Zac 7

₁Täjp'ante cuatro nekchämis tä rey Darío ihi leniyatyaj, häp iwel'a nueve tä lhey Kisleu wet ifwala cuatro, Lhawuk tahuyej profeta Zacarías. _2-3Lewhäytso hin'o tä lhey Betel-sareser tä lew'et Babilonia ichene Jerusalén häp leniyatfwa lhäy'e hin'ol tä lech'otfwas, ne'tek t'alhe Lhawuk tä laj letumfwaya lech'otyaj. Wet tay'ätshene profetas lhäy'e sacerdotes tä Lhawuk Lew'etwos wet yok:

–¿Hä is che olhamel otujlhache okey tä oyäm äytajche otichunhayaj lhäy'e tä olhaichuyhathen nekchämpej tä nichätepej iwel'a tä cinco?

₄Wet Lhawuk tä laj letumfwaya nech'e tahuy n'oyej wet yok:

₅–Fwenho nilhokej wichi tä ihi honhatna, lhäy'e sacerdotes, Ihi setenta nekchämis tä alechuyhathen lhäy'e tä lhämay äytajche atichunhayaj tä lechätayepej iwel'a tä cinco lhäy'e tä siete. Mat olhamhit'ak leti n'oyej tähestso. ₆Wet tä let'ekhen wet leyäyay, amel t'at tä alekäsyenwethä amejen. ₇Häp tä tetso tä ofwenhohte profetas tä pajchehen, wet häp tä lhamel ifwenhohte achätilis täjte Jerusalén letamsek ihi wet wichi tapoyej, lhäy'e hupuy tä ilunej, wet äp y'aje t'at lhipey tä tapinhiye lhäy'e honhat tä w'awulhchä tä iwhäye lewomekitaj.

₈Wet Lhawuk äp tahuyej profeta Zacarías wet yok:

₉–Häp täja m'ak tä one'tek lewoye. Ämay is alhoho akalelhthayajay tä lewoyaye, wet alep'altsenhen. ₁₀Yej ch'atejen tesalis, chipenhas, honhat elh lheley, lhäy'e p'elitses. Yej waklhatej aelh lewit'äyhyaj.

₁₁Mat wichi tek iwoyehte, iyahinche lew'echehi, lhayen ch'otech'ola. ₁₂Lhamel yäm t'un lehusey, tet iwoye tunte tä t'un, tek iwatläk tach'ahuye Lhawuk lhämtes tä häpe lechufwenyaj tä laka Espíritu ifwenho profetas tä pajchehen häpkhilek lhamel iwo silätayej wichi. Wet häp tä Lhawuk tä laj letumfwaya yäm wuj lewäk tä itiyej lhamel ₁₃wet yok:

–Tä lhamel nitch'ahuyaye olhämet, te otch'ahuhiyet'a che fwetaj t'än n'oye. ₁₄Häp tä tamenej tä ofwtsatkatpe honhatil, tet iwoye tä wejsuyhomtaj ichäjphä, wet lhayej t'at wichi tä nitäfwelayej. Wet laka honhat tä isilataj nemhit is, ts'anis t'at, wet ihichet'a elh tä yen lew'eta.