Atsinha lhäy'e m'akitaj tä hätet iwoye alhutaj tä wujche
1Wet n'älehi pule n'otetnek tä lhamya, häp atsinha tä yen lew'uya fwala, wet wel'a ichufwi lepach'ol, wet lakawon'a häpe doce katetsel tä i'pe lhetek. 2Häp atsinhatso hich'otshan, wet tä takaw'ahan, wuj tä lhailät, wet t'änlhi t'at.
3Wet nech'e äp n'älehi pule elh n'otetnek, häp m'akitaj tä hätet iwoye alhutaj tä wujche lhäy'e tä ichät, lhethey ihi siete wet lech'ul ihi diez, wet corona iche'pe lhethey elhpej. 4Wet lechäs iton lhip katetsel tä ipuleye wet ithat honhate. Wet ikasit tä ihi tä atsinha itayche, tsi t'uhläk häpet chik nichätchä lhäsaj, wet yofwajkwet tufw.
5Wet tä nichätchä lhäsaj, hin'o t'at, häp lham tä lhayenla niyatayej nilhokej honhates häp tä isej lakhajyhayaj tä wuj. Mat häp han'äfwajtso, õ'soyej lako wet õ'häne Dios lhäy'e leniyatyaj. 6Wet atsinha yik tä ilethane lew'et tä pajche Dios iwaklhatho tä ihi ts'anis, yämthilek ihi wet õhw'enho m'ak tä isej yäk 1.260 ifwalas.
7Tä tajyäme täjtso, iche n'oka'tshayaj tä ipuleye. Miguel lhäy'e laka ángeles, lhamel itayhlä alhutaj tä wujchetso, wet alhutaj lhäy'e laka ángeles, lhamel itayhlä Miguel. 8Mat ikalhihit'a, wet nemhit lhamel lew'et ihi pule. 9Häp tä mälhyejtso tä õ'tiyej kanhi häp alhutajtso tä häpe amlhätaj tä nech'enyaya tä lhey Ahättaj wet äp lhey Satanás, häp lham tä ikanej nilhokej wichi tä i'pe honhat. Lham lhäy'e laka ángeles õ'that honhate.
10Wet nech'e oläte n'opak tä äytaji tä tum puleye tä yok:
“¡Näm n'ofwayhyaj!
¡Näm häp lhaka Dios lakhajyhayaj lhäy'e Leniyatyaj,
wet lhäy'e Lechenek tä N'ofwayhthi lewujyaj!
Tsi nech'e õ'tiyej kanhi elh tä iwo letesa lhapuhfwas,
häp lham tä ifwalapej honatsipej
ihi t'at tä lhaka Dios itayche,
tä itiyej letes häp wichi.
11Lhapuhfwas ikalhi lham,
häp tä isej Tson'ataj Lhäs lew'oyis tä nitsäyhchä,
lhäy'e Dios silätyaj tä lhamel yen lhämeta.
Lhamel nowayhiyet'a t'ilek,
mat lhayachaje t'at.
12¡Tä mälhyejtso, pule lhayis, woyay akäjyaja,
häte amel tä lhenay haw'eta!
¡Mat honhat lhäy'e lewomekitas, awit'äy i'amejen,
tsi ahättaj ihanej t'at
tä tatäy lhimphaj wet nofwila lewhäy,
wet häp tä lhäy'e lhip tä lewäk ihi,
wet inuhchä yämthilek iwohla laka'tshayaja amejen!”
13Tä alhutaj tä wujchetso hiw'en tä õ'that honhate, ihänlhi häp atsinha tä iwo lhäsa. 14Matkat atsinhatso õhw'enho iyhäjkottaj lhafwis tä wus, yämthilek ihanej tä wey'ä wet yikch'oye alhutajtso wet ihoye lew'et tä ihi ts'anis. Wet õhw'enho m'ak tä isej yäk tres nekchämes lhäy'e seis iwel'as. 15Wet häp alhutaj fwetaj ihänyenej atsinha inät tä hätet iwoye tewok tä tälhche lak'aj, yämthilek ichäj atsinha chik ifwit. 16Matkat honhat hich'ote atsinha wet hich'enhi lak'aj wet tim häp tewoktso. 17Wet häp tä alhutaj nem koyhyaj tä tawäkwäye atsinha, wet yik tä itiyej laka'tshayaj atsinha leles iyhäj, häp wichi tä iwoye Dios lhämtes wet nileyayej tä iti lhamejen Jesús lhämet.
