Proverbios 31

₂Qami' ỹaalec, chicqoiraugui na iuel,

qami' lopilaxaset da ỹashiilaxanaxac quiñi qota'olec,

¿negue' queto' ca liỹa shinac caqami'?

₃'Neeto' 'ỹaañisapeguec da rquesaxanaxa'e' quena 'aallipi,

ma' da'maxare na'laxatañi quen na nashillipi.

₄Qami' ỹaalec Lemuel, se ỹa'maxañi quiyim ca nashi chaqai na'gaxala'

ne'et quena lataxa chaqai na quesaxan lataxa,

₅ma' sqoue coua'e da naqataxaquipi

chaqai se ipacqajñigui quiyim qoshiilec na 'xoraiquipi.

₆'Xañiriñi na lataxa chaqai na lataxa quesaxanaxaic,

na'maxare ta'chiguit ca qaica ca la'ñaxac chaqai rachicota;

₇¡le'neetari' ñaq ne'et, qaiyi tot ỹo'leenta'a

da le'xoric chaqai da lachitachic!

₈Nelamaxariñi', taalec nqai'ñi' ná'maq tot qaica ca lelamaxa;

¡'ootaxañirelec ná'maq qaica ca ro'ootaxanlec!

₉Nelamaxariñi', 'ootaxañirelec;

¡'viichi' ca ỹa'maqachiguiñi quená'maq qaicanqaiyi 'xoraiquipi!

₁₀Aca no'uen 'aalo 'xoic lqalaic quiyim qaỹanata;

¡paguec lesega'a queca qa' lo'yaxanec 'ueetaxat!

₁₁Cá'maq loua ỹaatqajam pi'ỹa'a aca'maxare,

chaqai se ỹauanapega quiyim qaca quet aca lauegue.

₁₂Ỹaatqajam ỹa'maqachigui lauel nqai'en ca loua

quenaua'que naua na'xata' quiyim ñaq nca'leetauec.

₁₃Eec idaanaque na qagreta laue chaqai na noshite,

chaqai nemeeten ỹo'uet na no'xonec.

₁₄Mashic 'ec aca qom lahi' quiñigui na huaxaỹaq,

qoỹoqo'tegue na ỹachigoxota'gue na na'ic.

₁₅Quena' saqa' richiguiñi, ca' ne'laxashiguim,

ca' ỹa'ue na loq na llaalqaipi chaqai ana lelaatallipi.

₁₆'Au ỹa'ajanta ca 'laua, ca' rishiujnaxana,

ca caná'maq lo'ueenataxanaxac laseuete, ca' ỹanñi ca 'uva loma'.

₁₇Dala'chiguit da lquesaxanaxa,

ca na'ñaxat ro'ueenataxan.

₁₈Ỹaatqajam ỹa'maxate'tegue da lashivichaxac na lemeenec,

chaqai vire'ta pem, qam ñaq ro'ueenataxantac.

₁₉Quenaua chi lqai'laqate',

ca' raqaletenaxan chaqai ro'xonaxan.

₂₀Ỹaatqajam se coua'e quiyim ỹotauan

ca 'xoraic chaqai ná'maq 'ue ca louenaxanaxa.

₂₁No'm loñi, qam qaica huapigui lauel,

ma' na llaalqaipi pa'ỹaxaraic na looỹac.

₂₂Chaqaca nodajlec ỹo'ueete' naua le'laalqo,

chaqai ỹantegueñi ná'maq no'uen nooỹac.

₂₃Ca loua ỹaatqajam qaỹa'deenta queca na'a' lodegaxat,

chaqai ỹalequetaugui nqohin ná'maq qaimaqachin queca 'laua neetalec.

₂₄Aca'maxare ỹo'uet ana loxoqui chaqai na saataxaqui,

ca' imeenot na nemeenaxaiquipi.

₂₅Ca' nqo'neuec da lquesaxanaxa chaqai qaimaqachin,

chaqai sqaica huapigui lauel quenaua lichico naua naasaho na'xata'.

₂₆Quena' retaqa, qam ỹa'den dá'maq ỹa'xat,

quiichigui nqai'en da le'xorenataxanaxa da lapaxaguinataxanaxac.

₂₇Ỹaatqajam ỹa'ajanta dá'maq 'neetari' ca la'a',

chaqai se ỹa'ic cá'maq se laseue' cá'maq lo'ueenataxanaxac.

₂₈Ca llaalqaipi chaqai ca loua

imaqachine', ca 'nerac:

₂₉Ná'maq no'uen 'aalo 'xoic,

qam qami' paquirauec caná'ogue.

₃₀Da la'maxa ca 'ueenataxac rayinaxan,

da noyac imeuo,

qam aca 'aalo acá'maq imaqachin ñi qara'gaxala' qota'olec,

chaqaca ta'chiguit quiyim qaimaqachin.

₃₁¡Maqachiñii quená'ogue na qomyipi!

¡'Xachitac dá'ogue dá'maq lo'ueenataxanaxac!