Salmos 110

₁Ñi qara'gaxala' qota'olec 'naac caqami' ỹa'gaxala':

Nqa'xañiriñi queda ỹoic,

toco' ma' ỹovita quiyim sillo'oto naua qapiaachichi' na npa'guenaxaua'e'ipi.

₂Quena Sión ñi qara'gaxala' qota'olec ỹaanem qami'

so lashile' hueetagui da lquesaxanaxa,

qaiyi 'viiquiñi'sac na npa'guenaxaua'e'ipi.

₃Na ralamaxarichi'ipi nañaanot qami' quiyim qami' lashi

queca na'xa'a na' huegaxañi'.

Ca' da nenocchishiqui' nqo'neetauec quenaua na'xata',

quedaua quemaralgoto qari looỹaco ñi qota'olec,

'ec aca 'ỹa' chicqochigui na lauel añi ra'aasa.

₄Ñi qara'gaxala' qota'olec ỹaanec da la'qaatec,

ca' se netogot:

Nagui, ca qami' netaxaỹaxanqajnec sqaica lqodoc ma' qaretaxaỹa'pegue' aỹim,

'ec na'le so Melquisedec.

₅Ñi qara'gaxala' qota'olec hueeta'gue da qatoiqui';

queca na'xa'a ma' ro'o, ca nalauajñi ma'le na nashillipi;

₆ỹa'xat cá'maq taachi'ñi ca lasauaxaset ná'ogue na ỹoreta'oguit qomyipi;

lapoonñi ma'le na leuaxaiquipi;

¡co'ueetapigui na lqahigoripi quená'ogue na 'laua!

₇Ca' queso llicyaxac, ca' ni'chigui na huaxaỹaq quena ñaachi,

ca ná'maq huaxaỹaq, ca' ỹo'uet da dalaxaic lquesaxanaxa.