Jueces 13

₁Qam so Israel llaalqaipi lotqai ỹo'uet na se nqo'ta ñi qara'gaxala', ca' ñi qara'gaxala' ỹaanec quiyim noxonec queso Filistea laseripi quesaua cuarenta ñaxari.

₂Qam quiyi Zora 'uo' so ỹale neeta'ñi yi'maxare, leenaxat Manoa, chicqaugui na llaalqaipi so Dan. Ca' aso loua se ỹauanapega 'ue ca llaalec, ma' se co'o. ₃Qam so lelaatec ñi qara'gaxala' piguim le'ec nachaxana, ca 'naaco' caso'maxare:

—Qami' ỹaatqajam se ỹauanapega 'ue ca qachaalqui', qam nagui, ca' qami' 'mañi', ca 'ue ma'le ca qachaalqui'. ₄Qam se ni'chirquio' na lataxa chaqai canchaqaica liỹa 'taxat chim, chaqai qaica ca 'qui' quená'maq se qaỹa'ic, ₅ma' qami' 'ue ma'le cajo qachaalqui'. Qam ca'maxare se qanepetec ma'le na laue, ma' cajo noctoqui' da nachaalataxac qoỹaanot ñi qota'olec quiyim saqa' ne'qaañi, qaiyi louenec, qaiyi ca'maxare chaqaica ma'le cá'maq naqatec ma'le na llaalqaipi so Israel queda lquesaxanaxa na filisteoipi.

₆Ca' aso 'aalo eec quepegue' so loua, ca' ra'qaataxana, 'naaco':

—'Ue so ỹale letaxaỹaxanqajnec ñi qota'a. So'maxare quepegue' yi seueta'ñi. Ca' ỹaatqajam ỹo'uet da i'laxa, ma' so'maxare da no'ueenataxac 'nejem da no'ueenataxac na lelaatec ñi qara'gaxala' piguim le'ec. Chaqai se senat negue' so'maxare, chaqai so'maxare sqaica ca 'naapiguiỹa'. ₇Qam so'maxare 'naapiguiỹa' quiyim 'ue ca ỹaalec ma'le, chaqai 'naac quiyim nagui chaqa'ma' se ñi'chigui na lataxa loqo'm canchaqaica liỹa quena 'taxat chim, chaqai se sa'ic cá'maq se qaỹa'ic. Ma' cajo noctoqui' da nachaalataxac qoỹaanot ñi qota'olec quiyim louenec ma' saqa' ne'qaañi, ca' chi ỹovireta'a ca lqodoc aca lqauaxaqui'.

₈Ca co'na'le, ca' so Manoa nqouagaxainot ñi qara'gaxala', 'naaco':

—Ỹim ñi'xoresene'tot, qami' ỹa'gaxala', quiyim liỹa nelachi' cajo ỹale coqomi', qaiyi 'naapegoxoua' quecá'maq shinqata'gue ma'le ca noctoqui' ma' ne'qaañi.

₉Ca' ñi qota'olec saachiguit na'le dá'maq lashiilaxanaxac so Manoa, ca so lelaatec ñi'maxare, ca lotqai liỹa nachaxana aso 'aalo na' hueetalec yi no'ueenaxa aso'maxare. Qam ma' so Manoa se liỹaatac aso loua, ₁₀ca aso'maxare queuo ne'guenta, ca' 'naapega so loua:

—¡'Anta, dá'maq ỹale nachaxana aỹim scavit liỹa, lotqai liỹa nachaxañiua'!

₁₁Ca ne'laxashiguim so Manoa, ca' quegue aso loua, quepegue' yí'maq hueeta'ñi so ỹale. Ca 'naaco' na'le queso'maxare:

—¿Chaqaiqami'o' ná'maq taqaisa'pegue'o' scavit liỹa ada ỹoua?

Ca so'maxare 'naaco':

—Ajá'a, chaqaỹim.

