So José ichoxot da leloxoỹaxac saua dos ne'guemataxaco
1Ca co'na' mashic shi'gom, ca só'maq 'taxaqui lo'o só'maq qaỹamaxalec quiyim ỹaanapeguem na ne'taxat lataxa so nashi, chaqai so pan lo'o, 'uo' na'le ca lasauaxasete' queso na'coote', nashi quiyi Egipto, leenaxat Faraón. 2Ca' so Faraón ro'ỹalo' saua dos lelaatqa, so lashi na 'taxaqui lo'ollipi chaqai so lashi na pan lo'ollipi. 3Ca relaataxanlgoto quiyim qaicoñite' quiñi ncoñiitaxanaxaqui quiyi la'a' so lashi so neloxoỹaripi, queso lashi yi Egipto. Ca chaqaiyi neeta'ño' so José ncoñiiteguesec. 4Ca' so lashi so neloxoỹaripi ila'o' so José quiyim cochiỹalo saua dos ỹale'. Ca' saua'maxare mashic 'vio' saua shiriguiri neesaugui añi ncoñiitaxanaxaqui.
5Ca 'uo' so pe, ca saua dos ncoñiiteguese', so 'taxaqui lo'o chaqai so pan lo'o, quiñi 'óna 'uo' ca le'guemataxac. Ca' queca 'óna ne'guemataxac 'ue cá'maq chi leloxoỹaxac. 6Ca co'na' nete'etam, ca ra'ỹau'alo' so José, ca iuane'talo quiyim rachicotem'. 7Ca renataxano' so José, 'naaco':
—¿Chi'negue ma' chigoita nagui, chaqai ỹoqa'a na qashiiguii?
8—'Ue so qare'guemataxac, qam qaica cá'maq ichoxot ca leloxoỹaxac —'neraco' saua'maxare.
—Ca ¿mesqaiño' ñi qota'olec ñí'maq ichoxot cá'maq leloxoỹaxac? —'naaco' so José—. Qamaxahi, 'xachii caỹim cá'maq re'guemataxaguii.
9Ca só'maq lashi so 'taxaqui lo'ollipi ỹa'xat so le'guemataxac queso José. Ca 'naaco':
—Quesó'maq i'guemataxac, ca seuane'ta aso 'úva lashi, 10'vii saua tres lasote ñaxaterec, chaqai 'ue ana lenoỹaxai. Ca chaqa'ma' ñigui ana 'úva laxale ỹiita. 11Ca' ỹim, naxan llo'qoota'a aso ne'taxaqui so Faraón nashi quiyi Egipto, ca naxan secono' quen aso 'úva, ca ñilami'ñigui na li'i aso 'taxaqui. Ime, ca lotqai chaqaỹim sañigui ana napoquena so nashi.
12Co'na'le, ca' so José 'naaco':
—Dajo re'guemataxaqui' 'neetasa' da leloxoỹaxac: saua tres lasote ñiguilo yaua tres na'xata'. 13Ca' quenauajo tres na'xata', ca ñi Faraón lotqai liỹa ỹa'ajan cá'maq 'neeta cá'maq 'ñiite'. Ca lotqai liỹa ỹopilaxata'a qami' ca ro'ueenachiqui'. Ca' qami' lotqai pillichirigui dá'maq 'ñiisari'o' quen quesom quiyim 'ỹaañiso'ot aca ne'taxaqui ñi Faraón. 14Ca ma' ỹovita ca na'xa'a quiyim ipaquichigui dajo, ca' qouaquiric no'viñisa'co' aỹim, 'qaataxañitemo' ma'le ca Faraón caỹim, qaiyi naqata'a aỹim quena sentaugui. ¡Nañaañi'o' ca rqouagaxa'e' lodegaxat! 15Ma' chaqaỹim nocataxat quiyi qana'laua qomi' hebreo laseripi. Ca' sqa saiguit quiyim sentaugui ana ncoñiitaxanaxaqui, ma' sqaica quet cá'maq so'uet se ỹa'maxañi.
16Ca' so pan lo'o co'na' 'qa'ta so José na' ichoxot da leloxoỹaxac so ne'guemataxac, ca dá'maq no'uen taỹalec só'maq 'taxaqui lo'o. Ca 'naaco' queso'maxare:
—Ỹim, qam 'neetayi da i'guemataxac: naxan 'vii saua tres lahiri na pan lalagaxaic neesañigui ana yoto. 17Ca' aso pa'aatashiguim pan lahi' hueetañigui ana ỹoreta'oguit naqaulata qaỹahotaque loqo so Faraón. Qam na ỹoipi anac, ca' ỹa'ic aná'maq hueetagui aso lahi' pa'aatashiguim quena iqahic.
18Co'na'le, ca 'naaco' so José:
—Dá'maq reloqo'tegue da re'guemataxaqui' 'neetasa': saua tres pan lahiri ñiguilo yaua tres na'xata'. 19Ca' quenauajo tres na'xata', ca' ñi Faraón lotqai ỹa'ajan cá'maq 'neeta cá'maq 'ñiite'. Ca ma'le, ca' relaataxanlec aqami' quiyim qarcoñiichirishiguim queca qo'paq. Ca anac na ỹoipi, ca' ỹa'ic na ra'aachi'.
20Ca co'na' ỹovirerec saua tres na'xata', ca ỹovire'oga so na'xa'a ne'xaỹoqsoxoqui so Faraón. Ca' ỹo'uet so lemaqachic. Ca' que'e, qui'ỹa'e' ná'ogue na lotauaripi. Ca co'na' reloqota'guit so lalecseripi, ca' so Faraón relaataxana'alo so lashi na 'taxaqui lo'ollipi chaqai so lashi na pan lo'ollipi. 21Ca só'maq 'taxaqui lo'o, ca lotqai ỹopilaxachichi'ñi ca lo'ueenatec, ca lotqai liỹa ỹaanto'ot aso ne'taxaqui so Faraón, 'nejem cá'maq 'auaxaic. 22Qam so pan lo'o, ca relaataxanlec quiyim qaicoñishiguim. Ca chaqaida ipaquichigui dá'maq 'naaco' na'le so José. 23Qam so 'taxaqui lo'o coua'e dá'maq 'naaco' na'le so José.
