Zac 12

₁Häp täja Lhawuk lhämet tä yämeje Israel. Lhawuk tä yenlhi pule wet yäm tsajo, wet yäm t'unhi honhat, wet iwo lew'atshancheyaja hin'o, lham yok:

₂–Lhek yahinya, oyenla hat'eshiya Jerusalén, häpkhilek yäm w'oknhas nilhokej wichi tä ihiche honhatil tä atott'ahomche. Che lhamel inuye Jerusalén, tehla inuhiyela iyhäj honhates tä hupuy ihiche tä ihi Judá. ₃Ifwalatso otech'aynhiyeja tunte tä choyhat häp Jerusalén, wet iwit'äyenhila wichi che häpe che fwetaj ineyhatphä tuntetso. Nilhokhiyeja wichi tä i'pe honhat tä yen tayhfwaya, ₄mat ostunla yel'atas tä n'oka'tshayajchal wet wichi tä iche'pe nemla ihanej iwoyneje m'ak tä iwoye. Ottelhoy iyahnhila'pe Judá lheley, mat wichi iyhäj lew'utey oyenla asnamisa. ₅Che Judá kaniyatey hiw'en täjtso, yohlak, “Lhawuk tä laj letumfwaya häpe Jerusalén laka Dios tä ikhajyen laka wichi.”

₆“Ifwalatso Judá kaniyatey otech'aynhiyeja itäj, wet letayhfwas otech'aynhiyeja hal'äy wok yachuyaj t'ähes tä y'ohen pajla'tha nofw. Ihämthihena nilhokej wichi tä ihiche honhatil iyhäjpej tä iwhäye, mat Jerusalén ihihilat tä ihi wet laka wichi lewit'äyhyaj ihihit'a. ₇Olham tä Lewukn'o ochunkatlak ofwayhthen Judá lheley, häpkhilek David lepes lheley len'ohyaj lhäy'e Jerusalén lheley len'ohyaj lhaknitiya'pe iyhäj Judá lheley len'ohyaj. ₈Ifwalatso ot'uhiyela lhamel tä ihi Jerusalén, wet lhamel tä lak'efwhayaj ihiche nech'e lakhajyhayaj ihiyeja, tehlat iwoye rey David, wet David lepes lheley tehlat iwoye Dios, wet oka ángel ichunlahlä lhamel. ₉Ifwalatso otäyhthila wichi at che häpe che inuye Jerusalén.

₁₀“Ow'enhihola David lepes lheley lhäy'e Jerusalén lheley häpkhilek iwo t'alhyaja wet lhaip'altsen n'oye. Wet lhamel iyahnhila t'at elh tä lhamel itshänho, wet y'äyenhila, tehlat iwoye elh tä y'äyenche lhäs tä lechunkatsek tä tatäy, wok lhäs tä nilhäy'eya elh. ₁₁Ifwalatso äytajichela Jerusalén lheley letichunhayaj, tehlat iwoye tä õntichunche Hadad-rimón tä ihi honhat tä Meguido lech'o. _12-13Nilhokhiyeja wichi tä ihi honhat letichunhayaj äytajche. David lepes lheley tafwichelahchä tä ihi lew'et, wet lech'efwas äp tafwichelahchä tä ihi lew'et lhip elh. Wet David lhäs Natán lepes lheley tehlat iwoye, lhäy'e Leví lepes lheley, lhäy'e Leví lecheyäs Simey lepes lheley. Lhamel iwohla lhafwyhayaja tä ihiche lew'etes, wet lech'efwas äp iwohla lhafwyhayaja tä ihiche lew'etes lhipey iyhäj. ₁₄Wet äp iyhäjpej che iche lhip che häpe letichunhayaj äytajichela, wet lech'efwas w'enhahila lhamej lhip tä ihi tä tafwchehchä.