Da liquinaxanaxac so Pablo
1'Ue da ỹaqataxac cana qarqaỹa Febe, aná'maq ỹaatqajam 'ue da lotaanaxanaxac quená'maq mashic icoñiguit da na'qaatec na'ñi yi Cencrea, 2quiyim qaicoñi'chiguit, ma' ca'maxare ỹaatqajam lalamaxarete so qara'gaxala'. 'Nejem nqai'ñii ca 'neeta ca nqaỹaripi quiyim icoñiguit ca lpi'ỹaxaua. Chaqai tauañii quecanchaqaica ỹouen, ma' ca'maxare 'xoic na ỹotauan, chaqai aỹim qai'neeta yotauan quen.
3Selata da iquinaxanaxac aca Priscila chaqai ca loua Aquila, ỹotaua' queda qaro'ueenataxanaxac queso Cristo Jesús. 4Ma' caua'maxare npa'xanchiguit da lichic na' nca'laxaterec aỹim. Ca' ỹim saanec da ña'aachic quecaua'maxare. Chaqai mesqaỹimeta, ma' qai'neeta ná'ogue ná'maq mashic icoñiguit da na'qaatec quená'maq sqai judioipi. 5Qai'neeta selata da iquinaxanaxac ca qarqaỹaripi lo'ueenaxanqa' quen yi la'a' aca Priscila chaqai ca Aquila. Iquinaxanaxac queca ñauochaxaua Epeneto cá'maq 'auaxaic huelec so Cristo quiyi Acaya. 6Iquinaxanaxac caca María cá'maq ỹaatqajam 'xoic da lo'ueenataxanaxac caqamiri. 7Qai'neeta selata da iquinaxanaxac cá'maq chi iuo' le'ec Andrónico chaqai aca Junias cauá'maq ncoñiitaxaua' na'le cañi ncoñiitaxanaxaqui. Caua'maxare ỹaatqajam qaỹa'deente', 'nejem nqohine' caua lelaatqa so Jesús, chaqai 'au huerelec so Cristo caỹim.
8Iquinaxanaxac queca ỹaatqajam ñauochaxaua Amplias, cá'maq na'deetau'a so qara'gaxala'. 9Iquinaxanaxac queca Urbano qarotaua queda qaro'ueenatec queso Cristo Jesús chaqai ca ñauochaxaua Estaquis. 10Iquinaxanaxac queca Apeles cá'maq ỹaatqajam re'qoota nqai'en da lpi'ỹaxac queso Cristo, chaqai qai'neeta so llaalqaipi so Aristóbulo. 11Qai'neeta selata da iquinaxanaxac ca iuo' le'ec Herodión, chaqai ca llaalqaipi ca Narciso cá'maq mashic huelec so qara'gaxala'. 12Iquinaxanaxac caca Trifena chaqai aca Trifosa, caua'maxare ro'ueenataxansacot so qara'gaxala', chaqai aca qanauochaxaua qarqaỹa Pérsida, ma' ỹaatqajam 'xoic da lo'ueenataxanaxac queso qara'gaxala'. 13Iquinaxanaxac queca Rufo cá'maq ỹaatqajam qaỹa'deenta huelec so qara'gaxala', chaqai aca late'e, ma' qai'neeta 'neetari' aca ỹate'e. 14Iquinaxanaxac queca Asíncrito, chaqai ca Flegonte, chaqai ca Hermas, chaqai ca Patrobas, chaqai ca Hermes, chaqai ca qarqaỹaripi lauora' caua'maxare. 15Qai'neeta iquinaxanaxac queca Filólogo chaqai aca Julia, chaqai ca Nereo chaqai aca lqaỹa, chaqai ca Olimpas chaqai quecá'ogue ca qarqaỹaripi qarpi'ỹaxauaripi lauora' caua'maxare.
16Ca' quiyim niquiñiỹata', ca ỹaatqajam ne'xoriñiỹata', ca' quiñi 'óna nqo'goq ca liỹa. Ná'ogue ná'maq mashic icoñiguit da na'qaatec queso Cristo ilatalo qamiri da liquinaxanaxac.
