Rom 14

₁Häpet elh tä t'ekhahyaj niwuja, oyok, chumayhlä, mat yej lhämhoplhi'pe m'ak tä lham letichunhayaj. ₂Tsi iche lhamel tä yok, “Is t'at chik otufw m'ak at chik häpe.” Mat iche iyhäj tä t'ekhahyaj niwuja, wet lhamel ts'ilak tä tufw m'ak tä ka'itshäweta. ₃Tä mälhyejtso, oyok, Häp elh tä tufw m'ak at chik häpe, isit'ak yen w'et m'ayeka elh tä nitufwa m'ak tä lham tufw. Wet häte lham tä nitufwa m'ayhay tä elh tufw, isit'ak yäme tä ni'isa elh tä tufw nilhokej m'ayhay. Dios pajche tachumlä häp lham. ₄Tsi ¿atsi tä ahäpe tä lefwetaj lewo akalelhthayajayej Elh lakawo? Chik is wok ni'isa m'ak tä iwoye, lham laka Niyat t'at tä itetshan. Mat isila t'at, tsi Lhawuk lakhajyhayaj ihi yämthilek hi'isyen häp lham.

₅Häte iche Dios leles tä fwetaj iche fwalas tä lhäy'e lhip tä laha ihi, wet iwujyen t'at. Mat iche Dios leles iyhäj tä yok, “Kha, nilhokej fwalas w'enhahit'a lhamej.” Wet häp tä olham oyok, T'uhawetej chik elhpej yäm kalelhäj letichunhayaj. ₆Elh chik yok, “Olham oyen t'amajcheta fwalana”, t'amajej t'at tsi häp tä iwunit Lhawuk. Wet elh tä tufw m'ak at chik häpe, tufw t'at tsi häp tä iwunit Lhawuk wet iwo graciasayej. Wet elh tä nitufwa itshäwet t'isan, tufwit'a tsi häp tä iwunit Lhawuk wet iwo graciasayej.

₇Tsi ihichet'a n'aelh chik häpe chik lewuk häp lham lew'atshancheyaj lhäy'e t'ilek. ₈Tsi y'aläyhen yämthilek y'awujyen Lhawuk, wet äp y'at'inhen yämthilek y'awujyen Lhawuk. Tä mälhyejtso, chik lhaw'atshancheyaj in'amejen wok lhat'ilek, n'ahäpehen wichi tä lewuk häpe Lhawuk. ₉Tsi Cristo y'il p'ante wet äp yachajo tä iläy, yämthilek lhayen häpeya wichi tä y'inhen lhäy'e iyhäj tä iläyhen Lewuk.

₁₀Wet am tä katufwa itshäwet, ¿chipte tä lhäme tä ni'isa apuhfwa? Wok am tä letufw m'ak at chik häpe, ¿chipte tä lhen w'et m'ayeka apuhfwa? Tsi y'alhokhiyeja chik y'ehihila tä Dios tatache, wet lham ikalelhthila n'amejen häp m'ak tä y'awoye. ₁₁Tsi Dios lhämet tä ihi Lehi yok:

₁₃Wet häp tä iwohiyet'ak y'awo lhakalelhthayajayej lhapuhfwas. Mat ti amhiche atichunhayaj tä lhok, “Nemla owoye m'ak at chik häpe chik tamenej opuhfwa chik nichäthen wet lewit'äy ihi.”

₁₄Tä olham Pablo ohäpe elh tä hip'akej Lhawuk Jesús, ohanej tä kalelhäj tä ihichet'a m'ak chik lhamyajej lakokhayaj tä iyej. Mat chik elh yäme m'ak chik häpe wet yok, “Kok'aye”, lham t'at tä ikokyene. ₁₅Chik lekänchiyej apuhfwa letichunhayaj häp m'ak tä letufw, wet n'äl tä lehuminhit'a apuhfwa. Tä mälhyejtso, isit'ak m'ak tä letufw tamenej chik tatäy apuhfwa tä pajche Cristo y'ilpe. ₁₆Is chik let'amajej m'ak tä aisayej, häpkhilek nehit katsik yok, “Isit'a m'ak tä amel lewoye.” ₁₇Tsi Dios Niyatyaj häpkhit'a m'ak tä otufw wok m'ak tä oyäyej, mat häpe t'at n'o'isyaj, lhäy'e n'otamsek, lhäy'e n'okäjyaj. Häp m'ayhayna tälhe t'at Espíritu tä Dios T'amajchet. ₁₈Wet häp elh tä iwoye m'ayhay tä mälhyejentso tä tach'ote Cristo, ikänitlhi Dios, wet wichi yok, “Häp tä is.”

₁₉Tä mälhyejtso, n'awo yiya m'ayhay chik tamenhiyeja chik lhatamsek in'amejen lhäy'e chik y'akhajyen n'amejen. ₂₀Yej wit'äynej Dios lechumet häp m'ayhay tä letufway. Tsi nilhokej m'ak tä õtufw isen t'at, tek kok'aye. Mat m'ak tä ni'isa häpe t'at chik m'ak tä otufw tamenej opuhfwa tä lewit'äyhyaj ihi. ₂₁Tä mälhyejtso, yej tufw itshäwet t'isan chik tamenej apuhfwa tä letichunhayaj ihi, wet yej yäyej hat'es chik tamenej apuhfwa tä letichunhayaj ihi, wet yej woye m'ak at chik häpe chik tamenej apuhfwa chik nichäthen. ₂₂Äm kalelhäj atichunhayaj wet amajej tä lhehi tä Dios tatache. Lakäjyaj ihi elh tä newache m'ak chik yen choweja lhamej tä iwoye m'ak tä fwetaj is. ₂₃Mat häp elh chik nikalelhäja letichunhayaj tä yok, “¿Is p'iyak otufw m'akna, wok n'am tufw p'iya?” - wet chik tufw, letes ihi, tsi iwoye t'at m'ak tä nikalelhäja letichunhayaj. Wet oyok, nilhokej m'ak tä nitälhaye n'otichunhayaj tä kalelhäj häpe t'at n'osukyaj.