N'olhäthis tä Dios lewäk ihiche
1Wet oläte n'opak tä äytaji tä tumchufwi Dios Lew'et, tä tahuye siete ángelestso tä yok:
–¡Mähen tsäype honhat häp siete n'othäthis lheley tä häpe Dios lewäk!
2Wet yik ángel tä ichun wet itsäype honhat n'olhäthi lhele. Wet nilhokej wichi tä m'akitaj letetnek iyejwethä, lhäy'e tä n'okwiyej lepeyak, nech'e elhpej amo ihi t'isan tä wuj tä äytaj, lhäy'e lhip tä ni'isa.
3Wet ángel tä segundo itsäype n'olhäthi lhele häp lewomekitas, wet inät nech'e welan w'oyisa, hätet iwoye hin'o tä õ'län, wet nilhokej m'ayhay tä ihiche y'inhen.
4Wet ángel tä tres itsäype n'olhäthi lhele häp tewok lhayis lhäy'e ts'ifwik lhayis, wet welan w'oyisa. 5Wet nech'e oläte häp inät lhayis laka ángel tä yok:
“Dios tä N'ot'amajchet,
am tä pajche lheche wet ahäpe t'at,
ahäpe Elh tä is alhoho,
tä lewoye atasnhayaj tä äyteschehentso,
6häp tä wichi itsäy lew'oyis
häp lhamel tä häpehen ales,
lhäy'e profetas.
¡Wet athana t'uhawetej t'at
tä leyäynejen w'oyis häp lhamel!”
7Häte oläte altar tä yok:
–Matche, Iwuk Dios tä najit atumfwaya, is alhoho atasnhayaj tä lewoye wet matche t'at.
8Wet ángel tä cuatro itsäype n'olhäthi lhele häp ifwala, wet nech'e lhäy'e lhip tä chayokwe, hip'ohen wichi, 9äytaj nahayoj tä ilänhen lhamel wet wuj tä y'ohen. Mat tek iwo lehusey iyhäja yämthilek iwujyen Dios, mat iyeteje lhämtes tä lhäy'e lhip tä ni'isachehen häp lham Dios tä lakhajyhayaj ihi tä yenlhi nilhokej n'owit'äyhyajayna.
10Wet ángel tä cinco itsäype n'olhäthi lhele häp m'akitaj niyatyaj, wet nech'e honataj hip'o'pe. Wet häp wichi, tä lhäy'e lhip tä äytaj m'ak tä ilänhen, yokwajiche lak'ajlhich'ul. 11Mat tej tä mälhyej'attso thayej, kamaj ilehiyejt'a tä iwoye m'ak tä ni'isachehen. Wet tä äytes t'isanis tä amos ihi, nem koyhyaj tä iyeteje lhämtes tä lhäy'e lhip tä ni'isachehen häp Dios tä pule Lewuk.
12Wet ángel tä seis itsäype n'olhäthi lhele häp tewokitaj tä lhey Éufrates, wet y'im, wet len'äyij ihi niyatey tä tälhche tä ifwala tälhche.
13Wet ow'en tres ahät lhayis tä lhäy'e lhip tä ni'isahen, hätet iwoye päy'i lhayis, tä tälhche alhutaj tä wujche lak'aj, lhäy'e m'akitaj lak'aj, lhäy'e profeta tä kamatache lak'aj. 14Wet ahät lhayistso yenlhipej letetnhay tä iselkatejen wichi, wet yikhen tä ihutwek nilhokej niyatey tä i'pe honhat yämthilek iwo laka'tshayajayej Dios tä najit letumfwaya, chik nichäte lham laka Ifwala tä lhamya.
15(Wet Lhawuk yokwe:
–Lhek yahinya, onämla ohätehlat iwoye etantsaj tä näm tä wichi tek inihich'oye. Okäpfwayaj tä is iyej elh chik nitekm'ahatalhi wet iwaklhat lew'uyis tä y'uyhichela, häpkhilek nits'ilakache wet newache len'äfwlhi chik onäm.)
16Wet ahät lhayistso ihutwek niyatey tä ihi lhip tä Hebreo lhämet yok, Armagedón.
¡Wak'alh!
17Wet ángel tä siete itsäyhchä n'olhäthi lhele, wet n'opak tä äytaji tälhe n'oniyatyaj tä ihi Dios Lew'et tä ipuleye, wet yok:
–¡Wak'alh!
18Wet nech'e iche lep lhayis, lhäy'e n'opakas, lhäy'e pelhay tä t'ajanlhi, wet honhat w'ahulhi, häp honhat w'ahu tä lhäy'e lhip tä äytaji. Tälhe tä nech'e wichi ihi honhat, ihanhiyejt'a chik iche honhat w'ahu chik mälhyej iwoye täjtso. 19Wet häp hupuy tä lhamya tä häpe Babilonia, lhipey ihi tres tä wasi, wet hupuy tä ihiche iyhäj honhatil natche katsi. Tsi Dios itichunch'oye Babiloniatso tä lhamya, 20Wet nilhokej lhiletas noj t'at wet tatäy, wet chenhas nemhit iche. 21Wet tälh puleye kalatu tä wus, elhpej inu'pe cuarenta kilos tä nichätpe wichi. Wet lhamelna iyeteje lhämtes tä lhäy'e lhip tä ni'isachehen häp Dios, häp kalatu tä tamenej, tsi häpe lewit'äyhyaj tä matche tä ni'isa.
