Sqo quiiteguelec ca rpi'ỹaxauahi
1No'm 'ue ca saqa' ra'ñi ca lpi'ỹaxac, ca coñiguit, qam sqai taxahita'guit quecá'maq sqailligueme' ỹaataq ca leloxoỹaxac. 2Ca' chi saloqojnaxana quiyim 'ue ca 'neetapega quiyim ná'ogue qaishit qaỹa'ic, qam no'm 'vii ca liỹa' quiyim saqa' ra'ñi ca lpi'ỹaxague', ca' qanaata ana nanecse na'ic ỹa'queesac. 3Ma' cá'maq ishit ỹa'ic ná'ogue na na'ic 'neeto' lotqai se icoñiguit cá'maq se ỹa'ca'era, chaqai cá'maq se ỹa'ca'era mesqai queeteguelec cá'maq sqa ỹaataq ca ỹa'ic, ma' ñi qota'olec ỹacoñiguit ca'maxare. 4Ca ¿negue' quet qami' quiyim qui'seguelec cá'maq ỹoqa'a nelaatec? No'm ỹa'maqachiguiñi cá'maq ỹo'ueetetac, loqo'm se ỹa'maxañi, qam nanoiquenta'pegue' cá'maq chi na'co'. Qam ỹa'maxañi ma'le, ma' só'maq qara'gaxala' 'ue da lquesaxanaxa quiyim ỹa'maxañi nqai'en ca'maxare.
5Ca' da liỹa saloqojnaxana 'neetasa': 'Ue na ỹapacqajnauec ca 'óna na'xa'a queca liỹa, chaqai 'ue na 'naac qaica quet cá'maq ỹapacauec quenaua na'xata'. Ca' quiñi 'óna ỹaatqajam llic nqai'en dá'maq chi la'deenataxanaxac. 6Qam quecá'maq ỹapacqajnauec ca 'óna na'xa'a, ca' chaqaida 'ne'tegue, qam imaqachintac so qara'gaxala'. Qam cá'maq sqai 'ne'tegue dajo, qam qaiyiita ma' imaqachintac so qara'gaxala' quiyim 'ne'tegue dajo. Chaqai quecá'maq qaỹaataq ca ỹa'ic quiyim que'e, ca' imaqachintac so qara'gaxala', ma' ỹaanot da na'aachic ñi qota'a. Qam cá'maq se ỹa'ca'era, noden, ma' imaqachintac so qara'gaxala', chaqai qai'neeta ỹaanot da na'aachic ñi qota'a.
7Ma' qaica quet cá'maq chi nanoiquentac nca'leetauec coqomi', chaqai qaica quet cá'maq chi nanoiquentac ileu coqomi'. 8Ma' no'm qarca'leetauec, ca da qanachaalataxac imaqachintac so qara'gaxala'. Chaqai no'm qareleu, qam qareleu'ot so qara'gaxala'. Ca vichiguiño' quiyim qarca'leetauec, loqo'm quiyim qareleu, qaiyiita qomi' lalamaxarete' so qara'gaxala'. 9Ma' so Cristo ileu chaqai lotqai liỹa nca'leuec, qaiyi so'maxare chaqaiso só'maq la'gaxala' ná'maq mashic ileu chaqai ná'maq ñaqai nca'leetauec.
10Qam qami', ¿chi'negue ma' qui'seguelec ca rpi'ỹaxaua'e'? loqo'm ¿chi'negue ma' sqai coñichiguit? Ma' qomá'ogue ñachaataxau'a ma'le so Cristo quiyim imite' qomi'. 11Ma' naua naneresañi la'qaatqa ñi qara'gaxala' 'neracsa':
Ma' ỹaatqajam lliqueta yca'leetauec, ca quecá'maq seloqota'ñi ná'ogue na qom ỹa'chi'iñi ma'le naua le'cootal,
chaqai ná'ogue ichoxoteta ma'le quiyim aỹim qota'olec.
