So llaalqaipi so Abraham caso Cetura
1So Abraham 'uo' aso dalaxai loua leenaxat Cetura. 2Ca' so llaalqaipi caso'maxare chaqaisaua saua Zimram, Jocsán, Medán, Madián, Isbac chaqai so Súa. 3Ca' so Jocsán chaqaiso so leta'a so Seba chaqai Dedán. Ca' so llaalqaipi so Dedán chaqaina na asureoipi, na letuseoipi chaqai na leumeoipi. 4Ca' so llaalqaipi so Madián chaqaiso so Efa, Efer, Hanoc, Abida chaqai so Elda. Ca' najo ná'ogue na llaalqaipi aso Cetura. 5Qam so Isaac mashic shi'gue taalec dá'ogue da lesallaxa so Abraham. 6Ca' so llaalqaipi so Abraham quesaua liỹa' loua' na' ñaq nca'leetauec so'maxare, ca' chi ỹa'ue na lame quiñi 'óna. Ca' so llaalqaipi ca'e nqai'en yí'maq neeta'ñi so llaalec Isaac, ilata yi 'laua pa'a'gue da lqodoigue.
Dá'maq 'neeta na' ileu chaqai na' qaishinñi so Abraham
7Ca' so Abraham ỹovite'o' saua ciento setenta y cinco ñaxari, ca ỹovita ca lqodoc aca lqauaxaqui. 8Ca co'na' mashic ỹaatqajam qo'xoỹom, ca' ileu, ỹalauat dá'maq chi lqo'xo. Ca' eec lapoouo queso 'auaxaic leta'allipi. 9Ca' qaishinño' na'le quesauá'maq chaqai llaalqa Isaac chaqai so Ismael quiñi lauac na'ñi yi Macpela, pa'a'gue da lqodoigue quiyi Mamre, na'laua so Efrón, llaalec so Zohar só'maq hitita le'ec. 10Yijo 'laua chaqaiyo' yí'maq lishiujnaxanaxato' na'le so Abraham queso hitita laseripi. Ca hua'ño'yi na'le na' qaishinñi so Abraham, qaỹauaxaỹaxane'te' aso loua Sara. 11Ca co'na' mashic tot qaica so Abraham, ca' ñi qota'olec nqouaguegue so Isaac na' neeta'ñi yi seeque'ta yi na'ñi aso ni'ỹa leenaxat Ñí'maq nca'leetauec chaqai iuañiua'.
So llaalqaipi so Ismael
12Ca' 'ena na llaalqaipi so Ismael só'maq llaalec so Abraham, late'e aso Egipto lase leenaxat Agar, lelaata aso Sara. 13'Eda da 'neeto' na' qoỹiriñi na' ne'qa'iñi: saua Nebaiot só'maq ỹi llaalec, ime, ca' so Cedar, Adbeel, Mibsam, 14Misma, Duma, Massa, 15Hadar, Tema, Jetur, Nafis chaqai so Cedema. 16Nauajo nauá'maq leenqate' saua doce llaalqa so Ismael. Ca' chaqaidauate' dauajo leenqate', ca qaỹa'deene' naua 'lauari neetalgoto chaqai naua la'aate'. Quiñi 'óna, ca nashi quecá'maq chaqai llaalqaipi.
17Ca' so Ismael ỹovito'o' saua ciento treinta y siete ñaxari, ca' ỹovita ca lqodoc aca lqauaxaqui. Ca co'na' ileu, ca lapou'a so 'auaxaic leta'allipi. 18So llaalqaipi naalco' yi 'laua vichiguiñiguilo yaua Havila chaqai yi Shur, naloote'oga yi Egipto queso nayic taỹa'gue da Asiria. Ca' naalec yi'maxare, 'eno'm se ỹa'maxaren so lqaỹaripi.
