Qaỹa'ue ma'le ca nouaxanaxaset ná'ogue na liỹa qomyipi
1Dajo dá'maq la'qaatec na'le so Amós. So'maxare icoñiguit chicqo'ot ñi qota'olec quedá'maq 'neeta yi Israel, na' saqa'lecaua dos ñaxari quiyim novi' so quiyim i'loxol na 'laua, na' ñaqai neetaho quiyim nashi so Uzías quiyi 'laua Judá, chaqai so llaalec so Joás, leenaxat Jeroboam, nashi quiyi 'laua Israel.
2Quena' ñi qara'gaxala' ỹo'uet quiyim qara'xaỹaque da lavillaxac 'ec soxonaxa,
chicqochi'ñi ada qa' ladocai Sión quiyi Jerusalén,
ca' naua 'lauari 'xoic na 'uaqapi ỹaso ma'le,
chaqai nasogoñi ná'maq hueetalec na lo'lo ada qa' ladocai Carmelo.
Qaro'ỹa yi 'laua Siria
3Ca 'neetasa' da la'qaatec ñi qara'gaxala':
Yi qomyipi na'ñi yi na'a' Damasco ỹaatqajam 'xoic na ỹo'ueetetac se no'uen,
ca' mesqai saxane'tegue quiyim se sa'ue ca nouaxanaxaset;
ma' 'xoic da lqa'viic quiyí'maq na'ñi yi Galaad, ỹodoota'a na fierro.
4Vichiguiño' sillaugui ma'le ca norec ñi lauo' so nashi Hazael,
ca' sojo norec nopoxoỹaxajñi ma'le yi lauootoripi leta'allipi so nashi Ben-adad.
5Sopoxoỹaxateraho ma'le naua lasomi' lquepaqataxanqate' yi na'a' Damasco;
ñopoxoỹaxajñi ma'le ñi nashi quiyi ca'megue se no'uen,
chaqai ñi nashi quiyi nishiquiaqa',
chaqai na na'ñi yi 'laua Siria noxonec ma'le, ca qai'xategue da 'laua Kir.
Dajo 'naac ñi qara'gaxala'.
Qaro'ỹa yi 'laua Filistea
6Ca 'neetasa' da la'qaatec ñi qara'gaxala':
Yí'maq na'ñi yi na'a' leenaxat Gaza ỹaatqajam 'xoic na ỹo'ueetetac se no'uen,
vichiguiño' sqaica ma' se so'uet quet ca nouaxanaxaset;
ma' loxonec sá'ogue so 'óna na'a' lodegaxat,
ca' imen quiyi 'laua Edom, quiyim na'aquipi.
7Vichiguiño' scopata'alo ma'le naua lquepaqataxanqate' yi Gaza,
ca' cajo norec nopoxoỹaxajñi na nashi lauootoripi.
8Ñopoxoỹaxajñi ma'le cá'maq nashi quiyi na'a' Asdod
chaqai cá'maq ỹoiquentac yi na'a' Ascalón.
Ca ma'le, ca' ¡somatalec da iquesaxanaxa yi na'a' Ecrón,
ca vire'ta ca co'uaataxanaxaỹom quena filisteoipi ileu ma'le!
Dajo 'naac ñi qara'gaxala'.
Qaro'ỹa yi Tiro
9Ca 'neetasa' da la'qaatec ñi qara'gaxala':
Yi qomyipi quiyi na'a' Tiro ỹaatqajam 'xoic na ỹo'ueetetac se no'uen,
ca' sqaica ma' se so'uet quet ca nouaxanaxaset;
ma' ỹaanec quiyim noxonec queso lquesaxanaxa yi 'laua Edom
sá'ogue so qomyipi só'maq na'deene'e' na'le quiyim 'neeta'gue ca lqaỹa.
10Vichiguiño' scopata'a ma'le na lquepaqataxanaxat yi Tiro,
ca' so norec nopoxoỹaxajñi ma'le na lauo' na nashillipi.
Qaro'ỹa yi Edom
11Ca 'neetasa' da la'qaatec ñi qara'gaxala':
Yi qomyipi na'ñi yi 'laua Edom ỹaatqajam 'xoic na ỹo'ueetetac se no'uen,
ca' sqaica ma' se so'uet quet ca nouaxanaxaset;
ma' 'xoic da lqa'viic, lo'qoota'a so lecat,
rocanaxantapigui so lqaỹaripi, llaalqaipi so Israel.
Ỹaatqajam se nollaalta' queso lauel,
chaqai so lonogoxonaxac qaican quepaxat.
12Vichiguiño' scopata'a ma'le yi na'a' Temán,
ca' cajo norec chi ỹovireta'a ma'le quiyim nopoxoỹaxajñi yi nashi lauootoripi quiyi na'a' Bosra.
Qaro'ỹa yi Amón
13Ca 'neetasa' da la'qaatec ñi qara'gaxala':
Yi qomyipi naalec yi 'laua Amón ỹaatqajam 'xoic na ỹo'ueetetac se no'uen,
ca' sqaica ma' se so'uet quet ca nouaxanaxaset;
ma' quedá'maq lishoxo quiyim nqo'naxatec yi na'laua,
ca' ichaqa'gue ỹauata'gue na 'aallipi 'manaxaipi naalec yi 'laua Galaad.
14Ca vichiguiño' scopata'a yi lquepaqataxanaxat yi na'a' Rabá,
ca' sojo norec nopoxoỹaxajñi ma'le na lauootoripi yi nashillipi,
ỹalequeta'piguit na naualaxaquipi queso lauataq
chaqai quena' nouaxanaxanshiguim na nonot lodegaxat.
15Chaqai ñi lashi qaico'ỹaxantañi qaỹauega yi ỹoqa'a 'laua,
liỹaata so lotauaripi nalliripi.
Dajo 'naac ñi qara'gaxala'.
