'Ue lauaq nqohin da no'ueenataxac so Jesús
1Co'na' ime'ueque saua seis na'xata', ca' so Jesús ỹauegue' saua Pedro, so Jacobo, chaqai so lqaỹa Juan. Ca' qaisauate' nauequetecto, taarishi'megue aso qa' ladocai. 2Ca na' reloqosaho saua'maxare nadalaxat da no'ueenataxac. Ca' 'ec ra'aasa na lauaq na lashic, chaqai saua loho ỹaatqajam ỹalacte' 'ec na lauaq. 3Ca chaqa'ma' qaiuane'talo saua Moisés chaqai so Elías retaqasa'pegue' so Jesús. 4Co'na'le, ca' so Pedro 'naaco' queso Jesús:
—Qami' qara'gaxala', ¡chalego la'maxa dá'maq shinqatari'! No'm 'maxariñi', ca' so'ueetaxe' caua tres na'derañi 'imqolqai', 'óna caqami', chaqai ca liỹa queda Moisés, chaqai ca liỹa queda Elías.
5Ca co'na' ñaq retaqatac so Pedro, ca' anac so naueguelec 'ue na lauaq, ca lepachiguilo saua'maxare. Ca' so naueguelec 'maxougui so na'qaatec 'naac:
—Najo ná'maq ỹoqo'itaxat ỹaalec, ỹaatqajam ñitoonta'pegue da'maxare. Ỹaatqajam na'xaỹaxañiỹa da'maxare.
6Co'na' 'xaita dajo, ca' saua lapaxaguinatqa nqa'paxañiñi quena 'laua, ma' 'xoic da lqolonqa'. 7Co'na'le, ca' so Jesús nqo'nalo saua'maxare. Ca ipootau'alo, ca 'naaco':
—Ne'laxachishiguim, totaxan ro'chii.
8Ca co'na' na'irashiguim, ca' qaica ca liỹa iuanta, qaisoota so Jesús.
9Ca co'na' naasañi quiyim renoterec caso qa' ladocai, ca' so Jesús qate'talo, 'naaco':
—Qaico' ca 'qaataxañim quedajo rauanaxanaxaguii, toco' ma' ime liỹa nca'leuec najo ỹale llaalec.
10Ca' saua lapaxaguinatqa inatesac so Jesús, 'neraco':
—¿Chi'negue ma' ná'maq rapaxaguinataxanta'pegue na naqataxaquipi 'naac quiyim 'au novi' ma'le ca Elías?
11Ca' so Jesús 'naaco' quesaua'maxare:
—Ajá'a, lliqueta quiyim so Elías 'au novi' ma'le, quiyim ỹa'maxajñi ná'ogue na hueetalec na 'laua. 12Qam ỹim shinac caqamiri quiyim so Elías shi'gue novi'. Qam naua'maxare se ỹa'deene', ta'ta'a quiyim ỹoiquentac so'maxare quecanchaqai sham 'neeta'gue. Ca' chaqaida 'neeta ma'le quenajo ỹale llaalec 'xoic nqohin ca le'xoric ma'le quenaua'maxare.
13Co'na'le, ca' saua lapaxaguinatqa retane' quiyim so Jesús 'neetapega so Juan só'maq nachilaxanataxanaq.
So Jesús ỹomatec so ne'nec chita'gue lotqai ileueta
14Ca co'na' ỹovijta yi hueete'e so qomyipi, ca' so Jesús qanqo'neu'a queso ỹale, ca ỹa'chi'iñi naua le'cootal quiyí'maq reloqota'ñi so'maxare. Ca 'naaco':
15—Qami' ỹa'gaxala', 'xoriñi' da ỹaalec. Ma' da'maxare chalego da le'xoric chita'gue quen lotqai ileueta. Chaqai 'xoic taañigui quen na norec chaqai na huaxaỹaq. 16Quenajo ñodou'alo na'le naua rapaxaguinataxahi', qam naua'maxare se ishite' ỹomaterec.
