Mateo 18

₁Ca' quesojo na'xa'a, ca' saua lapaxaguinatqa so Jesús noquiicra'a so'maxare, ca inate', 'neraco':

—¿Negue' cá'maq paguec lecaic nqohin quená'maq hueetaugui dá'maq lo'ueenataxanaxac ñi qota'a neeta'gue da piguim?

₂Co'na'le, ca' so Jesús roỹaxana so noctoqui', ca nachajñi nqai'en quena lavinñi' saua'maxare. ₃Ca 'naaco':

—Ỹaatqajam lliqueta da shinac caqamiri, no'm sqai pilliichigui nqai'ñii quiyim denaxachii ca noctoqui', ca sqai shichii noxoñiu'a da lo'ueenataxanaxac ñí'maq neeta'gue da piguim. ₄Ca' chaqaida 'neeta, cá'maq paguec lecaic nqohin ma' hueetaugui da lo'ueenataxanaxac ñí'maq neeta'gue da piguim, ca' chaqaica cá'maq nemanachiteta, pilchigui quiyim 'ec noctoqui'. ₅Chaqai cá'maq qom cá'maq queeta'pegue' aỹim, quiyim icoñiguit ca noctoqui' 'nejem najo, ca icoñiguit aỹim.

₆Ca' canchaqaica quiyim ỹo'uet ca chicqochigui ca lasauaxaset ca 'óna quená'maq 'ec qaica ca lemaqachic huelec aỹim, ca' paguec la'maxa queca'maxare quiyim qainaxañigui na lavinñi aca huaaxai, qaicoñireto'ot na lqosot ca qa' lodegaxat nopoxoiqataxanaxat. ₇Ca' ¡chalego la'aaxa quena qomyipi quiyim 'ue ca ỹo'uet quiyim chicqochigui ca lasauaxaset na qom quena 'laua! Qam dajo chaqai'eno' quen 'ue. Qam ¡'xoraicolec cá'maq qom chicqochigui dajo!

₈Ca' vichiguiño' no'm da rqai'laxachi' loqo'm da qapiaachi' chicqochigui quiyim 'ue ca rasauaxashichi', ca' chaqairec, ca naqairec, qoỹoqote'oga nqai'ñi'. Ma' paguec la'maxa quiyim noxoñira'a da nca'laxa 'oonoqui' da rqai'laxachi' loqo'm qami' chisaq, qam quiyim se qarenaqairiñigui ca norec sqaica lqodoc quiyim naua'que naua rqai'laqachichi' chaqai naloochiriñi naua richilli'. ₉Chaqai no'm añi nqochi'i' ñí'maq chicqochigui quiyim 'ue ca rasauaxashichi', ca' naqachi' naqairec qoỹoqo'tegue nqai'ñi'. Ma' paguec la'maxa quiyim noxoñira'a da nca'laxa 'oono'lli' aca nqochi'i', qam mesqai quiyim nalo'ojta' naua nqochichi', ca' qarenaqairiñigui ca ncopatqo' na hualoxonyipi.

₁₀Mesqaica ca liỹoxoỹa'piguit quená'maq 'ec sqaica ca lemaqachic. Ma' ỹim shinac caqamiri queda piguim ná'maq neloxoỹaripi quena'maxare ỹoviretacot naua'que naua na'xata' ñi ita'a qota'olec neeta'gue da piguim. ₁₁Ma' najo ỹale llaalec naque ná'maq na'laaxaic qomyipi, ma' ỹahotaque quiyim nca'laxatec.

₁₂¿Negue' cá'maq 'ñiỹac? No'm 'ue ca qom cien aca lalo qagreta, ca' 'óna aca na'laañi, ¿peeta'a se ishito' no'ueenaqtalec aca 'laua quemaralec ladocai aca noventa y nueve, ca' eec imitaque aca ỹo'maac 'oono'lli'? ₁₃Chaqai no'm ỹanata aca 'oono'lli', ca ca'maxare ỹaatqajam paguec 'xoic da netoonaxac quecauá'maq noventa y nueve qagreta se na'lerañi. ₁₄Ca' chaqaida 'neeta qai'neeta ñí'maq qota'a ñí'maq rashiilliguii neeta'gue da piguim, se ỹa'maxaren quiyim 'ue ca na'laañi quená'maq nauajo 'ec qaica ca lemaqachigue'.

₁₅No'm ca rqaỹa'e' 'ue ca se ỹa'maxañi 'ne'tegue caqami', ca' taqaira'pegue', roda'ichichiguit, ca' 'deenaxanaxañitegue cá'maq ỹo'maqajantac. Ca no'm na'xaỹaxana qami', ca' raviguiqui' ca rqaỹa'e' quiyim rapil. ₁₆Qam no'm se na'xaỹaxana qami', ca vite ca ỹaxañita 'óna loqo'm dos qomi', qaiyi cá'ogue cá'maq ra'qaachiqui' nachiñi'chiguita caua dos loqo'm tres ra'qaataxanaxauachi'. ₁₇Ca no'm se na'xaỹaxanalo caua'maxare, ca' qami' 'xachitem ná'maq mashic icoñiguit da na'qaatec ma' lapoota'ta'. Ca no'm se na'xaỹaxana, ca' ca'maxare qohinta'gue cá'maq saqa' icoñiguit da na'qaatec, loqo'm 'neetari' nqohin na icona'piguit ana nishiuete so nashi quiyi Roma.

