo mediya lhip elh tä tumej alhoye, tejtsi, tsi õyachaje wichi tä nitäfwelayej Dios tä matche. Wet cuarenta y dos iwel'as (42), wok oyok, mil doscientos sesenta ifwalas (1.260) tä lhamel t'äsichela Hupuy tä Dios T'amajchet wet yenla w'et m'ayeka. 3Wet ochenhiyela täkwfwas oka silätwos tä lew'uyis yelaj, hätet iwoye bolsa, wet ow'enhihomchela lakhajyhayaj yämlek yen silätyaja olhämet häp 42 iwel'astso.
4Dios kasilätwostso häpehen olivo lhiley wet äp n'ochäkwhis tä ihi tä Lhawuk tä honhat lewuk itayche. 5Wet elh chik häpe chik fwetaj ikänchi lhamelna, itäj tä tälhchehen lak'as itäyhthihena letayhfwas. Häp tä mälhyej'attso tä y'inhila elh at chik häpe chik fwetajla ikänchi lhamelna. 6Wet Dios hiw'enhomche lakhajyhayaj lhamelna yämlek hip'ohi pule, wet nilhok lewhäy tä lhamel yen lhämeta Dios lhämet, tek iwomlahchä. Häte lakhajyhayaj ihi chik iwelanhat w'oyisa häp inät lhayis, wet ihanej iwoyneje yämlek ilänej lewit'äyhyaj at chik häpe häp honhat, häp lewhäy chik häpe chik ihuminche chik iwoye.
7Wet chik noj tä iwo silätyaja, wet häp m'akitaj tä tälhche chowej tä najit lech'oya iwohla laka'tshayajayej, wet ikalhihila wet ilänhenla. 8Wet lep'itseyhay ihihila lakawayhil häp hupuy tä lhamya tä Lewuk ihi p'ante tä õhp'ajtej cruz. Wet õ'tech'aynej Sodoma lhäy'e Egipto tä õ'wo lheyesa hupuytso. 9Wet tres ifwalas y medio tä wichi tä w'enhache lhamejen, häp wichi tä tälhe nilhokej honhates tä lhämtes w'enhahiche, lhamel iyahnhila lep'itseyhaytso, mat tek tach'anlhahiyela chik õtjänch'oye. 10Wet häp wichi tä i'pe honhat, lhamel akäsiyejawethä tä y'inhen profetastso, wet iwohla lakäjyaja'pe wet iwohla t'awayhtesa lhamejen, tsi lhameltso wuj tä ilhaklithen wichi.
11Mat tä tajyäme tres ifwalas y mediotso, Dios leyalh tiyäjomche lhamel wet yachajo tä iläythen. Wet lhamel takasthen, wet nilhokej wichi tä hiw'en wuj tä lenowayhyaj ihi. 12Wet nech'e silätwostso iläte n'opak tä äytaji tä tum puleye tä tahuye lhamel wet yok:
–¡Lhuyay, hoyay kana!
Wet lhamel yikche pule wet tiyäj kaphä, wet letayhfwas hiw'enche t'at. 13Häpet tä mälhyejtso, näm honhat w'ahu tä äytaji wet iwasitchä lhip hupuy, wet iche siete mil wichi tä y'inhen. Wet iyhäj tä imälhehi wuj tä lenowayhyaj iyej, wet iwunit Dios tä ipuleye.
14Tajyäme n'owit'äyhyaj tä segundo, mat lhek tetshan, pajiyejt'ala wet nämla elh.
Häp ángel tä siete yafwutche lefwol trompeta
15Wet nech'e ángel tä siete yafwutche lefwol, wet pitsaje n'opakas tä äytaji tä tum puleye tä yok:
“¡Häp honhat lakhajyhayaj
nech'e ichufwi Lhawuk lakhajyhayaj,
lhäy'e N'ofwayhthi tä Lechenek,
wet lhamel lhayen niyatayej
yämlek tiyäj'attsiy!”
16Wet häp veinticuatro hin'ol tä lhamenya tä tatachephä'pe leniyatyajay tä ihi tä Dios tatache, lhamel takhosche katsi tä n'okwiyej Dios 17wet yok:
“Olhamel owo graciasa amej, Iwuk Dios,
häp am tä najit atumfwaya,
am tä pajche lheche wet ahäpe t'at,
tsi letachuma akhajyhayaj tä wuj
wet alhen Niyata.
18Nilhokej wichi tä ihiche honhates wuj tä fwitses,
mat näm t'at ifwala tä len'älit awäk,
wet letihiyeja akalelhthayaj
iyhäj tä pajche y'inhen,
wet lew'enhihomchela laha
m'ak tä t'uhawetej häp akawos profetas,
lhäy'e nilhokej iyhäj tä häpehen aka wichi,
häp lhamel tä aiwujyen,
tej chik häpe iyhäj tä len'ohyajay ihiche
wok häp iyhäj tä laj len'ohyaja,
wet letäyhthihena häp wichi tä ikänchi honhat.”
19Häpet tä mälhyejtso, tafwoche lepe Dios Lew'et tä ipuleye, wet nech'e n'äl häp Arca tä N'ot'amajchet tä Dios Lhämtes ihi tä ilech'oye Dios Lew'ettso. Wet iche lep lhayis, lhäy'e n'opakas, lhäy'e pelhay tä t'ajanlhi, lhäy'e honhat w'ahu, lhäy'e kalatu tä wuj.
