So David quepegue' yi na'laua so filisteoipi
1Qam so David ra'deenataxantaco', 'naaco':
—Canchaqaica na'xa'a, ca' yalauat so Saúl. Vichiguiño' paguec la'maxa quiyim seet, saigue da la'a' na filisteoipi, qaiyi ñi Saúl yayaxanñi, tot imitaque aỹim quená'ogue na na'laua na Israel llaalqaipi. Ca' yayit, no'm chaqaida shine'tegue.
2Ca' so David chaqai so seiscientos nalliripi liỹaatac, ca eec, quepegue' yi na'ñi so Aquis, nashi quiyi Gat. So'maxare leta'a so Maoc. 3Ca' so David chaqai so nalliripi na'ñi yi Gat, lauora so Aquis. Ca' quiñi 'óna chaqai ỹaatqata cá'maq chaqai llaalqaipi. Ca' so David chi liỹareta'pe saua dos loua': aso Ahinoam na'ñi na'le yi Jezreel, chaqai aso pa'ỹe Abigail, loua na'le yi Nabal, na'ñi na'le yi Carmel. 4Ca co'na' so Saúl ỹa'den quiyim so David 'eet, taigue da Gat, ca' ỹaxanñi, tot idaanaque.
5Ca' so David 'naaco' queso Aquis:
—Qami' ỹashi, no'm ỹaatqajam llic rqouaquitegue aỹim, ca' nagui, ca' ñi'xoresene'tot qami' quiyim vite ca yayañiralec quena na'aateripi quena na'laua'e'. Ma' ỹim relaachiqui', ca' se ỹa'maxañi quiyim qami' iuora quena ra'aachi' quiyim loqoisa'a na qauochi' laseripi.
6Ca' chaqaisoota so na'xa'a, ca' so nashi Aquis ỹaanem so David quiyim naalec yi na'a' Siclag. Ca vichiguiño' chi ỹovireta'a nagui yi Siclag la'a' liỹa na llaalqaipi so Judá.
7Ca' so David neetalec yi na'laua so filisteoipi queso 'óna ñaaxa chaqai saua cuatro shiriguiri. 8Ca' so David chaqai so nalliripi quepegue'o' quen yi Gesur, Gezer chaqai yi Amalec, ca nouora'gue na louenec ná'maq naalec yi 'laua, ỹovira'a yi Telaim chaqai yi Shur, chi ỹovireta'a yi Egipto. 9Ca nalauajño' quen ná'maq neetalec yi 'laua, nomachichiguiñi ná'ogue na ỹale chaqai ana 'aalo, chaqai i'xato' quen ana qagreta, huaca, na 'ashin, ana nauaanaxanaxa late'e, chaqai vire'to' quen na nooỹac. Ca co'quena'le, ca' pila yi neeta'ñi so Aquis. 10Ca co'quena' renataxan so Aquis: ¿Negue' ca quena na'aateripi nouochi' queso na'xa'a?
Ca' so David 'naaco' quen: Queda 'guiñi quiyi Judá, loqo'm queda 'guiñi quiyi Jerameel, loqo'm queda 'guiñi quiyi na'laua na quenitaipi.
11So David ná'oco' quen nomachichiguiñi na ỹale chaqai ana 'aalo, qaiyi qaica ca quepegue' yi Gat quiyim ra'qaataxan quedá'maq ỹo'ueetetac so'maxare quesaua'que saua na'xata' quiyim neetalec yi na'laua so filisteoipi. Ca' chaqaida 'neeta'gue. 12Ca' so Aquis pe'eeta'gue so David, ma' 'ñiichiquio' quen lauel: Ñi David mashic noquiiaxat quená'ogue na llaalqaipi so Israel, ca ñi'maxare chaqai 'neetari' quiyim ilaatec ma'le.
