Ỹaatqajam paguec maqachiñi' ca riỹa'e' caqami'
1Ca qomi' ma' mashic ra'ñi da qarpi'ỹaxac, ca' seconaxaguit quecá'maq 'neetari' ca qarqaỹa saqa' ra'ñi ca lpi'ỹaxac, mesqai chi ñimaqachinqateguelta'. 2Quiñi 'óna coqomi' paguec semaqachinaq quet ca qariỹa quiyim sahoqotaque ỹa'maqachiguiñi ca'maxare, chaqai quená'maq nqo'naxat ca lpi'ỹaxac. 3Ma' vire'ta so Cristo se nemaqachinalta'; ta'ta'a quiyim ipaquichiguilo naua naneresañi la'qaatqa ñi qota'a, 'neracsa': “Dá'maq lishiuenaxanaxac ná'maq rishiviñi'sac, taalec aỹim.” 4Ma' ná'ogue ná'maq shi'gue qoỹeretañi la'qaatec ñi qota'a, qoỹiriñi ma' qaỹauaaque qanapaxaguinaxat, qaiyi 'ue ca qareualaxavic chaqai ca la'maxa qouel chicqochigui da'maxare, ca' 'ue da qanaquitaxac. 5Ma' ñi qota'olec ñí'maq chicqo'ot da neualaxavic chaqai da la'maxa neuel, ỹotauane' qamiri quiyim necoñii'jta' 'oonoqui' ca ra'deenataxanaxaguii chicqo'tot so Cristo Jesús, 6qaiyi 'oonoqui' ca qavilliỹaxaguii quiyim maqachiñitac ñi qota'a, leta'a so qara'gaxala' Jesucristo.
Da na'qaatec qaỹa'xatougui na mesqai judioipi
7Ca' vichiguiño' quiñi 'óna icoñi'chiguit ca liỹa, 'nejem so Cristo na' icoñiguita qomi', qaiyi qaimaqachin ñi qota'a. 8Ma' quedá'maq shinac, quiyim so Cristo nanac ma' ỹahotaque quelola na judioipi, ma' ỹahotaque ipacqajanchigui ỹo'uet dá'maq qaỹachaxantapeguem na'le so 'auaxaic qareta'allipi, qaiyi ichoxot quiyim ñi qota'olec ipacqajanchiguilo nauá'maq ỹachaxanta'pe. 9Novi', qaiyi ná'maq sqai judioipi qai'neeta imaqachin ñi qota'a quedá'maq le'xorenataxanaxa, ma' 'nerac nauá'maq naneresañi na'qaatqa:
Vichiguiño' sechoxorentac ma'le qami' ma' seuetañigui na ỹoreta'oguit qomyipi,
chaqai so'ueentac ma'le na no'ueenqaipi quiyim semaqachintac qami'.
10Chaqai so liỹa naneretañi na'qaatec 'neetasa':
Na ỹoreta'oguit qomyipi chaqai ná'ogue na lalamaxareteripi ñi qota'a, netooñitac ma'le.
11Chaqai da liỹa na'qaatec 'neetasa':
Maqachiñii ñi qara'gaxala' ná'ogue na ỹoreta'oguit qomyipi,
chaqai 'xachii da lecaic ñi'maxare qamiá'ogue.
12Qai'neeta so Isaías ỹiriño' na'le da la'qaatec ñi qota'a, 'neetasa':
Novi' ma'le ca chigoxougui na llaalqaipi so Isaí,
quiyim nachajñi ma' ỹahotaque ỹoiquentac ma'le ná'ogue na qomyipi;
ca na'maxare 'ue ma'le ca naquitaxac queca'maxare.
13Ca' ñi qota'olec ma' chicqo'ot da qanaquitaxac, no'xaguilo nqai'ne' qamiri queda netoonaxaguii chaqai queda ra'maxahi quiyim mashic viilec ñi'maxare, qaiyi no'qaachiguilo qamiri quedá'maq naquitaxaguii chicqochigui da lquesaxanaxa so Espíritu Santo.
14Qamiri ỹaqaỹarolqa, ỹaatqajam 'chichiguiñi nqaishin quiyim no'qaachiguilo qamiri queda nqouagaxa chaqai queda na'deenaxanaxa, chaqai quiyim 'yiiñii qachiỹa ca riỹahi. 15Qam canajo ilaata sahotaque quiyim sa'xateta ná'ogue na'maxare, qaiyi se couahi'e. So'uet, ma' chicqochigui da lqouagaxa ñi qota'olec quiyim ỹa'ue da ỹo'ueenataxanaxac, 16quiyim aỹim lelaatec nqai'en so Jesucristo quená'maq sqai judioipi, quiyim so'ueenataxanougui. Ca dá'maq so'ueetetac 'neetasa' quiyim sa'xatetapeguem da na'qaatec chicqaugui da nca'laxa ỹachaxantac ñi qota'a, qaiyi saanot ñi'maxare ná'maq sqai judioipi, 'nejem aca nachitaxanataxanqate qaỹa'maxarenta quiñi qota'a, ma' mashic qaỹoỹoota'oga na'maxare queso Espíritu Santo.