17Ñi'xoresentouguilo qamiri ỹaqaỹarolqa, quiyim na'ijñii'tegue cá'maq reuacqataxantac chaqai cá'maq ro'taqataxantac. Ma' ca'maxare 'eco' npa'guente'e' dá'maq shi'gue 'yiiñii napaxaguinataxaguii. Noỹoochiuec queca'maxare. 18Ma' cauajo qomi' se ro'ueenataxansacot so qara'gaxala' Jesucristo, qaidaata dá'maq chi lishoxo. Chaqai ỹayintac ana le'taxanata na qomyipi qaica ca ỹa'den, isotete' nqai'ne' naua la'qaatqa, chaqai lo'daxaraqa. 19Ná'ogue ỹa'deenta quiyim ỹaatqajam na'xaỹaxañita. Vichiguiño' ñitoontac, chaqai sahotaque quiyim na'maxachitañi quiyim 'maxaraic ca ro'ueenataxanaxaguii, qam sqo 'viichii ca se no'uen. 20Ca ñí'maq qota'olec chicqo'ot da na'maxa qaỹaloq pataxañi so na'ỹaapec, illo'oto naua qapiaachiri. Chaqai so qara'gaxala' Jesucristo no'ueenaxat ca qayicyaxaguii.
21Ilatalo qamiri da liquinaxanaxac ñi Timoteo ỹotaua queda qaro'ueenatec, chaqai qai'neeta nauá'maq chi iuo' lase' Lucio, Jasón chaqai Sosípater.
22Ỹim Tercio, ỹim leraxanqajnec so Pablo quiyim shiriñi anajo lelaata, qai'neeta selatalo qamiri da iquinaxanaxac, ma' qai'neeta seuelec so qara'gaxala'.
23Liquinaxanaxac ñi Gayo. Senta'ñi na la'a' ná'maq ra'ualaxanataxanot quiyim lo'ueenaxanqa' ná'maq mashic icoñiguit da na'qaatec. Qai'neeta ila' liquinaxanaxac ñi Erasto ñí'maq reloqota'a ana lam na na'a' lodegaxat, chaqai ñi qarqaỹa Cuarto.
24Ca' ñi qara'gaxala' Jesucristo ỹaanema qamiri ca no'uen qayicyaxaguii qamiá'ogue. Ajá'a, ca' chaqaida 'neeta dajo.
So Pablo imaqachintac ñi qota'a
25Ca' nagui semaqachinqatac ñi qota'a ñí'maq ishit ỹa'ñaxat ca rpi'ỹaxaguii, nachiñi'chiguit nqai'en da na'qaatec chicqaugui da nca'laxa, dá'maq sa'xatetac quena' sapaxaguinataxanta'pegue queso qara'gaxala' Jesucristo. Ca' dajo nachiñi'chiguit dá'maq ỹahotaque ñi qota'a quiyim qara'deenaxanaxanegue dá'maq se re'xogui lo'ueenataxanaxac, dá'maq ỹa'maxat ỹoxotetañi na' saqa'leca na 'laua. 26Qam nagui, ca' qaichoxot, chicqochigui nqohin naua naneresañi na'qaatqa no'ueenaqterañi na'le saua 'auaxaqa letaxaỹaxanqajanqa ñi qota'a, dá'maq relaataxanlco' na'le ñi qota'a sqaica lqodoc. Dajo se re'xogui lo'ueenataxanaxac ñi qota'a nagui, ca' qaichoxotem ná'ogue na ỹoreta'oguit qomyipi quiyim huelec chaqai na'xaỹaxana.
27¡Ca' ñi qota'olec qaiñiita chaqai 'deenaxanqachaqaic, taatacot da nemaqajnataxanaxa sqaica lqodoc, chicqochigui nqohin so qara'gaxala' Jesucristo! Ajá'a, ca' chaqaida 'neeta dajo.