17Ca' so Jesús 'naaco':
—¡Aicuéra, qamiri ma' sqaica ca viilec, chaqai qamiri hualoxona'! ¿Chi' taỹa'co' dá'maq quiyim shi'gom salequetauguilo qamiri? ¿Chi' taỹa'co' dá'maq quiyim shi'gom ñiualaxaintegueto qamiri? Ñaq naviguiiri' quenajo cá'maq ne'nec.
18Co'na'le, ca' so Jesús nelaxa, ỹo'daauec so ne'ec lecmaxaic, ca' eec ca'e nqai'en so ne'nec. Ca chaqa'ma' imeuec so'maxare.
19Ca co'na' ime, ca' saua lapaxaguinatqa ỹoỹooteterec so Jesús quiyim inate', 'neraco':
—¿Chi'neco' qomi' ma' se seshitaq so'daqauec so ne'ec lecmaxaic?
20Ca' so Jesús 'naaco' quesaua'maxare:
—Ma' qamiri cocho'qui' da rpi'ỹaxaguii. Ỹaatqajam llic da shinac caqamiri, quiyim 'ue ca rpi'ỹaxaguii, 'en quet chi lecaata ana la ana mostaza, ca' 'ñiỹapega anajo quemaralec late'ogue': “Quire'e najo, ca' ỹoqa'a ca 'iri'ñi”; ca cajo quemaralec late'ogue' ca'e cá'maq na'ñi. Ca' qaica quet cá'maq qalañiỹac quiyim ỹaatqajam 'ue ca rpi'ỹaxaguii. 21Qam na 'nejem sojo ne'ec lecmaxaic eec quiyim qaỹo'daauec, qam ca qom ỹouen quiyim nqouagaxain chaqai nqopaaqachit.
So Jesús lotqai liỹa ỹa'xatalec quiyim qaỹalauat ma'le
22Ca co'na' ñaq nauequetecta' ỹouoxonsac yi 'laua Galilea, ca' so Jesús 'naaco' quesaua lapaxaguinatqa:
—Najo ỹale llaalec qoỹaanougui na qomyipi, 23ca' qaỹalauat ma'le. Qam ma' inoxondec caua tres na'xata', ca lotqai liỹa nca'leuec.
Ca quedajo la'qaatec, ca 'xoic na lachicoqo' saua'maxare.
Da nishiuetenaxanaxac quiyim qaishiueten aso no'ueenaxanaxaqui late'ogue'
24Co'na' so Jesús chaqai saua lapaxaguinatqa ỹovirera'a yi na'a' Capernaum, ca ná'maq ỹacona'piguit ana nishiuetenaxanqate cañi no'ueenaxanaxaqui querepegue' so Pedro, ca' inate':
—Ñí'maq ỹapaxaguinta'pe qamiri ¿peeta'a se ishiueten añi qaishiueten cañi no'ueenaxanaxaqui?
25Ca' so Pedro 'naaco':
—Ajá'a, ishiueten.
Ca co'na' so Pedro inoxono queca 'imec, ca' qara'auot quiyim retaqa so Jesús, 'naaco':
—¿Negue' cá'maq 'ñirac, qami' Shimoñi'? ¿Negue' cá'maq qaỹahotaque quiyim ishiueten ná'maq nashillipi quena 'laua, peeta'a ná'maq chi lalamaxareteripi, loqo'm ná'maq chicqauec?
26Ca' so Pedro 'naaco':
—Ná'maq chicqauec.
Ca' so Jesús 'naaco':
—Vichiguiño' ná'maq lalamaxareteripi, ca' se ishiueten. 27Qam qaiyi qaica ca ỹo'uet ca qarasauaxaset, ca' quirepegue' aso huaaxai, ca' naqairiñi na roqoinaxanaxachi'. Ca cá'maq 'auaxaic roqoiñicshiqui' nallin, ca' hueetaugui ma'le na lap aca chiróla. Ca aca'maxare nalootañi quiyim shiuetenaxañita caqami' chaqai caỹim. Ca do'iro, ca shiuetenaxañi'.
