1Amtena ipuhfwas, olham Pablo ochen amehen olhämetna. Ohäpe t'at Cristo Jesús lakawo, wet Dios t'änte n'oye wet itshupyenej n'oye yämthilek yen n'oye Cristo laka apóstol, wok oyok, lakachenhay tä lhamenya elh, häpkhilek oyen lhämeta Lesilätyaj tä Is.
2Dios pajche p'ante ifwel häp Lesilätyajna tä ihi N'olesaynhay tä T'amajchetes, häp tä isej laka profetas p'ante ichun. 3-4Lesilätyaj yäme t'at häp Lhäs Jesucristo, Lhawuk. Wet m'ak tä ikalelhät tä häpe hin'o, häp tä tälhe t'at David leles tä lepes lheley. Wet m'ak tä ikalelhät tä häpe Dios Lhäs, häp tä Espíritu tä Dios T'amajchet iyej wet inuphä tä tälho n'op'itseyhay, häp tä isej Dios lakhajyhayaj tä wuj.
5Häpet olham, Dios hip'altsenn'o häp tä isej Jesucristo, wet itshupyenej n'oye yämthilek ohäpe elh Cristo laka apóstoles wet oyen silätyajayej wichi häp lham, yämthilek wichi tä ihi nilhokej honhatil t'ekhaye wet iwoye lhämtes. 6-7Wet amel tä haw'et hupuy tä Roma lheyayej t'at häp lhameltso. Dios aihumnhen wet t'än amehen yämthilek lep'akayej häp Jesucristo wet alhen laka wichiya. Is che Dios Lhajcha lhäy'e Lhawuk Jesucristo iti amejen lep'altsenyaj lhäy'e atamsek.
Pablo t'uhläk t'isiyakaye Roma
8Chunkat owo graciasayej oka Dios atapehen, häp tä isej Jesucristo, tsi letoyaj y'ajpe honhatil amel ekhahyaj. 9Wet lham Dios tä omälhtejwek ohusek tä otch'ote lechumet tä oyenpej silätyaja Lhäs, lham tä hiw'en tä otujlhache t'at tä ontichunpej amchehen tä owo ot'alhyaja. 10Wet ot'alhejepej che lenech'ethayaj wet ifwoyenche on'äyij yämthilek ot'isiyakay amehen, tsi pajche tä ot'uhläk oahiw'en amel. 11Matche, owatläk oho amehen wet och'otyenej amehen häp m'ak tä is tä tälhe Espíritu tä Dios T'amajchet, yämthilek lhäy'e lhip akhajyhayaj che i'amejen. 12Wok oyok, häpkhilek y'akhajyen lhamejen lhat'ekhahyaj tä in'amejen.
13Ot'uhläk ohanhat amejen, ipuhfwas, tä wujpe lewhäy tä ofwetaj ot'isiyakay amehen, mat yäk athana tek osakantshi, häp tä ichepej m'ak tä n'äyej n'oho. Ohumin che wichi tä i'amejen iwo lehusey iyhäja häp tä isej och'otyaj, mälhyej tä wichi tä kahäpeya Judío lhayis tä ihiche honhatil iyhäj iwoye. 14Tsi hätet iwoye che nilhokej wichi tujlha n'oye, häp wichi tä ihiche hupuy lhäy'e iyhäj tä iche tayhi, wok lhamel tä ihanche m'akej lhäy'e iyhäj tä nhanache honhatej. 15Häp tä tamenej tä lhäy'e lhip tä ot'uhläk owo silätayej Dios Silätyaj tä Is häte amel tä lheyayhi Roma.
Dios Lechumetcha tä takhajay
16On'äfwlhi ihiyejit'a Dios Silätyaj, tsi häpe t'at lham lakhajyhayaj yämthilek ifwayhthen nilhokej wichi tä t'ekhahyaj ihi, chunkat häp Judío lhayis, wet häte lhamel tä kahäpeya. 17Tsi Lesilätyajna hin'älit tä häpe t'at n'ot'ekhahyaj tä hi'isyene wichi häp Dios. Ihichet'a m'ak elh, ts'ilak n'ot'ekhahyaj. Mälhyej tä Dios lhämet tä ihi Lehi yäme tä yok, “Häp elh tä t'ekhahyaj tamenej tä Dios hi'isyen, häp tä lew'atshancheyaj ihihila.”