17Ma' mashic seuelec so Cristo Jesús, ca' chaqaida chicqochigui da ñitoonaxac quiyim so'ueenataxantacot ñi qota'olec. 18Ma' se seconejlec cá'maq sa'xat quiyim saqa' ỹo'uet so Cristo ỹachigoxochichigui aỹim, qaiyi ná'maq sqai judioipi ishit na'xaỹaxana ñi qota'a. Qam dajo chicqochiguilo naua ỹa'qaatqa chaqai ná'maq ỹo'ueenataxanaxaquipi, 19chaqai da lquesaxanaxa na netanqaipi chaqai na se qaiuanapega, chaqai da lquesaxanaxa so Espíritu Santo. Ca' quedajo, ca imigui quiyim sa'xat da na'qaatec chicqaugui da nca'laxa chicqo'ot so Cristo, chicqochi'ñi yi Jerusalén chaqai naua'que naua lahil yi 'laua, chi ỹovireta'a yi Ilírico. 20Ca' ñquipita'pegue' sa'xat da nca'laxa quená'maq saqa' iuanapega 'xaỹa da leenaxat so Cristo, qaiyi sqai shinta cá'maq no'xonshiguim ca 'imec quiyim ỹoqa'a cá'maq ỹo'viijñi cá'maq no'xonaxala'. 21Ta'ta'a quiyim ipaquichigui dá'maq 'nerac naua naneresañi la'qaatqa ñi qota'a 'neracsa':
Qaiyi ná'maq se iuanapega 'ue ca la'xaỹaxac queca'maxare, ca iuana ma'le,
chaqai ỹa'den ma'le ná'maq se ỹauanapega 'xaỹa ca'maxare.
So Pablo ỹahotaque taigue da Roma
22Ca' chaqaida dá'maq 'neeta quiyim se seshit shicpegueto qamiri, ma' 'xoic quen sahotaque saiquena, qam se seshit. 23Qam nagui mashic somat ná'maq so'ueetetac quenauajo 'lauari, ma' mashic 'vii ñaxari sahotaque sentauguilo qamiri. 24Ma' sahotaque quiyim shiquejlgoto sa'piichalo qamiri ma' saigue da España. Ca' ma' ime somachigui quiyim ñiuañiguita qamiri, sha'apiguito' qamiri yotauañii ma'le quedá'maq ỹicyaxac quedá'maq saỹa'gue. 25Qam nagui saỹa'gue da Jerusalén, se'xateta ana notaanaxanqate quiyi qarqaỹaripi na'anyi. 26Ma' yi Macedonia chaqai yi Acaya laseripi 'uo' da la'deenataxanaxac quiyim ỹo'uet aca lapoonecse, ca ilata yi qarqaỹaripi 'xoraiquipi na'ñi yi Jerusalén. 27Ca 'eco' 'maxaraic nqai'en quiyim ỹo'uet dajo, chaxaso' ma' llic 'ue ana na'uale quiyi'maxare. Ma' 'nejem ná'maq mashic icoñiguit da na'qaatec quena judioipi nouane'te' na'le quená'maq no'uen se re'xogui ná'maq sqai judioipi, ca na'maxare nagui ỹotauan quena re'qoochigui nesallaxa ná'maq mashic icoñiguit da na'qaatec quena judioipi. 28Ca ma' somat dajo, ma' ime saano ana notaanaxanqate, ma'le ca' saigue da España, ca shiquejlgoto qamiri ma'le. 29Ca' re'qoota quiyim ma' sovitalo qamiri, qam no'qaachigui aỹim queda qouagaxa chicqaugui da na'qaataxac so Cristo.
30Ñi'xoresentouguilo qamiri ỹaqaỹa' queso qara'gaxala' Jesucristo chaqai queda ne'xorenataxanaxa chicqo'ot so Espíritu Santo ỹaanema qomi', quiyim yotauañii queda iloquiaxac, nqouagaxaiñitalec aỹim quiñi qota'a. 31Shiilahi ñi qota'olec quiyim ro'ootaxanlec aỹim quena saqa' icoñiguit da na'qaatec na'ñi yi Judea, chaqai qaicanqaida ma' qaicoñiguit ana notaanqate se'xateta yi qarqaỹaripi na'ñi yi Jerusalén, 32qaiyi no'm chaqaiñi ñi qota'olec, ca ma' sovi', ca' 'ue ca ñitoonaxac ma' ñiuañiguita qamiri, ca' ỹaatqajam ñco'matec ma' sovitalo qamiri. 33Ca' ñi qota'a chicqo'ot da na'maxa sahotaque hueetauguilo qamiri. Ajá'a, ca' chaqaida 'neeta dajo.
