Rom 15

₁Häp n'amel tä lhat'ekhahyaj wuj wet y'atkhajayhen, is tä y'atch'ote n'aiyhäj tä lhapuhfwasej Cristo tä t'ekhahyaj niwuja, wet isit'ak y'ats'ilkat m'ak tä n'amel y'ahuminche tä y'awoye. ₂Is chik elhpej n'amel iwoye m'ak tä lepuhfwa isej, yämlek lhaikhajyenej t'ekhahyaj, ₃tsi Cristo häte t'uhikwet'a m'ak chik lham isej. Mat lhayäm matche Dios lhämet p'ante ihi Lehi tä yok, “Iwuk Dios, häp atayhfwas leläkwyhanyajay tä itipej amej nichät o'pe.” ₄Wet nilhokej m'ak tä ihi Lehi iche t'at yämlek y'alhaichufwenejen wet y'alhaikhajyenejen, häpkhilek iche t'at lhaniwhayaj. ₅Wet Dios tä aikhajyenhen, is chik tach'ot amehen yämlek aw'awulhejchä atichunhayajay, mälhyej iwoye Cristo Jesús p'ante, ₆häpkhilek aweihalhahchä tä lewunitay Lhawuk Jesucristo laka Dios wet äp Lajcha.

₇Häp tä mälhyejtso, chumpejlä aiyhäj yämlek õ'tiyej lewujyaj häp Dios, mälhyej tä Cristo tachum ahilähen. ₈Wet häp tä ofwel amhohen tä Cristo näm p'ante wet lhayen Judío lhayis kawoya, yämlek yäm matche Dios lhämtes tä hit'untejche p'ante häp lhamel letetsel. Mälhyejtso tä ipäyne lhamel tä Dios ihanhiyejt'a chik ileche m'ak tä pajche ifwenho lhamel. ₉Mat ts'ilakhit'a täjtso, tsi Cristo t'uhläk häte wichi tä kahäpeya Judío lhayis iwunit Dios tä lep'altsenyaj ihi. Mälhyej Dios lhämet tä ihi Lehi yok:

₁₃Is chik Dios tä lhaniwhayaj tälhe, yäm wuj akäjyaj lhäy'e atamsek tä iti amejen, häp tä letekhaye t'at häp lham, yämlek Espíritu tä T'amajchet lakhajyhayaj tä i'amejen yäm wuj aniwhayajtso.

₁₄Ipuhfwas, olham oyok: Kalelhäj tä aisen t'at amel, wuj ha'isyaj lhäy'e atäfwnhayaj tä i'amejen, wet äp lehanayej tä lechufwenhen aiyhäj. ₁₅Mat häp oka cartana, iche m'ayhay tä tamenej tä owelkatyenphä amejen olhämet, häpkhilek kap'ethatahlä. Wet mälhyejtso tä owoye, häp tä oisej Dios lep'altsenyaj tä hiw'en n'oho ₁₆tä yenn'o Cristo Jesús lakawoya, häpkhilek lhamel tä kahäpeya Judío lhayis isej. Ohätet iwoye sacerdote tä oyenpej silätyaja Dios Silätyaj, yämlek lhamel lhayen häpeya Dios t'awayhat tä lham akäjejlhi lhäy'e tä Espíritu tä T'amajchet yen t'amajchetesa.

₁₇Tä ohäpe elh tä hip'akej Cristo Jesús, okäjejlhi ochumet tä otch'oteje Dios. ₁₈Wet häp tä owelkathiyet'a che oyäme m'ak at che häpe, ts'ilak t'at m'ak tä lham Cristo iwoye tä yenn'o lewoyayej, yämlek wichi tä kahäpeya Judío lhayis iwoye Dios lhämtes. Wet yäm matche täjtso häp tä isej olhämtes lhäy'e m'ak tä owoye, ₁₉lhäy'e häp m'ayhay tä wichi iseltejen tä hiw'en, lhäy'e n'otetnhay, häp tä isej Espíritu tä Dios T'amajchet lakhajyhayaj. Tä otälhe Jerusalén lhäy'e nilhokej wichi lew'etes, yäk onchäte honhat tä Iliria, nilhok lhipey tä owo silätayej Dios Silätyaj tä yäme Cristo. ₂₀Wet tek ot'uhläk wichi yok, “Pablo iwo kotsayej hin'ol iyhäj lechumtes tä iwo tesa p'ante.” Häp tä tamenej tä olhainityene yämthilek oyen silätyaja Cristo tä oihi lhipey tä kamaj newache elh che ihoye che iwo silätayej Dios Silätyaj. ₂₁Tsi Dios lhämet tä ihi Lehi yop'antekwe:

₂₂Häp m'ak tä oyämetso, häp tä tamenej tä n'am hanej owoyneje che ot'isiyakay amehen. Mat wujpe tä oyenpej tichunhayaja yämthilek oho amehen, mat ohanhiyejt'a owoyneje. ₂₃Mat athana noj häp ochumet tä owoye tä oihi honhatesna. Wet mälhyej tä oyämetso, tä wujpe nekchämes tä ot'uhläk oho amehen, ₂₄athana otichunhayaj yok, Che ohoye España, elat okalhi che ohutpe lhamel tä ihi Roma. Wet tä wuj tä ohumin che oihla aj amejen, häte oyenek amel letach'otayhla n'oye che otujlhache on'äyij che otälh amehen.

₂₅Mat athana ohoye Jerusalén, ohäne lhapuhfwas tä ihi häp m'ak tä lhamel isiyeja. ₂₆Tsi Dios leles tä ihi Macedonia lhäy'e Acaya, lhamel wuj tä ihumin tä ihutwek chinaj t'äj yämthilek ichene häp lhapuhfwas tä newache m'ak che isej tä ihi Jerusalén. ₂₇Matche, lhamel ihumin t'at tä iwoye täja, wet is t'at tä mälhyejtso, tsi Judío lhayis tä ichaye Jesús tisi t'at wichi iyhäj häp m'ak che lehusey isej. Tä mälhyejtso, t'uhawetej tä wichina tä kahäpeya Judío lhayis häte hich'otyeneje m'ak tä hiw'en häp Judío lhayis tä Dios leles, yämthilek t'isanis isej.

₂₈Tä mälhyejtso, che oleyej m'ak tä owoyena, wok oyok, che oyachaje häp lhamel nilhok t'awayhat, wet ohohiyela España, mat ohuthiyeja atapehen. ₂₉Wet che onchätla amehen, kalelhäj tä ochäjla amehen häp Cristo lakäpfwayaj tä lhäy'e lhip tä naya.

₃₀Yaiyhäj, tä oalepuhfwasej Lhawuk Jesucristo lhäy'e lhahumnhayaj tä Espíritu tä Dios T'amajchet hiw'en n'amhohen, olhaip'altsen amehen che alep'ajtitay n'oyej wet alhyenay n'oye Dios, ₃₁yämthilek ifwayhat n'oyej kachuhantses tä ihi Judea, wet Dios leles tä ihi Jerusalén lakäjyaj ihihila che oyachaje lhamel häp t'awayhtes tä ohäne. ₃₂Wet che Dios lenech'ethayaj, onchätla amehen, wet okäjlhi amejen che ow'en amel, wet owohla t'elakw'eta ayej. ₃₃Is che Dios tä n'otamsek tälhe, i'amejen nilhokej amel. Amén.