Äp Zacarías lew'enek tä lepes tä häpe kaletas tä n'oka'tshayajchal
1Tä oyahinphä, wet äp iche elh ow'enek, cuatro kaletas tä n'oka'tshayajchal tä nekche tachenhas tä bronce lakawayhi. 2Kaletaj tä ichun yel'atas tä iton ichätchehen, wet yel'atas tä ichalas iton elh kaletaj tä y'ununche. 3Yel'atas tä ipelas äp iton elh kaletaj tä tres, wet elh tä lepes yel'atas tä hits'ajchehen tä iton. 4Wet oty'ätshene ángelnaj yämlhi n'oho, oyok:
–Iwuk, ¿atsi m'ak tä häpe tähestso?
5Ángel nichulh n'oho, yok:
–Tähestso häpe leyalh lhayis tä ihi cuatro tä tälho tä Lhawuk tä nilhokej honhat laka Niyat tatache. 6Kaletaj tä yel'atas tä ichalas iton tatay tafwojyhiye. Elh tä yel'atas tä ipelas iton tataye tä ifwala y'uyhi. Wet elh tä yel'atas tä hits'ajchehen iton tatay tapinhiye.
7Wet inuphä yel'atas, lhaikhajyenhen tä t'uhläk ilunpe honhat. Wet ángel yok:
–Lunpe nilhokej honhat.
Wet lhamel iwoye t'at täjtso.
8Tä tajyämehen lhamel, ángel t'än n'oye wet yok:
–Lhamel tä tatay tafwojyhiye iwohiyela m'ak tä Lhawuk laka Espíritu ne'tek iwoye tä ihi honhattso, häpkhilek Lhawuk ileche lewäk.
Lhawuk ne'tek õ'ti'pe corona Josué tä häpe Sacerdote tä Lhamya
9Lhawuk tahuy n'oyej wet yok:
10–Hin'ol tä lheyis Helday, Tobías wet Jedaías, lhamel nämhen tä tefwayej honhat tä Babilonia. Mäh hutwek oro lhäy'e plata tä lhamel yen n'otw'ayhtesa, wet hänela Josías, Sofonías lhäs, lew'et. 11Enlhila Josadac lhäs Josué tä Sacerdote tä Lhamya lhetekp'ot tä tälhe oro lhäy'e plata, wet tila'pe lhetek. 12Wet fwenhola olak, “Lhawuk tä laj letumfwaya lhämet yokwe, Lhek yahinya niyat tä nech'ayek tä tälhe wichi tä tälhe letes David, mälhyej tä hal'ä lhacha tälho letes. Lhamlak inech'aynhi Ow'et tä Ot'amajchet. 13Che inech'aynhi Ow'et, ikathiyeja rey leniyatyaj wet tatayhiphäla'pe niyat howet. Wet Sacerdote ihlawhäye tä i'pe leniyatyajw'et, wet letamsek ihiyejena. 14Wet corona äp õ'tihihila Owukwe tä Ot'amajchet, häpkhilek lew'et t'at. Wet che mälhyejtso, õyenhipeja tichunhayaja Helday, Tobías, Jedaías, wet Josías tä Sofonías lhäs.”
15Nämhihena wichi tä atosehen häpkhilek tach'ote Lhawuk Lew'et tä õ'nech'aynhi. Che mälhyejtso, amel lehanhiyeja tä Lhawuk tä laj letumfwaya tä ichenn'o amehen. Tehlatso che amel letach'ahuye Awuk Dios wet lewoye lhämtes.
