Wet atsinha lhutsha yok:
1Olham otet iwoye hal'ä lhawo tä ihi Sarón,
wet otet iwoye hal'ä lhawo
tä ihiche tachenhas kawayhil.
Wet hin'o mamse nichulho wet yok:
2Ihumnek, tä lhewej atsinha lhutshay iyhäj,
atet iwoye hal'ä lhawo tä lhahi ch'uthanil,
tsi lenu'pe lhamel tä aisilataj.
Wet atsinha lhutsha äp yok:
3Ihumnek, tä lhewej hin'ol mamses iyhäj,
atet iwoye hal'ä tä ihi tayhi
tä lhay akäj tä matche tä hupel.
Ohumin tä ottayhiphä ahupel,
wet tet iwoyek ay chik ihi ok'aj hik'onekyenho.
4Lehän n'oye haw'et häpkhilek y'echufwi
tä n'akäswethä n'amejen,
wet lekäfwel n'oyej aka bandera
tä häpe ahumnhayaj.
5Chunhan n'oyej uvas tä n'osuytshay
wet käjyenlhi n'oyej hal'ä lhay iyhäj tä akäj.
Tsi oy'ilejlhi t'at ohumnhayaj tä oti amej.
6Let'alayen n'oyej akwey tä hats'amkat,
wet letatsufwel n'oyejej akwey tä afwomkat.
Wet hin'o mamse nech'e tahuyej atsinhay tä lew'et Jerusalén wet yok:
7Jerusalén ka'tsinhay, äm matche ämet.
Is chik atet iwoye ch'iwase
wok tson'a tä ihi tayhi
tä häpe t'at itshätäy tä lakhajyhayaj ihi.
Fwel n'oho tä tek lelhaklitlhi
ohumnek tä imä,
pajla'tha lham t'at tä n'om.
Häp atsinha lhutsha iti lhamhi lhämet wet yok:
8¡Wepa tumcheni!
¡Nek t'at ohumnek, inu alhoho,
tiyäjlhaphä tä nekpe tachenhas!
9¡Tet iwoye ch'iwase
lhäy'e tson'a tä pumfwetaj!
¡Wel'itsi, iw'echehi olhamel olafwek,
iyahinche t'at oka ventana!
10Wet tä iyahinn'o, wet yok,
“¡Ihumnek, matche tä aisilataj!
¡Lhuu, nephä, nek n'okwe!
11Lhek yahinya, tajyäme fwiy'etil
wet nemhit iwomchä.
12Nech'e yachup,
hal'äy tä i'pe honhat iwo lhawoya,
wichi tä ilunpe honhat ichoywethä,
wet päk tum'atpe honhat tä y'iphen.
13Y'o häp higos tä ihiche lhiley,
wet uvas lhawo lenij tä akäjche y'ajpe honhat.
¡Ihumnek, matche tä aisilataj!
¡Lhuu, nephä, nek n'okwe!
14Atet iwoye hokwinaj
tä yen leletnhaweta chowhay
tä ihiche tachenhas tä atoschephä.
Päyen n'oye ate'pe tä isilataj,
wet ot'uhläk oläte achos
tä tet iwoyek hak'onek
chik lhämlhi n'oho.”
Wet nech'e hin'o mamse lhäy'e atsinha lhutsha tä lehumnek lhamel yok:
15N'atsokwethä m'awo les
tä ilhaklit lhalafwek,
häpkhilek nikänchiya
lhaka uva lhiley tä tawoy.
Wet atsinha lhutsha yok:
16Olham tä olewuk ohumnek
wet lham häpe owuk,
wet itihi hal'äy tä lhawol isis
tä ichunhanwethä leläy.
17Tä kamaj ninäma leyalh tä techäj
tä yafwutpe honhat tä honaj,
tä hal'ä hupelis piteschetshi tsi yikhen,
is chik letapil n'oye tä oalehumnek.
¡Is chik lenek, nu alhoho,
nekpe tachenhas tä ihi Beter,
atech'aynej ch'iwase
wok tson'a tä pumfwetaj!