₁₈Ỹaatqajam lliqueta da shinac caqamiri quiyim 'ue ca coñirii quenajo 'laua, ca' qaicoñi' qai'neeta queda piguim. Chaqai cá'maq sohiuec qamiri quenajo 'laua, qai'neeta qaỹosouec queda piguim.

₁₉Chaqai qai'neeta shinac caqamiri no'm 'vii caua dos caqamiri quenajo 'laua na'deenta' quiyim 'ue ca rashiilaxandaque nqouagaxaine', ca' ñi ita'a qota'olec neeta'gue da piguim ỹo'uet, ca' ỹaanema. ₂₀Ma' cá'maq hueesa'ñi caua dos loqo'm tres lapoosagui da ỹeenaxat, ca' ỹim seuetañiguilo lavilliñi' caua'maxare.

₂₁Ca' so Pedro quepegue' so Jesús, ca' inat:

—Qami' ỹa'gaxala', ¿ỹote' quet, ca' lqodoc quiyim ỹo'uet ca se ỹa'maxañi ca ỹaqaỹa, quiyim sqa shicapeguem sietolqai'?

₂₂Ca' so Jesús 'naaco' queso'maxare:

—Mesqai shinac caqami' sietolqai', ta'ta'a quiyim ỹovi' setenta piltalec ca siete.

₂₃Ca' vichiguiño' dajo lo'ueenataxanaxac ñi qota'a neeta'gue da piguim 'nejem ca nashi quiyim ỹahotaque naloqochin aca la'uale ca lelaatqaipi. ₂₄Ca co'na' mashic naloqochintac ana na'uale, ca qanauequetaho' so 'óna ỹaatqajam 'xoic aso la'uale. ₂₅Ca ma' só'maq nelaatec qaca quet acá'maq lishiuetenaxanqate, ca' so na'co' relaataxanlec quiyim qaimen, ca' chi na'ac, liỹaata'ogue' aso loua chaqai so llaalqaipi, chaqai sá'ogue so louenqaipi, qaiyi ishiueten aca la'uale. ₂₆Ca' so nelaatec ỹa'chi'iñi naua le'cootal queso na'co', ca ne'xoresene'tot, 'naaco': “Qami' ña'co', neualaxaviñire'e' aỹim, ca vire'to' ma' seshiueten cá'ogue aca ỹa'uale.” ₂₇Ca' so na'co' ỹaatqajam 'ue da le'xorenataxanaxa queso'maxare. Ca' ỹapalaxat sá'ogue aso la'uale so'maxare, ca' ỹaxanec. ₂₈Qam co'na' chi inoxonec sojo nelaatec, ca nachiñi'chiguit so liỹa nelaatec lo'ueenataxanaxaua 'uo' aso la'uallo'lli' queso'maxare. Ca nqosoxone'tot na lqosot, ca ỹovicqoto'ot, ca 'naaco': “¡Shivichiñi' aca ra'ualli'i' caỹim!” ₂₉Ca só'maq lo'ueenataxanaxaua so'maxare ỹa'chi'iñi naua le'cootal, ne'xoresene'tot, 'naaco': “Neualaxaviñire'e' aỹim, ca vire'to' ma' seshiueten cá'ogue aca ỹa'uale.” ₃₀Qam sojo nelaatec se na'xaỹaxan. Ta'ta'a quiyim eec, ca' coñi', chi ỹovireta'a quiyim ishiueten sá'ogue aso la'uale. ₃₁Ca co'na' iuanchigui dajo só'maq liỹa lo'ueenataxanaxauaripi, ca' 'xoic lqui'ic nqai'en dajo. Ca' querepegue' so na'coote', ra'qaataxanta quedá'ogue dá'maq 'neeta dajo. ₃₂Ca só'maq 'co' roỹaxane'oga. Ca 'naaco' queso'maxare: “¡Qami' ilaatec hualoxonaq! Ỹim sapalaxat cá'ogue aca ra'ualli'i', ma' ỹaatqajam ne'xorishiñitetot aỹim. ₃₃Ca qami' qai'neeta 'xoriñi' quet so nauegaxaua'e', 'ñiitetegue quet aỹim ma' ỹim se'xoriñi' na'le.” ₃₄Ca' so a'co' ỹaatqajam ro'o. Ca' relaataxanlec quiyim qaỹa'ue ca nouaxanaxaset so'maxare, chi ỹovireta'a quiyim ỹomachigui sá'ogue aso la'uale so'maxare.

₃₅Ca' so Jesús co'na' ỹomat da la'qaatec, ca 'naaco':

—Ñi ita'a qota'olec neeta'gue da piguim chaqaida 'ne'tegue ma'le caqamiri, no'm quiñi 'óna se ỹachigoxochichigui añi le'taxanata quiyim i'xoren ca lqaỹa.