12Ca vichiguiño' quiñi 'óna coqomi' chi nichoxotalta' ma'le quiñi qota'olec.
Mesqai vi'saque ca lasauaxaset ca rpi'ỹaxaua'e'
13Ca vichiguiño' nagui, ca' totqai qolqateguelec ca qarpi'ỹaxaua. Ta'ta'a quiyim qamiri daañiỹaque ca la'maqa' quiyim qaica quet cá'maq ỹo'uet quiyim 'ue quet ca ỹo'ma'guit ca lpi'ỹaxaua loqo'm chicqochigui ca lasauaxaset. 14Ma' ỹim sa'deenta quiyim qaica quet cá'maq chi nanoiquentac se no'uen. Ca' dajo ỹaatqajam se'taxachichiguiñi quiyim lliqueta, ma' ỹim seuelec so qara'gaxala' Jesús. Qam no'm 'ue ca hueetapigui lauel quiyim 'ue ca se no'uen, ca' se no'uen, qam queca'maxare. 15Qam no'm quecá'maq 'qui', ca neu'a ca se no'uen la'deenataxanaxac ca rpi'ỹaxaua'e', ca' totqai vi'saugui ca ne'xorenataxanaxa. 'Neeto' lotqai 'ue ca na'laañi nqai'ñi' quená'maq ileualec so Cristo, chicqochigui quiyim sqa ỹaataq ca 'qui'. 16'Neeto' lotqai vii ca lligo quiyim 'ue ca qaỹa'xat se no'uen quená'maq 'ñiitapega qamiri quiyim lo'yaxanec. 17Ma' dá'maq lo'ueenataxanaxac ñi qota'a ma' ỹoiquentac ná'ogue najo, da'maxare sqai chicqochigui cá'maq re'qoochigui na'ic, loqo'm cá'maq qani'chigui; qaidaata dá'maq no'uen chaalataxac, na'maxa, chaqai da toonaxac coqomi' chicqo'ot so Espíritu Santo. 18Cá'maq 'neetari' dajo quiyim ro'ueenataxanot so Cristo, ca' qaỹa'maxarenta quiñi qota'olec chaqai quena qomyipi.
19Ca' chaqaida qolqatalec, sedaanqatapigui nauá'maq noviraqte' ma'le ca qara'maxa, quiyim ñotaanqata'ta', qaiyi nqo'neetashiguim ca llaqtaxac da qarpi'ỹaxac. 20'Neeto' na'laañi nqai'ñi' dá'maq lo'ueenataxanaxac ñi qota'a sauaxat cá'maq 'qui'. Llic ma' ná'ogue ná'maq na'ic co'teeta, qam dá'maq se no'uen quiyim 'ue ca qaỹa'ic, ca' chicqochigui quiyim 'ue ca lasauaxaset ca liỹa. 21'Maxaraic quiyim se qaỹa'ic ca la'at, chaqai quiyim se qani'chigui ca lataxa, chaqai quiyim sqaica ca qaỹo'uet quiyim huaañi ca qarpi'ỹaxaua, loqo'm chicqochigui ca lasauaxaset, loqo'm quiyim ra'lliiñi nqohin ca lpi'ỹaxac. 22Da rpi'ỹaxaqui' vi'saxauot quiyim 'viichi'sac ná'ogue najo, 'maxachitetegue caqami' chaqai quiñi qota'a. Ma' ¡chalego la'maxa ca qom no'm 'ue ca ỹa'maxarenta, ca sqai pilac quiyim 'ec se ỹa'maxagui na lauel! 23Qam cá'maq sqai quelec lauel cá'maq ỹa'queetac, ca chi nasauaxateteguelta' quiyim ỹa'ic, ma' sqai quiichigui nqai'en da lpi'ỹaxac. Ma' ná'ogue ná'maq sqai quiichigui nqohin da npi'ỹaxac, ca' nasauaxaset.
