Romanos 13

₁Ca ná'ogue na qom ỹouen quiyim na'xaỹaxana ca 'naac na nashillipi. Ma' qaica quet cá'maq nashi sqai chicqochigui ñi qota'olec, chaqai ná'maq neetaho ro'ueenataxantac nagui, ỹo'viijñi ñi'maxare. ₂Ca vichiguiño' cá'maq se na'xaỹaxana na nashillipi, ca ca'maxare npa'guene'e' ná'maq leloxoỹaxaquipi ỹa'yiñi ñi qota'olec. Ca vichiguiño' cá'maq 'neetari' dajo, ca' chi nasauaxateteguelta' quiyim qaỹa'ue ca nouaxanaxaset. ₃Ma' ná'maq nashillipi se ỹahotaque quiyim no'chi cá'maq ỹo'ueetetac ca ỹa'maqachiguiñi, ta'ta'a ná'maq ỹo'ueetetac na se no'uen. ¿Vi'saque quiyim qaica ca ro'chi'raque quena nashillipi? Ca na'maxachite', qaiyi na nashillipi imaqajan aqami'. ₄Ma' na'maxare lo'ueenataxanqajnec ñi qota'a, qaiyi sqaicanqaida caqami'. Qam no'm sqa 'maxachira'gue da no'ueenataxaqui', ca' 'ue ca rqolonaxa'e'; ma' se reualaxaitac ca nashi quiyim ỹa'ue ca nouaxanaxaset ca qom, ma' ro'ueenataxantacot ñi qota'a quiyim ỹa'ue ca nouaxanaxaset cá'maq ỹo'ueetetac ca se no'uen. ₅Vichiguiño' 'maxaraic quiyim qana'xaỹaxane'ta na nashillipi. Mesqaidaata quiyim qaỹoueteta'a ca louaxanaxanaxac, ta'ta'a quiyim chaqaida 'neeta quiyim 'maxaraic ca la'deenataxanaxac ca qom. ₆Chaqai qai'neeta quedajo, ca' qamiri shivichiñitac ñi nashi. Ma' na nashillipi ro'ueenataxantacot ñi qota'a, chaqai ỹalamqajlec quiyim ỹo'uet na nelaataxaquipi.

₇Vichiguiño' quiñi 'óna qom qoỹaanem cá'maq laloqo' cá'maq lalamaxat. Quená'maq hueeto'ot aca na'uale quená'ogue ná'maq tai'a quiyim qaishiueten, ca chaqa'ma' qaishiueten. Chaqai quecá'maq qaỹa'maxate'tegue, ca 'maxachi'tegue. Chaqai cá'maq qaimaqajan, ca' maqachiiñi. ₈Sqaco' ra'uallii quená'ogue, ta'ta'a quiyim quiñi 'óna i'xoren ca liỹa; ma' cá'maq i'xoren ca liỹa, ca ỹomachigui da laqataxaquipi ñi qota'a. ₉Ma' na naqataxaquipi 'naacsa': “Se nocachisa'guit aca se roua'e', sqa lauataxañi', sqo cuachi', se na'majñi'relec ca liỹa, se ripichira'a ca ỹoqa'a”; qam nauajo chaqai ná'ogue na liỹa naqataxaquipi imaaguilo dauajo na'qaatqa 'neracsa': “Rauochitegue ca riỹa'e', 'nejem nqai'ñi' qami' nauochiralta'.” ₁₀Ma' cá'maq 'ue ca le'xorenataxanaxa se na'axat ca liỹa. Ca vichiguiño' da ne'xorenataxanaxa ỹaatqajam ỹomachichigui dá'ogue da laqataxaquipi ñi qota'a.

₁₁Qam quedá'ogue da sa'xatetac, ñaqai 'ajñii' naua na'xata' seuqatauguilo, chaqai ỹovita yi laloqo', ca nalootañi quiyim ñiloxouec. Ma' dá'maq qarca'laxa tot qoỹoqaque, mesqai 'nejem na' ñaqai chita'gue seconaxaguit da na'qaatec. ₁₂Ma' nagui, ca 'eco' mashic ỹoxo'ogue na pe, ca tot qoỹoxoguit ca na'xa'a. Ca vichiguiño' 'maxaraic saxanqaiñi naua qaỹo'ueeteta'pe quen quena napalaxa, ca sanqaiñi naua qaro'goxonqate', shinqata ca neetaho quena nouaataxanaq queetagui yi na'xa'a. ₁₃Qam ỹaatqajam ña'maxatqata shinqata'gue dá'maq 'neetari' cá'maq mashic queetagui yi na'xa'a. Totqai qomi' ne'taaxaiqa, chaqai se so'ueetaq ca qarqui'ỹaxac quiyim 'xoic ca naỹaac, chaqai dequenaxac, chaqai nanchaqaina namaanaxanaxa, chaqai quiyim ñco'uaqata'ta', chaqai quiyim ñpa'guenqata'ta'. ₁₄Ta'ta'a quiyim ỹaatqajam 'goxoñiỹa so qara'gaxala' Jesucristo, chaqai totqai 'yiiñiỹapega quiyim quiitalec na se no'uen lamaanaxanqachic na roshicmaxahi.