Ñi qota'olec i'gueno' da lpi'ỹaxac so Abraham
1Ca co'na' 'vii saua ñaxari, ca' ñi qota'olec i'gueno' da lpi'ỹaxac so Abraham. Ca roỹaxano' da leenaxat, ca' so'maxare 'naaco':
—Aỹim.
2Ca' ñi qota'olec 'naaco' queso'maxare:
—Coñita ñí'maq 'oonoqui' qachaalqui' Isaac, ñí'maq paguec rqo'itaxachi'. Ca' quirepegue' yi 'laua leenaxat Moriah. Ca ma' vichita yi'maxare, ca 'ỹaañiro quiyim vigaxachi' vite rachitaxanataxanaxachi', lli'ralec adá'maq quemaralec ladocai sachaxanem qami' ma'le.
3Ca' queso liỹa na'xa'a ñaq nete'etam, ca' so Abraham na' ne'laxashiguim, ca ỹo'ueejlec so lalo 'ashin, iỹoxolec queso nqo'paq ỹauaaque lcopatoxonaxat. Ca' eec quepegue' yí'maq ỹicapi'ño' ñi qota'olec, liỹaatac so llaalec Isaac chaqai saua dos lelaatqa. 4Ca' na' ime'ueque saua tres na'xata' queete', ca' so Abraham ñaq qoỹoqo'ta, qa' iuane'to' só'maq qoỹicapi'ñi. 5Co'na'le, ca 'naapegalo' saua lelaatqa:
—Ñaq qovihe'e quenajo loxoita'a na 'ashin, ca dá'maq ỹaalec chaqaỹim qolaxapegue' yijo 'laua. So'ueetaq ca qanqouagaxainaxac quiñi qota'olec. Ca ma' ime, ca yapilaxari' quenajo.
6Co'na'le, ca' so Abraham ỹaconot so qo'paripi ỹauaaque lcopatoxonaxat, ca' illaalec na lallaac so Isaac. Ime, ca' icona so lecat chaqai so lole', ca' que', niỹareta'pe. 7Ca na'le, ca' 'naaco' so Isaac queso Abraham:
—¡Ita'a!
—¿Negue'ca, ỹaalec? —'naaco' so Abraham.
—'Ajñi' —'naaco' so Isaac—, 'ue na' qanqo'paq lasoc ca norec, qam cá'maq qagreta llaalec nachitaxanataxanaxat ¿negue' ca hueeta'gue?
8—Ỹaalcolec, —'naaco' so leta'a—, ñi qota'olec ỹo'uet ma'le cá'maq ỹachigoxota'gue cá'maq qagreta llaalec quiyim nachitaxanataxanaxat.
Ca ñaqai queete' niỹareta'pe. 9Ca co'na' ỹovijta cá'maq ỹicapi'ñi ñi qota'olec, ca' so Abraham ỹo'uet aso lcopatoxonaxalate, ỹa'maxajñi ca qo'paripi; ca na' ime, ca ỹaxat so llaalec Isaac, ca' illaalec aso lcopatoxonaxalate pa'xanashiguim queca qo'paripi. 10Qam na' no'vicshiguim so lecat quiyim ỹalauat so llaalec ỹa'ue lachitaxanataxanqate, 11ca' so lelaatec ñi qara'gaxala' roỹaxan, 'maqot na piguim, 'naaco':
—¡Abraham! ¡Abraham!
Ca 'naaco' so Abraham:
—Aỹim, seuete'e najo.
12Ca' so nelaatec piguim le'ec 'naaco' queso'maxare:
—Totaxan vite ca 'ñitetegue na noctoqui', ma' mashic sa'den quiyim 'ue da rqolonaxa'e' quiñi qota'olec, ma' qainaatam na qachaalqui', qam sqo lli'rapiguim.
13Ca co'na' na'ỹaashiguim so Abraham, ca iuane'to' so qagreta llaalec que'eensaho naua lasote caso qo'paq. Co'na'le, ca' eec iconlec so qagreta loua', ca' ỹaano quiyim lachitaxanataxanaxat, ñigui nqai'en so llaalec. 14Ca na' ime, ca' so Abraham ỹa'uo' da leenaxat yijo 'laua, leenaxato' nqai'en: Ñi qara'gaxala' ỹa'ue cá'maq qaỹouentaque. Vichiguiño' nagui qaiyiita qohinac: Cada quemaralec ladocai ñi qara'gaxala' ỹa'ue cá'maq qaỹouentaque.
15Ca' so nelaatec piguim le'ec liỹa roỹaxana so Abraham. 16Ca 'naaco' queso'maxare:
—Ñí'maq qara'gaxala' 'naac: Ma' qami' 'viichi' dajo, chaqai quiyim se rauochitegue caỹim ñi 'oonoqui' qachaalqui', ca' nagui saanec da ỹa'qaatec ñallitalta', 17ỹaatqajam 'xoic ca iqouagaxa caqami' ma'le. Chaqai 'xoic nqaishin ma'le ca qachaalaxai'pi, 'nejem ana huaqajñi hueeto'ot na piguim; chaqai 'nejem na lo'uaxanaxa hueeto'oto naua lahil ana lachiugue. Chaqai ca'maxare sqaica lovi' nqai'en na npa'guenaxauaripi. 18Chaqai ná'ogue na ỹoreta'oguit qomyipi hueetalec ana 'laua 'xoic ma'le ca la'maxa, chicqochigui nqaishin ma'le ca'maxare, ma' na'xaỹaxanchiriua'.
19Ca' so Abraham pila yí'maq hueesa'ñi caua lelaatqa. Ime, ca saua'que taategue da Beerseba yí'maq na'ño' na'le so Abraham.
Saua llaalqa so Nacor
20Ca co'na' mashic shi'gom dajo, ca' so Abraham 'uo' so la'xaỹaxac quiyim so lqaỹa Nacor qai'neeta 'uo' so llaalqaipi caso Milca. 21Só'maq 'auaxaico' ne'qaañi llaalec na'le leenaxato' Uz. Ime, ca ne'qaaño' so lqaỹa leenaxat Buz. Ime, ca lotqai so Kemuel só'maq leta'a so Aram. 22Ime, ca lot ne'qa'iñi saua Quesed, Hazo, Pildas, Jidlaf chaqai so Betuel. 23Ca' sojo Betuel chaqaiso só'maq leta'a aso Rebeca. 'Enaua nauá'maq ocho llaalqa so Milca queso Nacor, lqaỹa so Abraham.
24So Nacor 'vii saua liỹa' llaalqa caso leloxoỹaxanata leenaxat Reúma. Ca saua'maxare chaqaisaua saua Teba, Gaham, Tahas chaqai so Maaca.
