Qaimaqachintac ñí'maq lo'ueenatec ná'ogue nanchaqaina
1¡Semaqachin ma'le ñi qara'gaxala' quedá'ogue da ñachaalataxac!
¡Chalego dá'maq recaiqui', qami' ỹa'gaxala' chaqai qota'olec caỹim!
Ỹaatqajam ñi'sañi da necaic chaqai da nauaq;
2lepachisagui da lauaq 'ec napoxogui'i'.
¡Qami' piguiñirec na piguim, 'ec nqai'ñi' ca napoxonaxat!
3¡Qami' 'yirelgoto na huaxaỹaq
caua nojnaxal ca qauochi' queda pa'aashiguim!
Ñigui rahoglena'e' nqai'ñi' na naueguelec;
¡ca' quiyim qui', ca ñiisalgoto naua laua' na nonot!
4Na nonot chaqaina na ra'qaataxanqajanqui',
chaqai relaataxahi' naua norqa lauaxa'.
5Ñi'ralec na'le ca lomala' na 'laua,
qaiyi qaica ma' reda quet.
6Na lishiguiñi ana huaaxai ỹapootalec na 'laua,
'ec aca neloxoqui.
Na huaxaỹaq ỹapolec ana quemaralec qa' ladocai.
7Qam qami' relaqaita, ca' eec;
chaqa'ma' 'eet na' 'xaỹaque da qavilli', 'ec soxonaxa.
8Quelgoto naua quemaralgoto qa' ladocahi,
chaqai qui'ñiguilo naua ca'meguelo,
ca quepegue' ná'maq loma' 'ñirapega quiyim hua'ñi,
9se napacalec ná'maq lqodoquiaqa' nqai'ñi',
qaiyi tot liỹa ỹapolec na 'laua.
10Qami' lachi' na huaxaỹaq chicqañi quiyim ne'paxantashiguim,
qaiyi que'uegue ana lachiugue, ca' queuguilo naua quemaralgoto ladocahi,
11Ca' na huaxaỹaq chaqaina na ne'teetapigui na iseripi neuec;
ca' chaqaina na nomat na laquip na lolgaqaipi.
12Quena lahi na lachiuguellipi
ỹo'uet na lco'viichaxaqui na qo'oollipi;
¡ca' quiyi, ca' noỹentac neetaguilo naua lasote ana qo'paq!
13Chaqai qami' ná'maq cochiiseguelgoto naua quemaralgoto qa' ladocahi,
viise'e ca ra'aachi' queda piguim;
ca quená'maq ỹaxat chicqo'ot na piguim,
ca' ỹaatqajam huaquichiguiñi nqai'ñi' na 'laua.
14Ca' ñaxat nqai'ñi' na 'uaqapi, vi'raque loq na iseripi,
chaqai ana nanecse quiyim qoỹanñi quena qomyipi,
qaiyi 'ue ca loq, ỹachigoxotaugui na lanec quena 'laua,
15ca loq, qaiyi 'ue ca lquesaxanaxa,
chaqai 'uva li'i, qaiyi netoon da nachaalataxac,
ca ỹo'uet quiyim nenoqouec na lashic
'ec na'meentapigui ca 'aceite.
16Nomat na laquip ana qo'paq,
leenaxat cedro na'ñi yi Líbano,
ná'maq lanecse ñi qara'gaxala'.
17Na'maxare co'viichigui ana qo'oole paguec cocho'lli',
ca' ana qo'paq pino, ca' co'viichigui na damqaipi.
18Ana quemaralec qa' ladocai qaỹauaaque loma' ana qagreta neuec,
ca ná'maq qa'ipi, ca' chi lauaquiaxaqui ana nesoxona late'e.
19'Viichi' ñi shiraigo, qaiyi qanaloqochine' naua na'xata';
añi ra'aasa ỹa'den ma' lagui inoxonñi.
20Ca' piguiñirec na lapalaxa yi pe,
quena'le, ca' nenoxonec na iseripi quena 'oochi.
21Na sauaxaic leta'a ronoqotaque ca letoc;
ỹashiilatac ñi qota'olec quiyim ỹa'ue ca loq.
22Qam quena' nenoxonshiguim añi ra'aasa, ca eec,
nenanñi quenaua lauaco.
23Ca' eec na qom ro'ueenataxan,
ca ro'ueenataxantac, chi ỹovireta'a inoxonñi añi ra'aasa.
24¡Ỹaatqajam 'xoic na ro'ueenachiqui', qami' ỹa'gaxala'!
Ná'ogue na'maxare chicqochigui da ra'deenaxanaxa'e';
¡ná'ogue na 'laua no'qajlec quená'maq ro'ueenachiqui'!
25Ca' yí hueeta'ñi aso huaaxai, ỹaatqajam chalego lecaic chaqai da leca'gue,
chaqai chalego na isecỹac hueetañigui, tot qaishit qanaloqochin,
'ue na cocho'qui' chaqai na lodegaxat;
26ca' ana qom lahi' huaxaỹaqse quiñigui yi'maxare,
ca qai'neeta hueetañigui so Leviatán,
só'maq isecỹac lodegaxat 'viichi', qaiyi hualaxaisa'pegue' so'maxare.
27Ná'ogue na'maxare naquiteta'a qami'
quiyim ma' ỹovita ca laloqo', ca' vite ca loq.
28Qami' 'ỹaañitem, ca' na'maxare lapoon;
huachirigui ana napoquena'e',
ca ỹa'maqachiguiñi quema';
29no'm 'xochiriñi na qashiiqui', ca na'maxare no'chi;
ca no'm huootaxañira'gue na lacat, ca' ileu,
ca' lotqai pilligui quiyim 'laua.
30Qam no'm nelachi' ca racachi', ca nca'leuec.
Ca' chaqaida 'neeta quiyim dalaxachi' na lauat na 'laua.
31¡Da lauaq ñi qara'gaxala' sqaica lqodoc!
¡Ñi qara'gaxala' netoonegue na lo'ueenatec!
32Na 'laua i'loxol quena' ra'ỹa'a ñi'maxare;
¡chaqa'ma' nichiiuec ana quemaralec qa' ladocai quena' qaipootau'a quiñi'maxare!
33Quiyim ñaqa 'ue aỹim yca'leetauec,
so'ueenta'pe naua no'ueenqa quiñi ỹa'gaxala' chaqai qota'olec caỹim.
34Saxanchi' nqo'talo naua ỹa'deenataxanaxaco ñi qara'gaxala',
ma' qaiñiita ỹo'ueetetac da ñitoonaxac.
35Ca' ¡ỹaatqajam co'tejlec ma'le na 'laua quena sauaqhuaiquipi!
Chaqai ¡tot qaica na hualoxonyipi!
¡Semaqachin ma'le ñi qara'gaxala' quedá'ogue da ñachaalataxac!
¡Ca' ỹaatqajam sqaica lqodoc qaimaqachintac ñi qara'gaxala'!