Da ne'xaỹoqsoxogue' saua Jacob chaqai so Esaú
19Dajo dá'maq na'qaataxac so Isaac só'maq llaalec so Abraham. 20So Isaac ỹovito'o' saua cuarenta ñaxari co'na' o'ñiguit aso Rebeca só'maq llaale so Betuel chaqai lqaỹa so Labán, sauá'maq arameo nera'ñi yi Padan-aram. 21Ca' so Isaac nqouagaxainot ñi qara'gaxala', rashiilaxanlec aso Rebeca, ma' aso'maxare qaica ca llaalec. Ca' ñi qara'gaxala' 'xaỹa so nqouagaxainaxac, ca' 'man nqai'en aso Rebeca. 22Qam huaaya'o' saua'maxare, ca reloguiỹato'o' quen quena lauel aso late'e', ca aso'maxare ra'deenataxantaco', 'naaco': No'm chaqaida 'neetari' dajo, ca ¿negue' quet cá'maq 'neeta quiyim queeta yca'leetauec?
Co'na'le, ca' quepegue' ñi qara'gaxala' inat. 23Ca' ñi qara'gaxala' 'naaco':
Na qavilli' hueesagui yaua dos qomi'
chicqaugui ma'le ca ỹoreta'oguit qomyipi;
dos yaua neuo' lase' saqa' ne'qa'iñi,
qala' reloquitecta'.
'Óna yi paguec lquesaxanaxa ma'le quiyi liỹa,
yí'maq na'aasa ỹapacauec ma'le quiyí'maq ỹi.
24Ca na' ỹovita ca laloqo' quiyim co'o aso Rebeca, ca huaaya' saua llaalqa. 25Só'maq 'auaxaic ne'qaañi sá'ogue huenaq, toc na laue. Ca' qoỹanegue leenaxat Esaú, loqo'm huenaq. 26Ime, ca' ne'qaaño' so liỹa lo'qootañi ana la'ỹaaxa so Esaú. Vichiguiño' qoỹanco' leenaxat Jacob, loqo'm choxonataxanaxai. Ca' so Isaac ỹovito'o' saua sesenta ñaxari co'na' ne'qa'iñi saua llaalqa aso Rebeca.
So Esaú imen dá'maq taalec quet nesallaxa
27Ca co'na' ỹi' saua ñaqolqai', ca' so Esaú ỹovireta'a quiyim no'ueenaxa lo'o, ca ỹaatqajam ỹa'den da leparaxanaxac; qam so Jacob nqo'ta na'maxateta chaqai quiyim se redaỹari' queca la'a'. 28Ca' so Isaac ỹaatqajam lqo'itaxat so Esaú, ma' ỹa'queetac ná'maq loxonec so'maxare. Qam aso Rebeca lqo'itaxat so Jacob.
29Ca 'uo' so na'xa'a reuosetaco' so Jacob, co'na' noviro so Esaú ỹaatqajam isot, chicqauec quena no'ueenaxa. 30Ca 'naaco' queso Jacob:
—Qouaquiric, vite ca noq quena reuooshqui' toc, ma' yalauat na iqopaaxa.
(Vichiguiño' so Esaú qai'neeta qaỹa'den quiyim qohinac Edom, loqo'm toc.)
31Ca' so Jacob 'naaco':
—'Au taỹa'guit nqai'ñi' caỹim dá'maq nesallaxa qaỹaqatqajantari' caqami', ma' qami' 'auaxaic ñaalec.
32Ca' so Esaú 'naaco':
—Aỹim mashic yileuetac quena iqopaaxa, ca ¿negue' quet cá'maq 'negue dá'maq qaỹaqatqajantari' quiyim taalec aỹim, ma' ỹim 'auaxaic ñaalec?
33Ca' so Jacob 'naaco':
—Nagui nallichiralta' 'ỹaañitot da ra'qaachiqui' ñi qota'olec.
Ca' so Esaú nallitalta' ỹaanec da la'qaatec quiyim taalec nqai'en so Jacob dá'maq qaỹaqatqajantari' queso'maxare, ma' 'auaxaic ñaalec. 34Co'na'le, ca' so Jacob ỹaanem so Esaú so pan chaqai so leuolec. Ca co'na' so Esaú ỹomat so lqui'ỹaxac chaqai da ne'taxac, ca ne'laxashiguim. Ca' eec, qaica ca 'negue nqai'en dá'maq 'neeta quiyim 'auaxaic ñaalec.