₁₂Co'na'le, ca' so Manoa 'naaco':

—Ma' ỹovita ca laloqo' quiyim ipaquichigui dá'maq 'xachitema qomi', ¿negue' cá'maq shinqata'gue quiyim siỹaxataq cajo noctoqui'? ¿Negue' cá'maq shinqata'gue ca qarcochaxac quiyim siỹaxataq ca'maxare?

₁₃Ca' so nelaatec piguim le'ec 'naaco':

—Qaidaata quiyim adá'maq roua'e' ipacqajanchigui dá'ogue dá'maq shinapega na'le: ₁₄Quiyim se ne'et quena lataxa, chaqai canchaqaica liỹa chicqaugui ana 'uva, chaqai canchaqaica liỹa lataxa chim. Chaqai se ỹa'ic ná'maq se na'ic. Ta'ta'a quiyim na'xaỹaxane'ta dá'maq shinapega.

_15-16Qam so Manoa se ỹa'den quiyim só'maq retaqata'pegue' nelaatec piguim le'ec. Ca' 'naaco':

—Qouaquiroxoric, ñaqai vire'e najo, qaiyi sa'guinaq ma'le ca quetaq llaalec sa'maxatqatañi.

Qam so nelaatec piguim le'ec 'naaco':

—'Enquet yo'ueenañi, qam qaiyiita se ñouana'to qamiri queca qanoxohi. Qam qamiri shichii 'ỹaañiỹot ñi qara'gaxala', ca qaỹavigaxat cajo quetaq llaalec.

₁₇Ca co'na'le, ca' so Manoa 'naaco' queso nelaatec piguim le'ec:

—Qam choxochitema qomi' ca qadeenaxachi', qaiyi ma' ỹovirelec quiyim ipaquichigui dá'ogue dajo, ca' saanqatacot qami' ca qana'aachic.

₁₈Qam so nelaatec piguim le'ec 'naaco':

—¿Chi'neco' ma' vi'saque 'yiiñi' da ỹeenaxat? Quiyim da'maxare ỹaatqajam se re'xogui chalego loyac.

₁₉Ca' so Manoa iconlec so quetaq llaalec chaqai so lachitaxanataxanaxat chicqaugui na trigo. Ca' ỹa'ue lachitaxanataxanaxat, illaalec aso qa', ca' ỹavigaxat, ca ỹaanot ñi qara'gaxala'. Ca' ñi qara'gaxala' ỹo'uet chalego lecaic, iuanchigui nqai'en so Manoa chaqai aso loua. ₂₀Ca co'na' nachipishiguim so norec caso ncopatoxonaxalate. Ca' so Manoa chaqai aso loua ỹauanchirigui so nelaatec piguim le'ec quiyim taashiguim quena piguim, queetougui so norec lauaq. Ca saua'maxare ỹa'dooto naua le'cootal ñi qara'gaxala', ỹoviraxatera'guit naua lataapi' na 'laua. ₂₁Ca' so Manoa retan quiyim nelaatec piguim le'ec só'maq ỹale retaqata'pegue', ma' tot liỹa nachaxana so Manoa chaqai aso loua. ₂₂Ca 'naaco' caso loua:

—Ỹaatqajam qareleu ma'le, ma' qomi' ya'ỹoqochigui na lashic ñi qota'olec.

₂₃Qam aso'maxare 'naaco':

—Quiyim ỹahotaque qaralauat ñi qara'gaxala', ca' se ỹacoñiguit queta'le so savigaxataq chaqai so qarachitaxanataxanaxat, chaqai se ỹachaxanalo qomi' queta'le dajo, chaqai se ỹa'xatema qomi' queta'le dá'ogue dajo.

₂₄Ca co'na' ỹovita so laloqo', ca' aso 'aalo 'ue so llaalec, ca' ỹanegue leenaxat Sansón. Ca' ñi qara'gaxala' ỹaatqajam nqouaguegue so'maxare. ₂₅Ca 'uo' so na'xa'a na' so Sansón hueete'e yi la'a' viichiguiñiguilo yaua Zora chaqai yi Estaol quiyi 'laua Dan. Ca' so ne'espíritu ñi qara'gaxala' re'xoi' naua lo'ueenataxanaxaco queso'maxare.