Letes ihi wichi tä kahäpeya Judío lhayis
18Dios hin'älit lewäk tä tälh puleye wet nichätpe nilhokej wichi tä lech'isukyajay ihi, häp lhamel tä ni'isahen tä hip'oyejpe lakeyes häp m'ak tä matche. 19Lhamel ihanej iwoyneje yämthilek nitäfwelej Dios, tsi lham t'at tä lhaitäfwnhatej. 20Tsi che lhamel yen tichunhayaja lhenhay tä hiw'en, lhamel ihanej iwoyneje yämthilek ihanej ihi Dios tä nin'äla. Tsi tälhe tä yenlhi p'ante honhat, n'äl tä lham häpe t'at Dios wet lakhajyhayaj najit lepesa. Tä mälhyejtso, lhämet n'äyij ihihit'a lhamel, letes ihi t'at.
21Tsi tej tä lhamel pajche ihanej tä Dios iche, mat itihiyejt'a lewujyaj tä t'uhawetej tä häpe Dios, wet tek iwo graciasayej. Letichunhayajay najit lahaya, wet lehusey t'unhen wet ihi t'at honatsi. 22-23Tsi itiyej kanhi häp Dios tä n'ilataj lhäy'e lesilatyaj, wet n'okwiyej hin'ol tä nit'una lepeyakas, wok afwenchey, wok itshätäy, wok m'ak tä lhaitonchehen honhat lepeyakas. Tä mälhyejtso, tej tä fwetaj ihanche m'akej, mat n'äl tä ch'isukwis t'at.
24Häp tä tamenej tä Dios yachajeje lhamel häp lenech'ethayajay tä kok'aye, wet lhamel lhaikänchiyej lakeyes tä nin'äfwelhayej. 25Iwom m'ak tä matche tä Dios hin'ältej lhamel häp tä isej lham lhenhay, wet tachuma m'ak tä kamatache. Tsi iwujyen wet n'okwiyej Dios lhenhaytso, wet tek n'okwiyej Dios tä matche, häp lham tä yenlhi m'ayhay wet t'uhawetej che õ'wunit yämlek tiyäj'attsiy. Amén.
26Häp tä tamenej tä Dios yachajeje lhamel häp lakänyajay tä nin'äfwelha. Atsinhay iwoyej lhamehen m'ak tä kalhamyajayej tä atsinha. 27Wet hin'ol hätet iwoye, nemhit iyahin atsinhay, mat t'ekhiyejt'a lakeyes tä ni'isachehen tä ikän lhamehen. N'äfwelhihent'a tä lhayen lech'efwasa tä hin'ol. Tä mälhyejtso, lewit'äy ihi, ikatej t'at laha tä w'awulhlä lemukwehyaj tä iwoye.
28Wet tä lhamel niwatahläk nitäfwelej Dios, lham yachajeje letichunhayajay tä kok'aye, yämthilek iwoye t'at m'ak tä nit'uhawetayej che iwoye. 29Nilhokej häp m'ayhay tä ni'isachehen tapoyej lhamel, wet hich'at at lhamejen m'ak tä hich'atej tä iwoye tä ni'isa. Alhaknhatses wet ch'isukwis, äp y'äyten lhamehenpe m'ak at che häpe, wet äp anikoyis. Iwohit'a isisey wet akantses, tach'anlhahit'a lhamehen wet äp sitäwos, 30asufwkantses, wet tatayhlä Dios, aläkwyhantses, lhaichäjwethä wet lhaiwujyenhen. Ihanej iwoyneje yämthilek yenlhi m'ak tä ni'isa, wet tach'ahuhiyet'a häp lhokwey. 31Tek t'uhläk ihanej m'ak tä is, wet äp tek imatitche lhämet tä iwoye. Lechowej ihihit'a wet najit lep'altsenyaja. 32Lhamel ihanej t'at tä Dios yäm kalelhäj lhämet tä yok, “Wichi tä iwoye m'ayhayna, t'uhawetej che ikatej laha tä häpe n'ot'ilek.” Mat lhamel kamaj tujlhache t'at tä iwoye, wet tä äp hiw'en iyhäj tä iwoye lakeyes tä mälhyejentso, yok, “Is t'at.”
