Apoc 20

₁Wet ow'en ángel tä inuhchä tä tälh puleye tä ichäj häp chowej tä najit lech'oya laka llave, lhäy'e cadena tä wusche. _2-3Wet itsoklhi alhutaj tä wujche, häp amlhätaj tä nech'enyaya tä häpe Ahättaj wet Satanás. Wet yäytej t'akay tä ichäjlhi, wet ithatche chowej tä najit lech'oya, wet hip'ohi wet hip'ajtej sello tä letetnek yämthilek nehit katsik ifwoyenche lepe yäk mil nekchämes. Tä mälhyejtso, alhutaj tä wujchetso nemhit ikanejen wichi tä ihiche honhates pajla'tha tajyäme lewhäytso. Wet chik tajyäme täjtso, nech'ehilak õ'wahinphä ayej lhimphaj lewhäy.

₄Wet ow'en n'oniyatyajay, wet lhamel tä iche'pe häpe t'at lhamel tä Dios hiw'enhomche len'ohyaj yämthilek iwo lakalelhthayaja. Wet ow'en lehusey häp lhamel tä õyisthen lhethey tä õ'menyenej tä nileyayej Jesús lhämet lhäy'e Dios silätyaj. Tsi lhamel tek n'okwiyej m'akitaj lhäy'e lepeyak, wet tachumhit'ahlä letetnek tä õ'tiyej letacho wok takwey. Wet ow'en tä yachajo tä iläyhen, wet ihi Leniyatyaj mil nekchämes, lhäy'e Cristo. ₅Häp täjtso lewhäy tä ichun tä lhamel inukwephä tä tälho n'op'itseyhay. Mat häp iyhäj n'op'itseyhay yachajihot'a tä iläyhen pajtha tajyäme mil nekchämestso.

₆¡Dios lakäpfwayaj tä is iyej t'at lhameltso tä ichun tä inukwephä, tsi häpehen Dios t'amajchetes! Wet n'ot'ilek tä segundo ihanhiyejt'a chik ikalhi lhamel, mat häpkhihena Dios lhäy'e Jesucristo kan'ohusewos, wet ihihila Leniyatyaj mil nekchämes, lhäy'e Cristo.

₇Wet chik tajyäme mil nekchämestso, õ'nuhthiphäla Satanás tä ihi n'op'onthi, ₈wet yikhila tä itihiyeja lakanyaj nilhokej wichi tä ihiche honhates, tä häpe Gog lhäy'e Magog. Wet ihutlawek lhamel yämthilek iwo laka'tshayaja, wujla'pey lhamel, hätet iwoye holotaj tä iwhäye tewok.

₉Wet w'awulhpe honhat tä yikhen, wet inuye Dios leles lew'et tä häpe hupuy tä Dios lehumnek, wet lhamel ilunej. Matkat nichätchä itäj tä tälh puleye wet hip'ohen lhamel wet noj. ₁₀Wet häp ahättaj tä ikanej lhamel, nech'e õ'thate itäj lhäy'e azufre tä hätet iwoye lewomekitaj, tä pajche õ'thate m'akitaj lhäy'e laka profeta tä kamatache. Wet leteläythayaj ihiyeja ifwalapej honatsipej yämlek tiyäj'attsiy.

₁₁Wet nech'e ow'en n'oniyatyaj tä lhamya tä ipelaj, lhäy'e Dios tä itayphä'pe. Wet häp honhat lhäy'e pule nech'e tatäy tä ihi tä itayche, wet nemhit iche. ₁₂Wet ow'en wichi tä pajche y'inhen, häp lhamel tä len'ohyajay ihiche lhäy'e iyhäj tä laj len'ohyaja, tä lhamel ikasthen tä ihi tä itayche n'oniyatyaj. Wet nech'e õ'fwoyenche häp n'olesaynekhis, häte n'olesaynekhi tä wichi tä ikatej lew'atshancheyaj tä t'un lheyes ihi. Wet häp wichi tä pajche y'inhen, Dios iwo lakalelhthayajayej lechumyaj mälhyej tä lhamel iwoye, tä pajche õ'lesayen tä ihi n'olesaynekhistso. ₁₃Wet lewomekitas yachaj n'op'itseyhay tä ihi, wet häte N'ot'ilek niyatyaj yachaj n'op'itseyhay. Wet õ'kalelhät elh weihalhapej, mälhyej lechumyaj tä iwoye. ₁₄Wet N'ot'ilek niyatyaj nech'e õ'thate itäj tä hätet iwoye lewomekitaj, wet häp itäjna häpe t'at n'ot'ilek tä segundo. ₁₅Wet häp tä õ'thate wichi tä lheyes newahi n'olesaynekhi tä lhamel tä ikatej lew'atshancheyaj tä t'un lheyes ihi.