Sof 2

₁Ap'ajtitwek, wo ahusey iyhäja,

amel tä ahäpehen wichi tä laj len'äfwlhiya,

₂tä kamaj ninäma amehen ifwala

tä Lhawuk iti amejen lewäkw tä häpe itäj,

wet atehlat iwoye hup tä leyalh yafwutphä,

nofw t'at tä ikatsi.

₃Is chik lelhokej amel tä let'ukwe Lhawuk,

häp amel tä ka'ahäpeya wichi tä lhaichäjwethä,

amel tä lewoye Lhawuk lhämtes tä ne'tek lewoye.

Enlhi m'ak tä is alhoho wet a'ayhatchehchä.

Chejiphäla wet Lhawuk aifwayhthen

chik näm ifwala tä lham iwo lewäkwa.

₄Häp hupuy tä lhey Gaza nech'e ts'anisla t'at,

wet Askalón wasihila t'at.

Wichi tä ihi Asdod õyokosiphäla ifwalayej,

wet Ekrón tehlat iwoye hal'ä tä õ'tonhi,

wichi nemhit ihi.

₅¡Awit'äy i'amejen,

amel tä ahäpehen Filisteo lhayis,

tä atetsel lew'et p'ante Creta

wet ifwalasna lhen haw'eta lewomekitaj lhipey!

Häp täja Lhawuk lhämet tä lakalelhthayaj,

tsi tatay ahilähen wet yok:

“Owasthihila aka honhat tä ihi Canaán lhip,

oaitäyhthihena wet niwohit elh amel chik imälhehihila.

₆Häp aka honhat tä i'pe lewomekitaj lhip,

nech'e häpkhila itshätäy t'ekhawtes lhäy'e lehis,

wet tajlhamhiyelat wichi tä t'uye tä ilunpe.”

₇Wet Judá lhayis tä kamaj imälhehiche,

lhamel tä lhayenla lewuhuya honhatna.

Lhamel t'uhiyehena leläy,

wet chik honatsipej tä iwo t'elakw'etesa,

imähikwelachufwi häp hupuy

tä nemhit lewuhuy ihi tä ihi Askalón.

Tsi Lhawuk tä laka Dios iwo elha

m'ak tä iwoyeje lhamel, wet tach'ote.

“Oläte häp Moab lheley lhämtes

lhäy'e häp Amón lhayis leläkwyhanyaj

tä lhamel itiyej oka wichi,

wet lhaichäjejwethä tä isohiyeja

oka wichi laka honhat lhip.

Häp tä tamenej tä oyäm akalelhäj olhämet

tä ohäpe Dios tä n'ilataj, oyok,

Otech'aynhiyeja Sodoma häp Moab,

wet Amón lhayis häp tä tehlat iwoye Gomorra.

Wet nech'e häpkhila honhat nosoy,

ch'uthanil t'at chik tälhila'pe,

wet lajit lepesa tä nemla is.

Wet oka wichi tä imälhehiche

isohiyeja lhamel lakäywet lhäy'e laka honhat.”

₁₀Häp täja laha häp m'ak tä iwoye

Moab lheley lhäy'e Amón lhayis,

häp tä iläkwethä Lhawuk

tä laj letumfwaya laka wichi

wet lhaichäjejwethä tä tatayhlä.

₁₁Matche tä tanhoch'ayhla Lhawuk

chik tatayhlahlä lhamel,

tsi häp tä yämla nofwej

nilhokej n'ocheyälis tä ihiche honhatil.

Wet nech'e lham tä nilhokhiyeja wichi

tä ihiche lhamel laka honhatil tä n'okwihiyeja.

₁₂Amel tä ahäpehen Etiopía lheley,

te amel Lhawuk ilänla amejen lefwajnhat.

₁₃Lhawuk ipiynhila tafwojyhiye takwey,

tsi iwasthihila Asiria wet ikänchihla

laka hupuy tä lhamya tä lhey Nínive.

Wet nech'e Nínive häpkhila

honhat tä ts'anis tä tamchäy, inät ihit'a'pe.

₁₄Õ'tonhihichela laka ch'utey,

wet õyenla itshätäy tä n'oläy lehisa lewukwey,

wet itshätäy tä tayhlheley yenla lew'eta.

Chilichuk lhäy'e ch'ustas

yenla lelakata ch'utey tä atoschephä,

wet tsetwos ihihichela laka ventanas lhäy'e lepelis.

₁₅Häp täja hupuymhaj wichi tä ihi lhaichäjejwethä,

yenhiyejt'ak mälhhiyejatso lewit'äy,

letamsekis ihi wet yopej:

“Niwohit honhat chik te iwoye olhamel oka honhat.”

Mat oyok, wasi hupuy,

itshätäy tä fwitses yen at lhokweya.

Wichipej tä inu lhipche

yafwutchehen lepästey tä iläkwlhi,

wet ilanejwethä lhethey

häp leläkwyhanyajay tä iwoyeje.